Daanyaal 6

daanyaal sherbabar kee maand men

¹daara nay saltanat kay tamaam soobon par 120 soobedaar mut’ayyin karnay ka faisla kiya. ²un par teen vazeer muqarrar thay jin men say ek daanyaal tha. gavarnar un kay saamnay javaabdih thay taaki baadshaah ko nuqsaan na pahunchay. ³jald hee pata chala ki daanyaal doosray vazeeron aur soobedaaron par sabqat rakhta tha, kyoonki vah ghairmaamoolee zihaanat ka maalik tha. nateejatan baadshaah nay usay pooree saltanat par muqarrar karnay ka iraada kiya. ⁴jab deegar vazeeron aur soobedaaron ko yah baat maaloom huee to vah daanyaal par ilzaam lagaanay ka bahaana dhoondnay lagay. lekin vah apnee zimmaadaariyon ko nibhaanay men itna qaabil-ay-etimaad tha ki vah naakaam rahay. kyoonki na vah rishvatkhor tha, na kisee kaam men sust.

⁵aakhirkaar vah aadmee aapas men kahenay lagay, “is tareeqay say hamen daanyaal par ilzaam lagaanay ka mauqa naheen milega. lekin ek baat hai jo ilzaam ka baais ban saktee hai yaanee us kay khuda kee shareeat.” ⁶tab vah guroh kee soorat men baadshaah kay saamnay haazir huay aur kahenay lagay, “daara baadshaah abad tak jeetay rahen! ⁷saltanat kay tamaam vazeer, gavarnar, soobedaar, musheer aur muntazim aapas men mashvra karkay muttafiq huay hain ki aglay 30 din kay dauraan sab ko sirf baadshaah say dua karnee chaahiay. baadshaah ek farmaan saadir karen ki jo bhee kisee aur maabood ya insaan say iltija karay usay sheron kee maand men phainka jaaega. dhyaan dena chaahiay ki sab hee is par amal karen. ⁸ai baadshaah, guzaarish hai ki aap yah farmaan zaroor saadir karen balki likh kar us kee tasdeeq bhee karen taaki usay tabdeel na kiya ja sakay. tab vah maadiyon aur faarsiyon kay qavaaneen ka hissa ban kar mansookh naheen kiya ja sakega.”

⁹daara baadshaah maan gaya. us nay farmaan likhva kar us kee tasdeeq kee.

¹⁰jab daanyaal ko maaloom hua ki farmaan saadir hua hai to vah seedha apnay ghar men chala gaya. chhat par ek kamra tha jis kee khulee khidkiyon ka rukh yarooshalam kee taraf tha. is kamray men daanyaal rozaana teen baar apnay ghutnay tek kar dua aur apnay khuda kee sitaaish karta tha. ab bhee us nay yah silsila jaaree rakha. ¹¹joon hee daanyaal apnay khuda say dua aur iltija kar raha tha to us kay dushmanon nay guroh kee soorat men ghar men ghus kar usay yah kartay huay paaya.

¹²tab vah baadshaah kay paas gaay aur usay shaahee farmaan kee yaad dilaaee, “kya aap nay farmaan saadir naheen kiya tha ki aglay 30 din kay dauraan sab ko sirf baadshaah say dua karnee hai, aur jo kisee aur maabood ya insaan say iltija karay usay sheron kee maand men phainka jaaega?” baadshaah nay javaab diya, “jee, yah farmaan qaaim hai balki maadiyon aur faarsiyon kay qavaaneen ka hissa hai jo mansookh naheen kiya ja sakta.” ¹³unhon nay kaha, “ai baadshaah, daanyaal jo yahoodaah kay jilaavatanon men say hai na aap kee parva karta, na us farmaan kee jis kee aap nay likh kar tasdeeq kee. abhee tak vah rozaana teen baar apnay khuda say dua karta hai.”

¹⁴yah sun kar baadshaah ko badee diqqat mahsoos huee. poora din vah sochta raha ki main daanyaal ko kis tarah bachaaoon. sooraj kay ghuroob honay tak vah usay chhudaanay kay liyay koshaan raha. ¹⁵lekin aakhirkaar vah aadmee guroh kee soorat men dubaara baadshaah kay huzoor aaay aur kahenay lagay, “baadshaah ko yaad rahay ki maadiyon aur faarsiyon kay qavaaneen kay mutaabiq jo bhee farmaan baadshaah saadir karay usay tabdeel naheen kiya ja sakta.” ¹⁶chunaanchay baadshaah nay hukm diya ki daanyaal ko pakad kar sheron kee maand men phainka jaaay. aisa hee hua. baadshaah bola, “ai daanyaal, jis khuda kee ibaadat tum bilaanaagha kartay aaay ho vah tumhen bachaaay.” ¹⁷phir maand kay munh par patthar rakha gaya, aur baadshaah nay apnee muhar aur apnay badon kee muharen us par lagaaeen taaki koee bhee usay khol kar daanyaal kee madad na karay.

¹⁸is kay baad baadshaah shaahee mahel men vaapas chala gaya aur pooree raat roza rakhay huay guzaaree. na kuchh us ka dil bahelaanay kay liyay us kay paas laaya gaya, na usay neend aaee.

¹⁹jab pau phatnay lagee to vah uth kar sheron kee maand kay paas gaya. ²⁰us kay qareeb pahunch kar baadshaah nay ghamgeen aavaaz say pukaara, “ai zinda khuda kay banday daanyaal, kya tumhaaray khuda jis kee tum bilaanaagha ibaadat kartay rahay ho tumhen sheron say bacha saka?” ²¹daanyaal nay javaab diya, “baadshaah abad tak jeetay rahen! ²²meray khuda nay apnay farishtay ko bhej diya jis nay sheron kay munh ko band kiay rakha. unhon nay mujhay koee bhee nuqsaan na pahunchaaya, kyoonki allaah kay saamnay main bequsoor hoon. baadshaah salaamat kay khilaaf bhee mujh say jurm naheen hua.”

²³yah sun kar baadshaah aapay men na samaaya. us nay daanyaal ko maand say nikaalnay ka hukm diya. jab usay khainch kar nikaala gaya to maaloom hua ki usay koee bhee nuqsaan naheen pahuncha. yoon usay allaah par bharosa rakhnay ka ajr mila. ²⁴lekin jin aadmiyon nay daanyaal par ilzaam lagaaya tha un ka bura anjaam hua. baadshaah kay hukm par unhen un kay baal-bachchon samet sheron kee maand men phainka gaya. maand kay farsh par girnay say pahelay hee sher un par jhapat paday aur unhen phaad kar un kee haddiyon ko chaba liya.

²⁵phir daara baadshaah nay saltanat kee tamaam qaumon, ummaton aur ahel-ay-zabaan ko zail ka paighaam bheja,

“sab kee salaamatee ho! ²⁶mera farmaan suno! laazim hai ki meree saltanat kee har jagah log daanyaal kay khuda kay saamnay tharatharaaen aur us ka khauf maanen. kyoonki vah zinda khuda aur abad tak qaaim hai. na kabhee us kee baadshaahee tabaah, na us kee hukoomat khatm hogee. ²⁷vahee bachaata aur najaat deta hai, vahee aasmaan-o-zameen par ilaahee nishaan aur mojizay dikhaata hai. usee nay daanyaal ko sheron kay qabzay say bachaaya.”

²⁸chunaanchay daanyaal ko daara baadshaah aur faars kay baadshaah khoras kay daur-ay-hukoomat men bahut kaamyaabee haasil huee.