Istisna 12

mulk men rabb kay ahkaam

¹zail men vah ahkaam aur qavaaneen hain jin par tumhen dhyaan say amal karna hoga jab tum us mulk men aabaad hogay jo rabb teray baapdaada ka khuda tujhay day raha hai taaki too us par qabza karay. mulk men rahetay huay umr bhar un kay taabay raho.

mulk men ek hee jagah par maqdis ho

²un tamaam jagahon ko barbaad karo jahaan vah qaumen jinhen tumhen nikaalna hai apnay devtaaon kee pooja kartee hain, khwaah vah oonchay pahaadon, pahaadiyon ya ghanay darakhton kay saay men kyoon na hon. ³un kee qurbaanagaahon ko dha dena. jin pattharon kee pooja vah kartay hain unhen chikna-choor kar dena. yaseerat devee kay khambay jala dena. un kay devtaaon kay mujassmay kaat daalna. gharaz in jagahon say un ka naam-o-nishaan mit jaaay.

⁴rabb apnay khuda kee parastish karnay kay liyay un kay tareeqay na apnaana. ⁵rabb tumhaara khuda qabeelon men say apnay naam kee sukoonat kay liyay ek jagah chun lega. ibaadat kay liyay vahaan jaaya karo, ⁶aur vahaan apnee tamaam qurbaaniyaan la kar pesh karo, khwaah vah bhasm honay vaalee qurbaaniyaan, zabah kee qurbaaniyaan, paidaavaar ka dasvaan hissa, uthaanay vaalee qurbaaniyaan, mannat kay hadiay, khushee say pesh kee gaee qurbaaniyaan ya maveshiyon kay pahelauthay kyoon na hon. ⁷vahaan rabb apnay khuda kay huzoor apnay gharaanon samet khaana kha kar un kaamyaabiyon kee khushee manaao jo tujhay rabb teray khuda kee barkat kay baais haasil huee hain.

⁸us vaqt tumhen vah naheen karna jo ham kartay aaay hain. aaj tak har koee apnee marzee kay mutaabiq ibaadat karta hai, ⁹kyoonki ab tak tum aaraam kee us jagah naheen pahunchay jo tujhay rabb teray khuda say meeraas men milnee hai. ¹⁰lekin jald hee tum darya-ay-yardan ko paar karkay us mulk men aabaad ho jaaogay jo rabb tumhaara khuda tumhen meeraas men day raha hai. us vaqt vah tumhen ird-gird kay dushmanon say bachaaay rakhega, aur tum aaraam aur sukoon say zindagee guzaar sakogay. ¹¹tab rabb tumhaara khuda apnay naam kee sukoonat kay liyay ek jagah chun lega, aur tumhen sab kuchh jo main bataaoonga vahaan la kar pesh karna hai, khwaah vah bhasm honay vaalee qurbaaniyaan, zabah kee qurbaaniyaan, paidaavaar ka dasvaan hissa, uthaanay vaalee qurbaaniyaan ya mannat kay khaas hadiay kyoon na hon. ¹²vahaan rabb kay saamnay tum, tumhaaray betay-betiyaan, tumhaaray ghulaam aur laundiyaan khushee manaaen. apnay shaheron men aabaad laaviyon ko bhee apnee khushee men shareek karo, kyoonki un kay paas mauroosee zameen naheen hogee.

¹³khabardaar, apnee bhasm honay vaalee qurbaaniyaan har jagah par pesh na karnaa ¹⁴balki sirf us jagah par jo rabb qabeelon men say chunega. vaheen sab kuchh yoon mana jis tarah main tujhay bataata hoon.

¹⁵lekin vah jaanvar is men shaamil naheen hain jo too qurbaanee kay taur par pesh naheen karna chaahata balki sirf khaana chaahata hai. aisay jaanvar too aazaadee say apnay tamaam shaheron men zabah karkay us barkat kay mutaabiq kha sakta hai jo rabb teray khuda nay tujhay dee hai. aisa gosht hiran aur ghazaal kay gosht kee maanind hai yaanee paak aur naapaak donon hee usay kha saktay hain. ¹⁶lekin khoon na khaana. usay paanee kee tarah zameen par undel kar zaaay kar dena.

¹⁷jo bhee cheezen rabb kay liyay makhsoos kee gaee hain unhen apnay shaheron men na khaana maslan anaaj, angoor kay ras aur zaitoon kay tel ka dasvaan hissa, maveshiyon kay pahelauthay, mannat kay hadiay, khushee say pesh kee gaee qurbaaniyaan aur uthaanay vaalee qurbaaniyaan. ¹⁸yah cheezen sirf rabb kay huzoor khaana yaanee us jagah par jisay vah maqdis kay liyay chunega. vaheen too apnay betay-betiyon, ghulaamon, laundiyon aur apnay qabaailee ilaaqay kay laaviyon kay saath jama ho kar khushee mana ki rabb nay hamaaree mehanat ko barkat dee hai. ¹⁹apnay mulk men laaviyon kee zarooriyaat umr bhar pooree karnay kee fikr rakh.

²⁰jab rabb tera khuda apnay vaaday kay mutaabiq teree sarhadden badha dega aur too gosht khaanay kee khwaahish rakhega to jis tarah jee chaahay gosht kha sakega. ²¹agar tera ghar us maqdis say door ho jisay rabb tera khuda apnay naam kee sukoonat kay liyay chunega to too jis tarah jee chaahay apnay shaheron men rabb say milay huay maveshiyon ko zabah karkay kha sakta hai. lekin aisa hee karna jaisa main nay hukm diya hai. ²²aisa gosht hiran aur ghazaal kay gosht kee maanind hai yaanee paak aur naapaak donon hee usay kha saktay hain. ²³alabatta gosht kay saath khoon na khaana, kyoonki khoon jaandaar kee jaan hai. us kee jaan gosht kay saath na khaana. ²⁴khoon na khaana balki usay zameen par undel kar zaaay kar dena. ²⁵usay na khaana taaki tujhay aur teree aulaad ko kaamyaabee haasil ho, kyoonki aisa karnay say too rabb kee nazar men saheeh kaam karega.

²⁶lekin jo cheezen rabb kay liyay makhsoos-o-muqaddas hain ya jo too nay mannat maan kar us kay liyay makhsoos kee hain laazim hai ki too unhen us jagah lay jaaay jisay rabb maqdis kay liyay chunega. ²⁷vaheen, rabb apnay khuda kee qurbaangaah par apnee bhasm honay vaalee qurbaaniyaan gosht aur khoon samet chadha. zabah kee qurbaaniyon ka khoon qurbaangaah par undel dena, lekin un ka gosht too kha sakta hai.

²⁸jo bhee hidaayaat main tujhay day raha hoon unhen ehatiyaat say poora kar. phir too aur teree aulaad khushhaal rahengay, kyoonki too vah kuchh karega jo rabb teray khuda kee nazar men achchha aur durust hai.

²⁹rabb tera khuda un qaumon ko mita dega jin kee taraf too badh raha hai. too unhen un kay mulk say nikaalta jaaega aur khud us men aabaad ho jaaega. ³⁰lekin khabardaar, un kay khatm honay kay baad bhee un kay devtaaon kay baaray men maaloomaat haasil na kar, varna too phans jaaega. mat kahena ki yah qaumen kis tareeqay say apnay devtaaon kee pooja kartee hain? ham bhee aisa hee karen. ³¹aisa mat kar! yah qaumen aisay ghinaunay tareeqay say pooja kartee hain jin say rabb nafrat karta hai. vah apnay bachchon ko bhee jala kar apnay devtaaon ko pesh kartay hain.

³²kalaam kee jo bhee baat main tumhen pesh karta hoon us kay taabay rah kar us par amal karo. na kisee baat ka izaafa karna, na koee baat nikaalna.