Istisna 11

rabb say muhabbat rakh aur us kee sun

¹rabb apnay khuda say piyaar kar aur hamesha us kay ahkaam kay mutaabiq zindagee guzaar. ²aaj jaan lo ki tumhaaray bachchon nay naheen balki tum hee nay rabb apnay khuda say tarbiyat paaee. tum nay us kee azmat, baday ikhtiyaar aur qudrat ko dekha, ³aur tum un mojizon kay gavaah ho jo us nay misr kay baadshaah firaaun aur us kay pooray mulk kay saamnay kiay. ⁴tum nay dekha ki rabb nay kis tarah misree fauj ko us kay ghodon aur rathon samet baher-ay-qulzum men gharq kar diya jab vah tumhaara taaqqub kar rahay thay. us nay unhen yoon tabaah kiya ki vah aaj tak bahaal naheen huay.

⁵tumhaaray bachchay naheen balki tum hee gavaah ho ki yahaan pahunchnay say pahelay rabb nay registaan men tumhaaree kis tarah dekh-bhaal kee. ⁶tum nay us ka iliyaab kay beton daatan aur abeeraam kay saath sulook dekha jo roobin kay qabeelay kay thay. us din zameen nay khaimaagaah kay andar munh khol kar unhen un kay gharaanon, deron aur tamaam jaandaaron samet hadap kar liya.

⁷tum nay apnee hee aankhon say rabb kay yah tamaam azeem kaam dekhay hain. ⁸chunaanchay un tamaam ahkaam par amal kartay raho jo main aaj tumhen day raha hoon taaki tumhen vah taaqat haasil ho jo darkaar hogee jab tum darya-ay-yardan ko paar karkay mulk par qabza karogay. ⁹agar tum faramaambardaar raho to der tak us mulk men jeetay rahogay jis ka vaada rabb nay qasam kha kar tumhaaray baapdaada say kiya tha aur jis men doodh aur shahed kee kasrat hai.

¹⁰kyoonki yah mulk misr kee maanind naheen hai jahaan say tum nikal aaay ho. vahaan kay kheton men tujhay beej bo kar badee mehanat say us kee aabpaashee karnee padtee thee ¹¹jabki jis mulk par tum qabza karogay us men pahaad aur vaadiyaan hain jinhen sirf baarish ka paanee seraab karta hai. ¹²rabb tera khuda khud us mulk ka khayaal rakhta hai. rabb teray khuda kee aankhen saal kay pahelay din say lay kar aakhir tak mutvaatir us par lagee rahetee hain.

¹³chunaanchay un ahkaam kay taabay raho jo main aaj tumhen day raha hoon. rabb apnay khuda say piyaar karo aur apnay pooray dil-o-jaan say us kee khidmat karo. ¹⁴phir vah khareef aur bahaar kee saalaana baarish vaqt par bhejega. anaaj, angoor aur zaitoon kee faslen pakengee, aur too unhen jama kar lega. ¹⁵neez, allaah teree charaagaahon men teray revdon kay liyay ghaas muhayya karega, aur too kha kar ser ho jaaega.

¹⁶lekin khabardaar, kaheen tumhen varghalaaya na jaaay. aisa na ho ki tum rabb kee raah say hat jaao aur deegar maaboodon ko sijda karkay un kee khidmat karo. ¹⁷varna rabb ka ghazab tum par aan padega, aur vah mulk men baarish honay naheen dega. tumhaaree faslen naheen pakengee, aur tumhen jald hee us achchhay mulk men say mita diya jaaega jo rabb tumhen day raha hai.

¹⁸chunaanchay meree yah baaten apnay dilon par naqsh kar lo. unhen nishaan kay taur par aur yaaddahaanee kay liyay apnay haathon aur maathon par lagaao. ¹⁹unhen apnay bachchon ko sikhaao. har jagah aur hamesha un kay baaray men baat karo, khwaah too ghar men baitha ya raastay par chalta ho, leta ho ya khada ho. ²⁰unhen apnay gharon kee chaukhton aur apnay shaheron kay darvaazon par likh ²¹taaki jab tak zameen par aasmaan qaaim hai tum aur tumhaaree aulaad us mulk men jeetay rahen jis ka vaada rabb nay qasam kha kar tumhaaray baapdaada say kiya tha.

²²ehatiyaat say un ahkaam kee pairvee karo jo main tumhen day raha hoon. rabb apnay khuda say piyaar karo, us kay tamaam ahkaam par amal karo aur us kay saath liptay raho. ²³phir vah tumhaaray aagay aagay yah tamaam qaumen nikaal dega aur tum aisee qaumon kee zameenon par qabza karogay jo tum say badee aur taaqatvar hain. ²⁴tum jahaan bhee qadam rakhogay vah tumhaara hee hoga, junoobee registaan say lay kar lubnaan tak, darya-ay-furaat say baheera-ay-room tak. ²⁵koee bhee tumhaara saamna naheen kar sakega. tum us mulk men jahaan bhee jaaogay vahaan rabb tumhaara khuda apnay vaaday kay mutaabiq tumhaaree dahshat aur khauf paida kar dega. ²⁶aaj tum khud faisla karo. kya tum rabb kee barkat ya us kee laanat paana chaahatay ho? ²⁷agar tum rabb apnay khuda kay un ahkaam par amal karo jo main aaj tumhen day raha hoon to vah tumhen barkat dega. ²⁸lekin agar tum un kay taabay na raho balki meree peshakarada raah say hat kar deegar maaboodon kee pairvee karo to vah tum par laanat bhejega.

²⁹jab rabb tera khuda tujhay us mulk men lay jaaega jis par too qabza karega to laazim hai ki garizeem pahaad par chadh kar barkat ka elaan karay aur aibaal pahaad par laanat ka. ³⁰yah do pahaad darya-ay-yardan kay maghrib men un kan’aaniyon kay ilaaqay men vaaqay hain jo vaadee-ay-yardan men aabaad hain. vah maghrib kee taraf jiljaal shaher kay saamnay morih kay baloot kay darakhton kay nazdeek hain. ³¹ab tum darya-ay-yardan ko paar karkay us mulk par qabza karnay vaalay ho jo rabb tumhaara khuda tumhen day raha hai. jab tum usay apna kar us men aabaad ho jaaoge ³²to ehatiyaat say un tamaam ahkaam par amal kartay raho jo main aaj tumhen day raha hoon.