Istisna 10

moosa ko naee takhtiyaan miltee hain

¹us vaqt rabb nay mujh say kaha, “patthar kee do aur takhtiyaan taraashna jo pahelee takhtiyon kee maanind hon. unhen lay kar meray paas pahaad par chadh a. lakdee ka sandooq bhee banaana. ²phir main in takhtiyon par dubaara vahee baaten likhoonga jo main un takhtiyon par likh chuka tha jo too nay tod daaleen. tumhen unhen sandooq men mahfooz rakhna hai.”

³main nay keekar kee lakdee ka sandooq banvaaya aur do takhtiyaan taraasheen jo pahelee takhtiyon kee maanind theen. phir main donon takhtiyaan lay kar pahaad par chadh gaya. ⁴rabb nay un takhtiyon par dubaara vah das ahkaam likh diay jo vah pahelee takhtiyon par likh chuka tha. (un hee ahkaam ka elaan us nay pahaad par aag men say kiya tha jab tum us kay daaman men jama thay.) phir us nay yah takhtiyaan meray sapurd keen. ⁵main laut kar utra aur takhtiyon ko us sandooq men rakha jo main nay banaaya tha. vahaan vah ab tak hain. sab kuchh vaisa hee hua jaisa rabb nay hukm diya tha.

imaamon aur laaviyon kee khidmat

⁶(is kay baad israaeelee banee-yaaqaan kay kuon say ravaana ho kar mauseera pahunchay. vahaan haaroon faut hua. usay dafan karnay kay baad us ka beta ileeazar us kee jagah imaam bana. ⁷phir vah aagay safar kartay kartay judjooda, phir yutbaata pahunchay jahaan naheren hain.

⁸un dinon men rabb nay laavee kay qabeelay ko alag karkay usay rabb kay ahd kay sandooq ko utha kar lay jaanay, rabb kay huzoor khidmat karnay aur us kay naam say barkat denay kee zimmaadaaree dee. aaj tak yah un kee zimmaadaaree rahee hai. ⁹is vajah say laaviyon ko deegar qabeelon kee tarah na hissa na meeraas milee. rabb tera khuda khud un kee meeraas hai. us nay khud unhen yah farmaaya hai.)

¹⁰jab main nay doosree martaba 40 din aur raat pahaad par guzaaray to rabb nay is dafa bhee meree sunee aur tujhay halaak na karnay par aamaada hua. ¹¹us nay kaha, “ja, qaum kee raahanumaaee kar taaki vah ja kar us mulk par qabza karen jis ka vaada main nay qasam kha kar un kay baapdaada say kiya tha.”

rabb ka khauf

¹²ai israaeel, ab meree baat sun! rabb tera khuda tujh say kya taqaaza karta hai? sirf yah ki too us ka khauf maanay, us kee tamaam raahon par chalay, usay piyaar karay, apnay pooray dil-o-jaan say us kee khidmat kare ¹³aur us kay tamaam ahkaam par amal karay. aaj main unhen tujhay teree behatree kay liyay day raha hoon.

¹⁴poora aasmaan, zameen aur jo kuchh us par hai, sab ka maalik rabb tera khuda hai. ¹⁵to bhee us nay teray baapdaada par hee apnee khaas shafqat ka izhaar karkay un say muhabbat kee. aur us nay tumhen chun kar doosree tamaam qaumon par tarjeeh dee jaisa ki aaj zaahir hai. ¹⁶khatna us kee qaum ka nishaan hai, lekin dhyaan rakho ki vah na sirf zaahiree balki baatinee bhee ho. aainda ad na jaao.

¹⁷kyoonki rabb tumhaara khuda khudaaon ka khuda aur rabon ka rabb hai. vah azeem aur zoraavar khuda hai jis say sab khauf khaatay hain. vah jaanibdaaree naheen karta aur rishvat naheen leta. ¹⁸vah yateemon aur bevaaon ka insaaf karta hai. vah pardesee say piyaar karta aur usay khuraak aur poshaak muhayya karta hai. ¹⁹tum bhee un kay saath muhabbat say pesh aao, kyoonki tum bhee misr men pardesee thay.

²⁰rabb apnay khuda ka khauf maan aur us kee khidmat kar. us say lipta rah aur usee kay naam kee qasam kha. ²¹vahee tera fakhar hai. vah tera khuda hai jis nay vah tamaam azeem aur daraaaunay kaam kiay jo too nay khud dekhay. ²²jab teray baapdaada misr gaay thay to 70 afraad thay. aur ab rabb teray khuda nay tujhay sitaaron kee maanind beshumaar bana diya hai.