Istisna 1

moosa israaeeliyon say mukhaatib hota hai

¹is kitaab men vah baaten darj hain jo moosa nay tamaam israaeeliyon say kaheen jab vah darya-ay-yardan kay mashriqee kinaaray par biyaabaan men thay. vah yardan kee vaadee men soof kay qareeb thay. ek taraf faaraan shaher tha aur doosree taraf tofal, laaban, haseeraat aur deezaheb kay shaher thay. ²agar adom kay pahaadee ilaaqay say ho kar jaaen to horib yaanee seena pahaad say qaadis-barneea tak ka safar 11 din men tai kiya ja sakta hai.

³israaeeliyon ko misr say niklay 40 saal ho gaay thay. is saal kay gyaaraven maah kay pahelay din moosa nay unhen sab kuchh bataaya jo rabb nay usay unhen bataanay ko kaha tha. ⁴us vaqt vah amoriyon kay baadshaah seehon ko shikast day chuka tha jis ka daar-ul-hakoomat hasbon tha. basan kay baadshaah oj par bhee fatah haasil ho chukee thee jis kee hukoomat kay markaz astaaraat aur idraee thay.

⁵vahaan, darya-ay-yardan kay mashriqee kinaaray par jo moaab kay ilaaqay men tha moosa allaah kee shareeat kee tashreeh karnay laga. us nay kaha,

⁶jab tum horib yaanee seena pahaad kay paas thay to rabb hamaaray khuda nay ham say kaha, “tum kaafee der say yahaan thaheray huay ho. ⁷ab is jagah ko chhod kar aagay mulk-ay-kan’aan kee taraf badho. amoriyon kay pahaadee ilaaqay aur un kay pados kee qaumon kay paas jaao jo yardan kay maidaanee ilaaqay men aabaad hain. pahaadee ilaaqay men, maghrib kay nishebee pahaadee ilaaqay men, junoob kay dasht-ay-najab men, saahilee ilaaqay men, mulk-ay-kan’aan men aur lubnaan men darya-ay-furaat tak chalay jaao. ⁸main nay tumhen yah mulk day diya hai. ab ja kar us par qabza kar lo. kyoonki rabb nay qasam kha kar tumhaaray baapdaada ibraaheem, ishaaq aur yaaqoob say vaada kiya tha ki main yah mulk tumhen aur tumhaaree aulaad ko doonga.”

raahanuma muqarrar kiay gae

⁹us vaqt main nay tum say kaha, “main akela tumhaaree raahanumaaee karnay kee zimmaadaaree naheen utha sakta. ¹⁰rabb tumhaaray khuda nay tumhaaree taadaad itnee badha dee hai ki aaj tum aasmaan kay sitaaron kee maanind beshumaar ho. ¹¹aur rabb tumhaaray baapdaada ka khuda karay ki tumhaaree taadaad mazeed hazaar guna badh jaaay. vah tumhen vah barkat day jis ka vaada us nay kiya hai. ¹²lekin main akela hee tumhaara bojh uthaanay aur jhagdon ko niptaanay kee zimmaadaaree naheen utha sakta. ¹³is liyay apnay har qabeelay men say kuchh aisay daanishmand aur samajhdaar aadmee chun lo jin kee liyaaqat ko log maantay hain. phir main unhen tum par muqarrar karoonga.”

¹⁴yah baat tumhen pasand aaee. ¹⁵tum nay apnay men say aisay raahanuma chun liyay jo daanishmand thay aur jin kee liyaaqat ko log maantay thay. phir main nay unhen hazaar hazaar, sau sau aur pachaas pachaas mardon par muqarrar kiya. yoon vah qabeelon kay nigahbaan ban gaay. ¹⁶us vaqt main nay un qaaziyon say kaha, “adaalat kartay vaqt har ek kee baat ghaur say sun kar ghairjaanibdaar faislay karna, chaahay do israaeelee fareeq ek doosray say jhagda kar rahay hon ya muaamala kisee israaeelee aur pardesee kay darmiyaan ho. ¹⁷adaalat kartay vaqt jaanibdaaree na karna. chhotay aur baday kee baat sun kar donon kay saath ek jaisa sulook karna. kisee say mat darna, kyoonki allaah hee nay tumhen adaalat karnay kee zimmaadaaree dee hai. agar kisee muaamalay men faisla karna tumhaaray liyay mushkil ho to usay mujhay pesh karo. phir main hee us ka faisla karoonga.” ¹⁸us vaqt main nay tumhen sab kuchh bataaya jo tumhen karna tha.

mulk-ay-kan’aan men jaasoos

¹⁹ham nay vaisa hee kiya jaisa rabb nay hamen kaha tha. ham horib say ravaana ho kar amoriyon kay pahaadee ilaaqay kee taraf badhay. safar kartay kartay ham us vasee aur haulnaak registaan men say guzar gaay jisay tum nay dekh liya hai. aakhirkaar ham qaadis-barneea pahunch gaay. ²⁰vahaan main nay tum say kaha, “tum amoriyon kay pahaadee ilaaqay tak pahunch gaay ho jo rabb hamaara khuda hamen denay vaala hai. ²¹dekh, rabb teray khuda nay tujhay yah mulk day diya hai. ab ja kar us par qabza kar lay jis tarah rabb teray baapdaada kay khuda nay tujhay bataaya hai. mat darna aur bedil na ho jaana!”

²²lekin tum sab meray paas aaay aur kaha, “kyoon na ham jaanay say pahelay kuchh aadmee bhejen jo mulk kay haalaat darayaaft karen aur vaapas a kar hamen us raastay kay baaray men bataaen jis par hamen jaana hai aur un shaheron kay baaray men ittila den jin kay paas ham pahunchengay.” ²³yah baat mujhay pasand aaee. main nay is kaam kay liyay har qabeelay kay ek aadmee ko chun kar bhej diya. ²⁴jab yah baarah aadmee pahaadee ilaaqay men ja kar vaadee-ay-iskaal men pahunchay to us kee tafteesh kee. ²⁵phir vah mulk ka kuchh phal lay kar laut aaay aur hamen mulk kay baaray men ittila day kar kaha, “jo mulk rabb hamaara khuda hamen denay vaala hai vah achchha hai.”

²⁶lekin tum jaana naheen chaahatay thay balki sarkashee karkay rabb apnay khuda ka hukm na maana. ²⁷tum nay apnay khaimon men budabudaatay huay kaha, “rabb ham say nafrat rakhta hai. vah hamen misr say nikaal laaya hai taaki hamen amoriyon kay haathon halaak karvaaay. ²⁸ham kahaan jaaen? hamaaray bhaaiyon nay hamen bedil kar diya hai. vah kahetay hain, ‘vahaan kay log ham say taaqatvar aur daraazaqad hain. un kay baday baday shaheron kee faseelen aasmaan say baaten kartee hain. vahaan ham nay anaaq kee aulaad bhee dekhee jo deo hain’.”

²⁹main nay kaha, “na ghabraao aur na un say khauf khaao. ³⁰rabb tumhaara khuda tumhaaray aagay aagay chalta hua tumhaaray liyay ladega. tum khud dekh chukay ho ki vah kis tarah misr ³¹aur registaan men tumhaaray liyay lada. yahaan bhee vah aisa hee karega. too khud gavaah hai ki biyaabaan men pooray safar kay dauraan rabb tujhay yoon uthaaay phira jis tarah baap apnay betay ko uthaaay phirta hai. is tarah chaltay chaltay tum yahaan tak pahunch gaay.” ³²is kay baavujood tum nay rabb apnay khuda par bharosa na rakha. ³³tum nay yah baat nazar’andaaz kee ki vah safar kay dauraan raat kay vaqt aag aur din kay vaqt baadal kee soorat men tumhaaray aagay aagay chalta raha taaki tumhaaray liyay khaimay lagaanay kee jagahen maaloom karay aur tumhen raasta dikhaaay.

³⁴jab rabb nay tumhaaree yah baaten suneen to usay ghussa aaya aur us nay qasam kha kar kaha, ³⁵“is shareer nasal ka ek mard bhee us achchhay mulk ko naheen dekhega agarchi main nay qasam kha kar tumhaaray baapdaada say vaada kiya tha ki main usay unhen doonga. ³⁶sirf kaalib bin yafunna usay dekhega. main usay aur us kee aulaad ko vah mulk doonga jis men us nay safar kiya hai, kyoonki us nay pooray taur par rabb kee pairvee kee.”

³⁷tumhaaree vajah say rabb mujh say bhee naaraaz hua aur kaha, “too bhee us men daakhil naheen hoga. ³⁸lekin tera madadgaar yashooa bin noon daakhil hoga. us kee hausalaaafzaaee kar, kyoonki vah mulk par qabza karnay men israaeel kee raahanumaaee karega.” ³⁹tum say rabb nay kaha, “tumhaaray bachchay jo abhee achchhay aur buray men imtiyaaz naheen kar saktay, vahee mulk men daakhil hongay, vahee bachchay jin kay baaray men tum nay kaha ki dushman unhen mulk-ay-kan’aan men chheen lengay. unhen main mulk doonga, aur vah us par qabza karengay. ⁴⁰lekin tum khud aagay na badho. peechhay mud kar dubaara registaan men baher-ay-qulzum kee taraf safar karo.”

⁴¹tab tum nay kaha, “ham nay rabb ka gunaah kiya hai. ab ham mulk men ja kar ladengay, jis tarah rabb hamaaray khuda nay hamen hukm diya hai.” chunaanchay yah sochtay huay ki us pahaadee ilaaqay par hamla karna aasaan hoga, har ek musallah hua. ⁴²lekin rabb nay mujh say kaha, “unhen bataana ki vahaan jang karnay kay liyay na jaao, kyoonki main tumhaaray saath naheen hoonga. tum apnay dushmanon kay haathon shikast khaaogay.”

⁴³main nay tumhen yah bataaya, lekin tum nay meree na sunee. tum nay sarkashee karkay rabb ka hukm na maana balki maghroor ho kar pahaadee ilaaqay men daakhil huay. ⁴⁴vahaan kay amoree baashinday tumhaara saamna karnay niklay. vah shahed kee makkhiyon kay ghol kee tarah tum par toot paday aur tumhaara taaqqub karkay tumhen saeer say hurma tak maartay gaay.

⁴⁵tab tum vaapas a kar rabb kay saamnay zaar-o-qataar ronay lagay. lekin us nay tavajjuh na dee balki tumhen nazar’andaaz kiya. ⁴⁶is kay baad tum bahut dinon tak qaadis-barneea men rahay.