Istisna 13

devtaaon kee taraf lejaanay vaalon say sulook

¹teray darmiyaan aisay log uth khaday hongay jo apnay aap ko nabee ya khwaab dekhnay vaalay kahengay. ho sakta hai ki vah kisee ilaahee nishaan ya mojizay ka elaan karen ²jo vaaqaee vujood men aaay. saath saath vah kahen, “a, ham deegar maaboodon kee pooja karen, ham un kee khidmat karen jin say too ab tak vaaqif naheen hai.” ³aisay logon kee na sun. is say rabb tumhaara khuda tumhen aazma kar maaloom kar raha hai ki kya tum vaaqaee apnay pooray dil-o-jaan say us say piyaar kartay ho. ⁴tumhen rabb apnay khuda kee pairvee karna aur usee ka khauf maanna hai. us kay ahkaam kay mutaabiq zindagee guzaaro, us kee suno, us kee khidmat karo, us kay saath liptay raho. ⁵aisay nabiyon ya khwaab dekhnay vaalon ko saza-ay-maut dena, kyoonki vah tujhay rabb tumhaaray khuda say baghaavat karnay par uksaana chaahatay hain, usee say jis nay fidya day kar tumhen misr kee ghulaamee say bachaaya aur vahaan say nikaal laaya. choonki vah tujhay us raah say hataana chaahatay hain jisay rabb teray khuda nay teray liyay muqarrar kiya hai is liyay laazim hai ki unhen saza-ay-maut dee jaaay. aisee buraaee apnay darmiyaan say mita dena.

⁶ho sakta hai ki tera saga bhaaee, tera beta ya betee, teree beevee ya tera qareebee dost tujhay chupkay say varghalaanay kee koshish karay ki a, ham ja kar deegar maaboodon kee pooja karen, aisay devtaaon kee jin say na too aur na teray baapdaada vaaqif thay. ⁷khwaah ird-gird kee ya doordaraaz kee qaumon kay devta hon, khwaah duniya kay ek siray kay ya doosray siray kay maabood hon, ⁸kisee soorat men apnee razaamandee ka izhaar na kar, na us kee sun. us par rahem na kar. na usay bachaaay rakh, na usay panaah de ⁹balki usay saza-ay-maut day. aur usay sangasaar kartay vaqt pahelay tera haath us par patthar phainkay, phir hee baaqee tamaam log hissa len. ¹⁰usay zaroor pattharon say saza-ay-maut dena, kyoonki us nay tujhay rabb teray khuda say door karnay kee koshish kee, usee say jo tujhay misr kee ghulaamee say nikaal laaya. ¹¹phir tamaam israaeel yah sun kar dar jaaega aur aainda teray darmiyaan aisee shareer harkat karnay kee jur’at naheen karega.

¹²jab too un shaheron men rahenay lagega jo rabb tera khuda tujhay day raha hai to shaayad tujhay khabar mil jaae ¹³ki shareer log teray darmiyaan say ubhar aaay hain jo apnay shaher kay baashindon ko yah kah kar ghalat raah par laaay hain ki aao, ham deegar maaboodon kee pooja karen, aisay maaboodon kee jin say tum vaaqif naheen ho. ¹⁴laazim hai ki too darayaaft karkay is kee tafteesh karay aur khoob maaloom karay ki kya hua hai. agar saabit ho jaaay ki yah ghinaunee baat vaaqaee huee hai ¹⁵to phir laazim hai ki too shaher kay tamaam baashindon ko halaak karay. usay rabb kay sapurd karkay saraasar tabaah karna, na sirf us kay log balki us kay maveshee bhee. ¹⁶shaher ka poora maal-ay-ghaneemat chauk men ikattha kar. phir pooray shaher ko us kay maal samet rabb kay liyay makhsoos karkay jala dena. usay dubaara kabhee na taameer kiya jaaay balki us kay khandaraat hamesha tak rahen.

¹⁷poora shaher rabb kay liyay makhsoos kiya gaya hai, is liyay us kee koee bhee cheez teray paas na paaee jaaay. sirf is soorat men rabb ka ghazab thanda ho jaaega, aur vah tujh par rahem karkay apnee meharbaanee ka izhaar karega aur teree taadaad badhaaega, jis tarah us nay qasam kha kar teray baapdaada say vaada kiya hai. ¹⁸lekin yah sab kuchh is par mabnee hai ki too rabb apnay khuda kee sunay aur us kay un tamaam ahkaam par amal karay jo main tujhay aaj day raha hoon. vahee kuchh kar jo us kee nazar men durust hai.