Istisna 14
paak aur naapaak jaanvar
1tum rabb apnay khuda kay farzand ho. apnay aap ko murdon kay sabab say na zakhmee karo, na apnay sar kay saamnay vaalay baal mundavaao. 2kyoonki too rabb apnay khuda kay liyay makhsoos-o-muqaddas qaum hai. duniya kee tamaam qaumon men say rabb nay tujhay hee chun kar apnee milkiyat bana liya hai.
3koee bhee makrooh cheez na khaana.
4tum bail, bhed-bakree, 5hiran, ghazaal, marg [a] yah hiran kay mushaabeh hota hai lekin fitratan mukhtalif hota hai. is kay seeng khokhlay, beshaakh aur unjhad hotay hain. antelopay. yaad rahay ki qadeem zamaanay kay in jaanvaron kay aksar naam matrook hain ya un ka matlab badal gaya hai, is liyay un ka mukhtalif tarjuma ho sakta hai. , pahaadee bakree, mahaat [b] mahaat. daraazaqad hirnon kee ek nau jis kay seeng chakkardaar hotay hain. addakh. , ghazaal-ay-afreeqaa [c] ghazaal-ay-afreeqa. chikaaron kee teen iqsaam men say koee jo apnay lambay aur halqaadaar seengon kee vajah say mumtaaz hai. oryakh. aur pahaadee bakree kha saktay ho. 6jin kay khur ya paaon bilkul chiray huay hain aur jo jugaalee kartay hain unhen khaanay kee ijaazat hai. 7oont, bijjoo ya khargosh khaana mana hai. vah aap kay liyay naapaak hain, kyoonki vah jugaalee to kartay hain lekin un kay khur ya paaon chiray huay naheen hain. 8sooar na khaana. vah tumhaaray liyay naapaak hai, kyoonki us kay khur to chiray huay hain lekin vah jugaalee naheen karta. na un ka gosht khaana, na un kee laashon ko chhoona.
9paanee men rahenay vaalay jaanvar khaanay kay liyay jaaiz hain agar un kay par aur chhilkay hon. 10lekin jin kay par ya chhilkay naheen hain vah tumhaaray liyay naapaak hain.
11tum har paak parinda kha saktay ho. 12lekin zail kay parinday khaana mana hai : uqaab, dadhiyal giddh, kaala giddh, 13laal cheel, kaalee cheel, har qism ka giddh, 14har qism ka kavva, 15uqaabee ulloo, chhotay kaan vaala ulloo, baday kaan vaala ulloo, har qism ka baaz, 16chhota ulloo, chinghaadanay vaala ulloo, safed ulloo, 17dashtee ulloo, misree giddh, qooq, 18laqlaq, har qism ka booteemaar, hudahud aur chamgaadad [d] yaad rahay ki qadeem zamaanay kay in parindon kay aksar naam matrook hain ya un ka matlab badal gaya hai, is liyay un ka mukhtalif tarjuma ho sakta hai. .
19tamaam par rakhnay vaalay keeday tumhaaray liyay naapaak hain. unhen khaana mana hai. 20lekin tum har paak parinda kha saktay ho.
21jo jaanvar khud-ba-khud mar jaaay usay na khaana. too usay apnee aabaadee men rahenay vaalay kisee pardesee ko day ya kisee ajnabee ko bech sakta hai aur vah usay kha sakta hai. lekin too usay mat khaana, kyoonki too rabb apnay khuda kay liyay makhsoos-o-muqaddas qaum hai.
bakree kay bachchay ko us kee maan kay doodh men pakaana mana hai.
apnee paidaavaar ka dasvaan hissa makhsoos karnaa
22laazim hai ki too har saal apnay kheton kee paidaavaar ka dasvaan hissa rabb kay liyay alag karay. 23is kay liyay apna anaaj, angoor ka ras, zaitoon ka tel aur maveshee kay pahelauthay rabb apnay khuda kay huzoor lay aana yaanee us jagah jo vah apnay naam kee sukoonat kay liyay chunega. vahaan yah cheezen qurbaan karkay kha taaki too umr bhar rabb apnay khuda ka khauf maanna seekhay.
24lekin ho sakta hai ki jo jagah rabb tera khuda apnay naam kee sukoonat kay liyay chunega vah teray ghar say hadd say ziyaada door ho aur rabb teray khuda kee barkat kay baais mazkoora dasvaan hissa itna ziyaada ho ki too usay maqdis tak naheen pahuncha sakta. 25is soorat men usay bech kar us kay paisay us jagah lay ja jo rabb tera khuda apnay naam kee sukoonat kay liyay chunega. 26vahaan pahunch kar un paison say jo jee chaahay khareedna, khwaah gaay-bail, bhed-bakree, mai ya mai jaisee koee aur cheez kyoon na ho. phir apnay gharaanay kay saath mil kar rabb apnay khuda kay huzoor yah cheezen khaana aur khushee manaana. 27aisay mauqon par un laaviyon ka khayaal rakhna jo teray qabaailee ilaaqay men rahetay hain, kyoonki unhen meeraas men zameen naheen milegee.
28har teesray saal apnee paidaavaar ka dasvaan hissa apnay shaheron men jama karna. 29usay laaviyon ko dena jin kay paas mauroosee zameen naheen hai, neez apnay shaheron men aabaad pardesiyon, yateemon aur bevaaon ko dena. vah aaen aur khaana kha kar ser ho jaaen taaki rabb tera khuda teray har kaam men barkat day.