Daanyaal 5

belshazzar kee ziyaafat

¹ek din belshazzar baadshaah apnay badon kay hazaar afraad kay liyay zabardast ziyaafat karkay un kay saath mai peenay laga. ²nashay men us nay hukm diya, “sonay-chaandee kay jo piyaalay meray baap nabookadnazzar nay yarooshalam men vaaqay allaah kay ghar say chheen liyay thay vah meray paas lay aao taaki main apnay badon, beeviyon aur daashtaaon kay saath un say mai pee loon.” ³chunaanchay yarooshalam men vaaqay allaah kay ghar say lootay huay piyaalay us kay paas laaay gaay, aur sab un say mai pee kar ⁴sonay, chaandee, peetal, lohay, lakdee aur patthar kay apnay buton kee tamjeed karnay lagay.

⁵usee lamhay shaahee mahel kay haal men insaanee haath kee ungaliyaan nazar aaeen jo shamaadaan kay muqaabil deevaar kay palastar par kuchh likhnay lageen. jab baadshaah nay haath ko likhtay huay dekhaa ⁶to us ka chihara dar kay maaray faq ho gaya. us kee kamar kay jod dheelay pad gaay, aur us kay ghutnay ek doosray say takraanay lagay.

⁷vah zor say cheekha, “jaadoogaron, nujoomiyon aur ghaibdaanon ko bulaao!” baabal kay daanishmand pahunchay to vah bola, “jo bhee likhay huay alfaaz padh kar mujhay un ka matlab bata sakay usay arghvaanee rang ka libaas pahenaaya jaaega. us kay galay men sonay kee zanjeer pahenaaee jaaegee, aur hukoomat men sirf do log us say baday hongay.”

⁸baadshaah kay daanishmand qareeb aaay, lekin na vah likhay huay alfaaz padh sakay, na un ka matlab baadshaah ko bata sakay. ⁹tab belshazzar baadshaah nihaayat pareshaan hua, aur us ka chihara mazeed maand pad gaya. us kay shurfa bhee sakht pareshaan ho gaay.

¹⁰baadshaah aur shurfa kee baaten malika tak pahunch gaeen to vah ziyaafat kay haal men daakhil huee. kahenay lagee, “baadshaah abad tak jeetay rahen! ghabraanay ya maand padnay kee kya zaroorat hai? ¹¹aap kee baadshaahee men ek aadmee hai jis men muqaddas devtaaon kee rooh hai. aap kay baap kay daur-ay-hukoomat men saabit hua ki vah devtaaon kee see baseerat, fahem aur hikmat ka maalik hai. aap kay baap nabookadnazzar baadshaah nay usay qismat ka haal bataanay vaalon, jaadoogaron, nujoomiyon aur ghaibdaanon par muqarrar kiya tha, ¹²kyoonki us men ghairmaamoolee zihaanat, ilm aur samajh paaee jaatee hai. vah khwaabon kee taabeer karnay aur paheliyaan aur pecheeda maslay hal karnay men maahir saabit hua hai. aadmee ka naam daanyaal hai, go baadshaah nay us ka naam beltashazzar rakha tha. mera mashvra hai ki aap usay bulaaen, kyoonki vah aap ko zaroor likhay huay alfaaz ka matlab bataaega.”

¹³yah sun kar baadshaah nay daanyaal ko fauran bula liya. jab pahuncha to baadshaah us say mukhaatib hua, “kya tum vah daanyaal ho jisay meray baap nabookadnazzar baadshaah yahoodaah kay jilaavatanon kay saath yahoodaah say yahaan laaay thay? ¹⁴suna hai ki devtaaon kee rooh tum men hai, ki tum baseerat, fahem aur ghairmaamoolee hikmat kay maalik ho. ¹⁵daanishmandon aur nujoomiyon ko meray saamnay laaya gaya hai taaki deevaar par likhay huay alfaaz padh kar mujhay un ka matlab bataaen, lekin vah naakaam rahay hain. ¹⁶ab mujhay bataaya gaya ki tum khwaabon kee taabeer aur pecheeda maslon ko hal karnay men maahir ho. agar tum yah alfaaz padh kar mujhay in ka matlab bata sako to tumhen arghvaanee rang ka libaas pahenaaya jaaega. tumhaaray galay men sonay kee zanjeer pahenaaee jaaegee, aur hukoomat men sirf do log tum say baday hongay.”

¹⁷daanyaal nay javaab diya, “mujhay ajr na den, apnay tuhfay kisee aur ko deejiay. main baadshaah ko yah alfaaz aur in ka matlab vaisay hee bata doonga. ¹⁸ai baadshaah, jo saltanat, azmat aur shaan-o-shaukat aap kay baap nabookadnazzar ko haasil thee vah allaah t’aala say milee thee. ¹⁹usee nay unhen vah azmat ata kee thee jis kay baais tamaam qaumon, ummaton aur zabaanon kay afraad un say dartay aur un kay saamnay kaamptay thay. jisay vah maar daalna chaahatay thay usay maara gaya, jisay vah zinda chhodna chaahatay thay vah zinda raha. jisay vah sarfaraaz karna chaahatay thay vah sarfaraaz hua aur jisay past karna chaahatay thay vah past hua. ²⁰lekin vah phool kar hadd say ziyaada maghroor ho gaay, is liyay unhen takht say utaara gaya, aur vah apnee qadar-o-manjilat kho baithay. ²¹unhen insaanee sangat say nikaal kar bhagaaya gaya, aur un ka dil jaanvar kay dil kee maanind ban gaya. un ka rahen-sahen janglee gadhon kay saath tha, aur vah bailon kee tarah ghaas charnay lagay. un ka jism aasmaan kee os say tar raheta tha. yah haalat us vaqt tak rahee jab tak ki unhon nay iqraar na kiya ki allaah t’aala ka insaanee saltanaton par ikhtiyaar hai, vah apnee hee marzee say logon ko un par muqarrar karta hai.

²²ai belshazzar baadshaah, go aap un kay betay hain aur is baat ka ilm rakhtay hain to bhee aap farotan na rahe ²³balki aasmaan kay maalik kay khilaaf uth khaday ho gaay hain. aap nay hukm diya ki us kay ghar kay piyaalay aap kay huzoor laaay jaaen, aur aap nay apnay badon, beeviyon aur daashtaaon kay saath unhen mai peenay kay liyay istemaal kiya. saath saath aap nay apnay devtaaon kee tamjeed kee go vah chaandee, sonay, peetal, lohay, lakdee aur patthar kay but hee hain. na vah dekh saktay, na sun ya samajh saktay hain. lekin jis khuda kay haath men aap kee jaan aur aap kee tamaam raahen hain us ka ehatiraam aap nay naheen kiya.

²⁴isee liyay us nay haath bhej kar deevaar par yah alfaaz likhva diay. ²⁵aur likha yah hai, ‘minay minay taqel-o-farseen.’

²⁶‘minay’ ka matlab ‘gina hua’ hai. yaanee aap kee saltanat kay din ginay huay hain, allaah nay unhen ikhtitaam tak pahunchaaya hai.

²⁷‘taqel’ ka matlab ‘tola hua’ hai. yaanee allaah nay aap ko tol kar maaloom kiya hai ki aap ka vazan kam hai.

²⁸‘farseen’ ka matlab ‘taqseem hua’ hai. yaanee aap kee baadshaahee ko maadiyon aur faarsiyon men taqseem kiya jaaega.”

²⁹daanyaal khaamosh hua to belshazzar nay hukm diya ki usay arghvaanee rang ka libaas pahenaaya jaaay aur us kay galay men sonay kee zanjeer pahenaaee jaaay. saath saath elaan kiya gaya ki ab say hukoomat men sirf do aadmee daanyaal say baday hain.

³⁰usee raat shaah-ay-baabal belshazzar ko qatl kiya gaya, ³¹aur daara maadee takht par baith gaya. us kee umr 62 saal thee.