Daanyaal 7

daanyaal kee pahelee roya : chaar jaanvar

¹shaah-ay-baabal belshazzar kee hukoomat kay pahelay saal men daanyaal nay khwaab men roya dekhee. jaag uthnay par us nay vah kuchh qalamband kar liya jo khwaab men dekha tha. zail men is ka bayaan hai,

²raat kay vaqt main, daanyaal nay roya men dekha ki aasmaan kee chaaron havaaen zor say baday samundar ko mutlaatim kar rahee hain. ³phir chaar baday jaanvar samundar say nikal aaay jo ek doosray say mukhtalif thay.

⁴pahela jaanvar sherbabar jaisa tha, lekin us kay uqaab kay par thay. meray dekhtay hee us kay paron ko noch liya gaya aur usay utha kar insaan kee tarah pichhlay do pairon par khada kiya gaya. usay insaan ka dil bhee mil gaya.

⁵doosra jaanvar reechh jaisa tha. us ka ek paheloo khada kiya gaya tha, aur vah apnay daanton men teen pasliyaan pakday huay tha. usay bataaya gaya, “uth, jee bhar kar gosht kha lay!”

⁶phir main nay teesray jaanvar ko dekha. vah cheetay jaisa tha, lekin us kay chaar sar thay. usay hukoomat karnay ka ikhtiyaar diya gaya.

⁷is kay baad raat kee roya men ek chautha jaanvar nazar aaya jo daraaauna, haulnaak aur nihaayat hee taaqatvar tha. apnay lohay kay baday baday daanton say vah sab kuchh khaata aur choor choor karta tha. jo kuchh bach jaata usay vah paaon talay raund deta tha. yah jaanvar deegar jaanvaron say mukhtalif tha. us kay das seeng thay. ⁸main seengon par ghaur hee kar raha tha ki ek aur chhota sa seeng un kay darmiyaan say nikal aaya. pahelay das seengon men say teen ko noch liya gaya taaki usay jagah mil jaaay. chhotay seeng par insaanee aankhen theen, aur us ka munh badee badee baaten karta tha.

⁹main dekh hee raha tha ki takht lagaaay gaay aur qadeem-ul-ayyaam baith gaya. us ka libaas barf jaisa safed aur us kay baal khaalis oon kee maanind thay. jis takht par vah baitha tha vah aag kee tarah bhadak raha tha, aur us par sholaazan pahiay lagay thay. ¹⁰us kay saamnay say aag kee naher bah kar nikal rahee thee. beshumaar hastiyaan us kee khidmat kay liyay khadee theen. log adaalat kay liyay baith gaay, aur kitaaben kholee gaeen.

¹¹main nay ghaur kiya ki chhota seeng badee badee baaten kar raha hai. main dekhta raha to chauthay jaanvar ko qatl kiya gaya. us ka jism tabaah hua aur bhadaktee aag men phainka gaya. ¹²deegar teen jaanvaron kee hukoomat un say chheen lee gaee, lekin unhen kuchh der kay liyay zinda rahenay kee ijaazat dee gaee.

¹³raat kee roya men main nay yah bhee dekha ki aasmaan kay baadlon kay saath saath koee a raha hai jo ibn-ay-aadam sa lag raha hai. jab qadeem-ul-ayyaam kay qareeb pahuncha to us kay huzoor laaya gaya. ¹⁴usay saltanat, izzat aur baadshaahee dee gaee, aur har qaum, ummat aur zabaan kay afraad nay us kee parastish kee. us kee hukoomat abdee hai aur kabhee khatm naheen hogee. us kee baadshaahee kabhee tabaah naheen hogee.

¹⁵main, daanyaal sakht pareshaan hua, kyoonki roya say mujh par dahshat chha gaee thee. ¹⁶is liyay main nay vahaan khaday kisee kay paas ja kar us say guzaarish kee ki vah mujhay in tamaam baaton ka matlab bataaay. us nay mujhay in ka matlab bataaya, ¹⁷“chaar baday jaanvar chaar saltanaten hain jo zameen say nikal kar qaaim ho jaaengee. ¹⁸lekin allaah t’aala kay muqaddaseen ko haqeeqee baadshaahee milegee, vah baadshaahee jo abad tak haasil rahegee.”

¹⁹main chauthay jaanvar kay baaray men mazeed jaanna chaahata tha, us jaanvar kay baaray men jo deegar jaanvaron say itna mukhtalif aur itna haulnaak tha. kyoonki us kay daant lohay aur panjay peetal kay thay, aur vah sab kuchh khaata aur choor choor karta tha. jo bach jaata usay vah paaon talay raund deta tha. ²⁰main us kay sar kay das seengon aur un men say niklay huay chhotay seeng kay baaray men bhee mazeed jaanna chaahata tha. kyoonki chhotay seeng kay nikalnay par das seengon men say teen nikal kar gir gaay, aur yah seeng badh kar saath vaalay seengon say kaheen bada nazar aaya. us kee aankhen theen, aur us ka munh badee badee baaten karta tha. ²¹roya men main nay dekha ki chhotay seeng nay muqaddaseen say jang karkay unhen shikast dee. ²²lekin phir qadeem-ul-ayyaam a pahuncha aur allaah t’aala kay muqaddaseen kay liyay insaaf qaaim kiya. phir vah vaqt aaya jab muqaddaseen ko baadshaahee haasil huee.

²³jis say main nay roya ka matlab poochha tha us nay kaha, “chauthay jaanvar say muraad zameen par ek chauthee baadshaahee hai jo deegar tamaam baadashaahiyon say mukhtalif hogee. vah tamaam duniya ko kha jaaegee, usay raund kar choor choor kar degee. ²⁴das seengon say muraad das baadshaah hain jo is baadshaahee say nikal aaengay. un kay baad ek aur baadshaah aaega jo guzray baadshaahon say mukhtalif hoga aur teen baadshaahon ko khaak men mila dega. ²⁵vah allaah t’aala kay khilaaf kufr bakega, aur muqaddaseen us kay tahet pistay rahengay, yahaan tak ki vah eedon kay muqarrara auqaat aur shareeat ko tabdeel karnay kee koshish karega. muqaddaseen ko ek arsay, do urson aur aadhay arsay kay liyay us kay havaalay kiya jaaega.

²⁶lekin phir log us kee adaalat kay liyay baith jaaengay. us kee hukoomat us say chheen lee jaaegee, aur vah mukammal taur par tabaah ho jaaegee. ²⁷tab aasmaan talay kee tamaam saltanaton kee baadashaahat, saltanat aur azmat allaah t’aala kee muqaddas qaum kay havaalay kar dee jaaegee. allaah t’aala kee baadshaahee abdee hogee, aur tamaam hukmaraan us kee khidmat karkay us kay taabay rahengay.”

²⁸mujhay mazeed kuchh naheen bataaya gaya. main, daanyaal in baaton say bahut pareshaan hua, aur mera chihara maand pad gaya, lekin main nay muaamala apnay dil men mahfooz rakha.