Daanyaal 8

daanyaal kee doosree roya : mendha aur bakraa

¹belshazzar baadshaah kay daur-ay-hukoomat kay teesray saal men main, daanyaal nay ek aur roya dekhee. ²roya men main sooba ailaam kay qil’aaband shaher sosan kee naher oolaaee kay kinaaray par khada tha. ³jab main nay apnee nigaah uthaaee to kinaaray par meray saamnay hee ek mendha khada tha. us kay do baday seeng thay jin men say ek ziyaada bada tha. lekin vah doosray kay baad hee bada ho gaya tha. ⁴meree nazron kay saamnay mendha maghrib, shimaal aur junoob kee taraf seeng maarnay laga. na koee jaanvar us ka muqaabla kar saka, na koee us kay qaaboo say bacha saka. jo jee chaahay karta tha aur hotay hotay bahut bada ho gaya.

⁵main us par ghaur hee kar raha tha ki achaanak maghrib say aatay huay ek bakra dikhaaee diya. us kee aankhon kay darmiyaan zabardast seeng tha, aur vah zameen ko chhuay baghair chal raha tha. pooree duniya ko uboor karke ⁶vah do seengon vaalay us mendhay kay paas pahunch gaya jo main nay naher kay kinaaray khada dekha tha. baday taish men a kar vah us par toot pada. ⁷main nay dekha ki vah mendhay kay paheloo say takra gaya. baday ghussay men us nay usay yoon maara ki mendhay kay donon seeng tukday tukday ho gaay. is bebas haalat men mendha us ka muqaabla na kar saka. bakray nay usay zameen par patakh kar paaon talay kuchal diya. koee naheen tha jo mendhay ko bakray kay qaaboo say bachaaay.

⁸bakra nihaayat taaqatvar ho gaya. lekin taaqat kay urooj par hee us ka bada seeng toot gaya, aur us kee jagah mazeed chaar zabardast seeng nikal aaay jin ka rukh aasmaan kee chaar simton kee taraf tha. ⁹un kay ek seeng men say ek aur seeng nikal aaya jo ibtida men chhota tha. lekin vah junoob, mashriq aur khoobsoorat mulk israaeel kee taraf badhtay badhtay bahut taaqatvar ho gaya. ¹⁰phir vah aasmaanee fauj tak badh gaya. vahaan us nay kuchh faujiyon aur sitaaron ko zameen par phaink kar paaon talay kuchal diya. ¹¹vah badhtay badhtay aasmaanee fauj kay kamaandar tak bhee pahunch gaya aur usay un qurbaaniyon say maheroom kar diya jo usay rozaana pesh kee jaatee theen. saath saath seeng nay us kay maqdis kay maqaam ko tabaah kar diya. ¹²us kee fauj say rozaana kee qurbaaniyon kee behuramtee huee, aur seeng nay sachchaaee ko zameen par patakh diya. jo kuchh bhee us nay kiya us men vah kaamyaab raha.

¹³phir main nay do muqaddas hastiyon ko aapas men baat kartay huay suna. ek nay poochha, “is roya men pesh kiay gaay haalaat kab tak qaaim rahengay, yaanee jo kuchh rozaana kee qurbaaniyon kay saath ho raha hai, yah tabaahakun behuramtee aur yah baat ki maqdis ko paamaal kiya ja raha hai?” ¹⁴doosray nay javaab men mujhay bataaya, “haalaat 2,300 shaamon aur subhon tak yoon hee rahengay. is kay baad maqdis ko naay siray say makhsoos-o-muqaddas kiya jaaega.”

¹⁵main dekhay huay vaaqiaat ko samajhnay kee koshish kar hee raha tha ki koee meray saamnay khada hua jo mard jaisa lag raha tha. ¹⁶saath saath main nay naher oolaaee kee taraf say kisee shakhs kee aavaaz sunee jis nay kaha, “ai jibraaeel, is aadmee ko roya ka matlab bata day.” ¹⁷farishta meray qareeb aaya to main sakht ghabra kar munh kay bal gir gaya. lekin vah bola, “ai aadamzaad, jaan lay ki is roya ka taalluq aakhiree zamaanay say hai.”

¹⁸jab vah mujh say baat kar raha tha to main madahosh haalat men munh kay bal pada raha. ab farishtay nay mujhay chhoo kar paaon par khada kiya. ¹⁹vah bola, “main tujhay samjha deta hoon ki us aakhiree zamaanay men kya kuchh pesh aaega jab allaah ka ghazab naazil hoga. kyoonki roya ka taalluq aakhiree zamaanay say hai. ²⁰do seengon kay jis mendhay ko too nay dekha vah maadee aur faars kay baadshaahon kee numaaindagee karta hai. ²¹lambay baalon ka bakra yoonaan ka baadshaah hai. us kee aankhon kay darmiyaan laga bada seeng yoonaanee shahenashaahee ka pahela baadshaah hai. ²²too nay dekha ki yah seeng toot gaya aur us kee jagah chaar seeng nikal aaay. is ka matlab hai ki pahelee baadshaahee say chaar aur nikal aaengee . lekin chaaron kee taaqat pahelee kee nisbat kam hogee. ²³un kee hukoomat kay aakhiree ayyaam men bevafaaon kee badakirdaaree urooj tak pahunch gaee hogee.

us vaqt ek gustaakh aur saazish ka maahir baadshaah takht par baithega. ²⁴vah bahut taaqatvar ho jaaega, lekin yah us kee apnee taaqat naheen hogee. vah hairat’angez barbaadee ka baais banega, aur jo kuchh bhee karega us men kaamyaab hoga. vah zoraavaron aur muqaddas qaum ko tabaah karega. ²⁵apnee samajh aur fareb kay zareeay vah kaamyaab rahega. tab vah mutakabbir ho jaaega. jab log apnay aap ko mahfooz samjhengay to vah unhen maut kay ghaat utaarega. aakhirkaar vah hukmaraanon kay hukmaraan kay khilaaf bhee uthega. lekin vah paash paash ho jaaega, alabatta insaanee haath say naheen.

²⁶ai daanyaal, shaamon aur subhon kay baaray men jo roya tujh par zaahir huee vah sachchee hai. lekin filahaal usay posheeda rakh, kyoonki yah vaaqiaat abhee pesh naheen aaengay balki bahut dinon kay guzar jaanay kay baad hee.”

²⁷is kay baad main, daanyaal nidhaal ho kar kaee dinon tak beemaar raha. phir main utha aur baadshaah kee khidmat men dubaara apnay faraaiz ada karnay laga. main roya say sakht pareshaan tha, aur koee naheen tha jo mujhay us ka matlab bata sakay.