Daanyaal 9

daanyaal apnee qaum kee shafaaat karta hai

¹daara bin akhasverus baabal kay takht par baith gaya tha. is maadee baadshaah ²kee hukoomat kay pahelay saal men main, daanyaal nay paak navishton kee tahqeeq kee. main nay khaaskar us par ghaur kiya jo rabb nay yaramiyaah nabee kee maarifat farmaaya tha. us kay mutaabiq yarooshalam kee tabaahashuda haalat 70 saal tak qaaim rahegee. ³chunaanchay main nay rabb apnay khuda kee taraf rujoo kiya taaki apnee dua aur iltijaaon say us kee marzee darayaaft karoon. saath saath main nay roza rakha, taat ka libaas odh liya aur apnay sar par raakh daal lee. ⁴main nay rabb apnay khuda say dua karkay iqraar kiya,

“ai rabb, too kitna azeem aur maheeb khuda hai! jo bhee tujhay piyaar karta aur teray ahkaam kay taabay raheta hai us kay saath too apna ahd qaaim rakhta aur us par meharbaanee karta hai. ⁵lekin ham nay gunaah aur badee kee hai. ham bedeen aur baaghee ho kar teray ahkaam aur hidaayaat say bhatak gaay hain. ⁶ham nay nabiyon kee naheen sunee, haalaanki teray khaadim tera naam lay kar hamaaray baadshaahon, buzurgon, baapdaada balki mulk kay tamaam baashindon say mukhaatib huay. ⁷ai rabb, too haq-ba-jaanib hai jabki is din ham sab sharmasaar hain, khwaah yahoodaah, yarooshalam ya israaeel kay hon, khwaah qareeb ya un tamaam doordaraaz mamaalik men rahetay hon jahaan too nay hamen hamaaree bevafaaee kay sabab say muntashir kar diya hai. kyoonki ham teray hee saath bevafa rahay hain. ⁸ai rabb, ham apnay baadshaahon, buzurgon aur baapdaada samet bahut sharmasaar hain, kyoonki ham nay tera hee gunaah kiya hai.

⁹lekin rabb hamaara khuda raheem hai aur khushee say muaaf karta hai, go ham us say sarkash huay hain. ¹⁰na ham rabb apnay khuda kay taabay rahay, na us kay un ahkaam kay mutaabiq zindagee guzaaree jo us nay hamen apnay khaadimon yaanee nabiyon kee maarifat diay thay. ¹¹tamaam israaeel teree shareeat kee khilaafvarzee karkay saheeh raah say bhatak gaya hai, koee teree sunnay kay liyay tayyaar naheen tha.

allaah kay khaadim moosa nay shareeat men qasam kha kar laanten bhejee theen, aur ab yah laanten ham par naazil huee hain, is liyay ki ham nay tera gunaah kiya. ¹²jo kuchh too nay hamaaray aur hamaaray hukmaraanon kay khilaaf farmaaya tha vah poora hua, aur ham par badee aafat aaee. aasmaan talay kaheen bhee aisee museebat naheen aaee jis tarah yarooshalam ko pesh aaee hai. ¹³moosa kee shareeat men mazkoor har vah laanat ham par naazil huee jo naafaramaanon par bhejee gaee hai. to bhee na ham nay apnay gunaahon ko chhoda, na teree sachchaaee par dhyaan diya, haalaanki is say ham rabb apnay khuda ka ghazab thanda kar saktay thay. ¹⁴isee liyay rabb ham par aafat laanay say na jhijka. kyoonki jo kuchh bhee rabb hamaara khuda karta hai us men vah haq-ba-jaanib hota hai. lekin ham nay us kee na sunee.

¹⁵ai rabb hamaaray khuda, too badee qudrat ka izhaar karkay apnee qaum ko misr say nikaal laaya. yoon teray naam ko vah izzat-o-jalaal mila jo aaj tak qaaim raha hai. is kay baavujood ham nay gunaah kiya, ham say bedeen harkaten sarzad huee hain. ¹⁶ai rabb, too apnay munsifaana kaamon men vafaadaar raha hai! ab bhee is ka lihaaz kar aur apnay sakht ghazab ko apnay shaher aur muqaddas pahaad yarooshalam say door kar! yarooshalam aur teree qaum gird-o-navaah kee qaumon kay liyay mazaaq ka nishaana ban gaee hai, go ham maantay hain ki yah hamaaray gunaahon aur hamaaray baapdaada kee khataaon kee vajah say ho raha hai.

¹⁷ai hamaaray khuda, ab apnay khaadim kee duaaon aur iltijaaon ko sun! ai rabb, apnee hee khaatir apnay tabaahashuda maqdis par apnay chiharay ka meharbaan noor chamka. ¹⁸ai meray khuda, kaan laga kar meree sun! apnee aankhen khol! us shaher kay khandaraat par nazar kar jis par teray hee naam ka thappa laga hai. ham is liyay tujh say iltijaaen naheen kar rahay ki ham raastbaaz hain balki is liyay ki too nihaayat meharbaan hai. ¹⁹ai rabb, hamaaree sun! ai rabb, hamen muaaf kar! ai meray khuda, apnee khaatir der na kar, kyoonki teray shaher aur qaum par teray hee naam ka thappa laga hai.”

70 hafton ka bhed

²⁰yoon main dua karta aur apnay aur apnee qaum israaeel kay gunaahon ka iqraar karta gaya. main khaaskar apnay khuda kay muqaddas pahaad yarooshalam kay liyay rabb apnay khuda kay huzoor faryaad kar raha tha.

²¹main dua kar hee raha tha ki jibraaeel jisay main nay doosree roya men dekha tha meray paas a pahuncha. rabb kay ghar men shaam kee qurbaanee pesh karnay ka vaqt tha. main bahut hee thak gaya tha. ²²us nay mujhay samjha kar kaha, “ai daanyaal, ab main tujhay samajh aur baseerat denay kay liyay aaya hoon. ²³joon hee too dua karnay laga to allaah nay javaab diya, kyoonki too us kee nazar men giraanqdar hai. main tujhay yah javaab sunaanay aaya hoon. ab dhyaan say roya ko samajh lay! ²⁴teree qaum aur teray muqaddas shaher kay liyay 70 haftay muqarrar kiay gaay hain taaki utnay men jaraaim aur gunaahon ka silsila khatm kiya jaaay, qusoor ka kaffaara diya jaaay, abdee raastee qaaim kee jaaay, roya aur peshgoee kee tasdeeq kee jaaay aur muqaddastareen jagah ko masah karkay makhsoos-o-muqaddas kiya jaaay.

²⁵ab jaan lay aur samajh lay ki yarooshalam ko dubaara taameer karnay ka hukm diya jaaega, lekin mazeed saat haftay guzarengay, phir hee allaah ek hukmaraan ko is kaam kay liyay chun kar masah karega. tab shaher ko 62 hafton kay andar chaukon aur khandaqon samet naay siray say taameer kiya jaaega, go is dauraan vah kaafee museebat say dochaar hoga. ²⁶in 62 hafton kay baad allaah kay masah kiay gaay banday ko qatl kiya jaaega, aur us kay paas kuchh bhee naheen hoga. us vaqt ek aur hukmaraan kee qaum a kar shaher aur maqdis ko tabaah karegee. ikhtitaam sailaab kee soorat men aaega, aur aakhir tak jang jaaree rahegee, aisee tabaahee hogee jis ka faisla ho chuka hai. ²⁷ek haftay tak yah hukmaraan mut’addid logon ko ek ahd kay tahet rahenay par majboor karega. is haftay kay beech men vah zabah aur ghalla kee qurbaaniyon ka intizaam band karega aur maqdis kay ek taraf vah kuchh khada karega jo behuramtee aur tabaahee ka baais hai. lekin tabaah karnay vaalay ka khaatma bhee muqarrar kiya gaya hai, aur aakhirkaar vah bhee tabaah ho jaaega.”