Daanyaal 4

nabookadnazzar kay doosray khwaab kee taabeer

¹nabookadnazzar duniya kee tamaam qaumon, ummaton aur zabaanon kay afraad ko zail ka paighaam bhejta hai,

sab kee salaamatee ho! ²main nay sab ko un ilaahee nishaanaat aur mojizaat say aagaah karnay ka faisla kiya hai jo allaah t’aala nay meray liyay kiay hain. ³us kay nishaan kitnay azeem, us kay mojizaat kitnay zabardast hain! us kee baadshaahee abdee hai, us kee saltanat nasal-dar-nasal qaaim rahetee hai.

⁴main, nabookadnazzar khushee aur sukoon say apnay mahel men raheta tha. ⁵lekin ek din main ek khwaab dekh kar bahut ghabra gaya. main palang par leta hua tha ki itnee haulnaak baaten aur royaaen meray saamnay say guzreen ki main dar gaya. ⁶tab main nay hukm diya ki baabal kay tamaam daanishmand meray paas aaen taaki meray liyay khwaab kee taabeer karen. ⁷qismat ka haal bataanay vaalay, jaadoogar, najoomee aur ghaibdaan pahunchay to main nay unhen apna khwaab bayaan kiya, lekin vah us kee taabeer karnay men naakaam rahay.

⁸aakhirkaar daanyaal meray huzoor aaya jis ka naam beltashazzar rakha gaya hai (meray devta ka naam bel hai). daanyaal men muqaddas devtaaon kee rooh hai. usay bhee main nay apna khwaab sunaaya. ⁹main bola, “ai beltashazzar, tum jaadoogaron kay sardaar ho, aur main jaanta hoon ki muqaddas devtaaon kee rooh tum men hai. koee bhee bhed tumhaaray liyay itna mushkil naheen hai ki tum usay khol na sako. ab mera khwaab sun kar us kee taabeer karo!

¹⁰palang par letay huay main nay roya men dekha ki duniya kay beech men nihaayat lamba sa darakht laga hai. ¹¹yah darakht itna ooncha aur tanaavar hota gaya ki aakhirkaar us kee chotee aasmaan tak pahunch gaee aur vah duniya kee intiha tak nazar aaya. ¹²us kay pattay khoobsoorat thay, aur vah bahut phal laata tha. us kay saay men janglee jaanvar panaah letay, us kee shaakhon men parinday basera kartay thay. har insaan-o-haivaan ko us say khuraak miltee thee.

¹³main abhee darakht ko dekh raha tha ki ek muqaddas farishta aasmaan say utar aaya. ¹⁴us nay baday zor say aavaaz dee, ‘darakht ko kaat daalo! us kee shaakhen tod do, us kay pattay jhaad do, us ka phal bikher do! jaanvar us kay saay men say nikal kar bhaag jaaen, parinday us kee shaakhon say ud jaaen. ¹⁵lekin us ka mudh jadon samet zameen men rahenay do. usay lohay aur peetal kee zanjeeron men jakad kar khulay maidaan kee ghaas men chhod do. vahaan usay aasmaan kee os tar karay, aur jaanvaron kay saath zameen kee ghaas hee us ko naseeb ho. ¹⁶saat saal tak us ka insaanee dil jaanvar kay dil men badal jaaay. ¹⁷kyoonki muqaddas farishton nay fatwa diya hai ki aisa hee ho taaki insaan jaan lay ki allaah t’aala ka ikhtiyaar insaanee saltanaton par hai. vah apnee hee marzee say logon ko un par muqarrar karta hai, khwaah vah kitnay zaleel kyoon na hon.’

¹⁸main, nabookadnazzar nay khwaab men yah kuchh dekha. ai beltashazzar, ab mujhay is kee taabeer pesh karo. meree saltanat kay tamaam daanishmand is men naakaam rahay hain. lekin tum yah kar paaogay, kyoonki tum men muqaddas devtaaon kee rooh hai.”

¹⁹tab beltashazzar yaanee daanyaal kay rongtay khaday ho gaay, aur jo khayaalaat ubhar aaay un say us par kaafee der tak sakht dahshat taaree rahee. aakhirkaar baadshaah bola, “ai beltashazzar, khwaab aur us ka matlab tujhay itna dahshatzada na karay.” beelatashazar nay javaab diya, “meray aaqa, kaash khwaab kee baaten aap kay dushmanon aur mukhaalifon ko pesh aaen! ²⁰aap nay ek darakht dekha jo itna ooncha aur tanaavar ho gaya ki us kee chotee aasmaan tak pahunchee aur vah pooree duniya ko nazar aaya. ²¹us kay pattay khoobsoorat thay, aur vah bahut sa phal laata tha. us kay saay men janglee jaanvar panaah letay, us kee shaakhon men parinday basera kartay thay. har insaan-o-haivaan ko us say khuraak miltee thee.

²²ai baadshaah, aap hee yah darakht hain! aap hee baday aur taaqatvar ho gaay hain balki aap kee azmat badhtay badhtay aasmaan say baaten karnay lagee, aap kee saltanat duniya kee intiha tak phail gaee hai. ²³ai baadshaah, is kay baad aap nay ek muqaddas farishtay ko dekha jo aasmaan say utar kar bola, darakht ko kaat daalo! usay tabaah karo, lekin us ka mudh jadon samet zameen men rahenay do. usay lohay aur peetal kee zanjeeron men jakad kar khulay maidaan kee ghaas men chhod do. vahaan usay aasmaan kee os tar karay, aur jaanvaron kay saath zameen kee ghaas hee us ko naseeb ho. saat saal yoon hee guzar jaaen.

²⁴ai baadshaah, is ka matlab yah hai, allaah t’aala nay meray aaqa baadshaah kay baaray men faisla kiya hai ²⁵ki aap ko insaanee sangat say nikaal kar bhagaaya jaaega. tab aap janglee jaanvaron kay saath rah kar bailon kee tarah ghaas charengay aur aasmaan kee os say tar ho jaaengay. saat saal yoon hee guzarengay. phir aakhirkaar aap iqraar karengay ki allaah t’aala ka insaanee saltanaton par ikhtiyaar hai, vah apnee hee marzee say logon ko un par muqarrar karta hai. ²⁶lekin khwaab men yah bhee kaha gaya ki darakht kay mudh ko jadon samet zameen men chhoda jaaay. is ka matlab hai ki aap kee saltanat taaham qaaim rahegee. jab aap etiraaf karengay ki tamaam ikhtiyaar aasmaan kay haath men hai to aap ko saltanat vaapas milegee. ²⁷ai baadshaah, ab meharbaanee say mera mashvra qabool farmaaen. insaaf karkay aur mazloomon par karam farma kar apnay gunaahon ko door karen. shaayad aisa karnay say aap kee khushhaalee qaaim rahay.”

²⁸daanyaal kee har baat nabookadnazzar ko pesh aaee. ²⁹baarah maheenay kay baad baadshaah baabal men apnay shaahee mahel kee chhat par tahel raha tha. ³⁰tab vah kahenay laga, “lo, yah azeem shaher dekho jo main nay apnee rihaaish kay liyay taameer kiya hai! yah sab kuchh main nay apnee hee zabardast quvvat say bana liya hai taaki meree shaan-o-shaukat mazeed badhtee jaaay.”

³¹baadshaah yah baat bol hee raha tha ki aasmaan say aavaaz sunaaee dee, “ai nabookadnazzar baadshaah, sun! saltanat tujh say chheen lee gaee hai. ³²tujhay insaanee sangat say nikaal kar bhagaaya jaaega, aur too janglee jaanvaron kay saath rah kar bail kee tarah ghaas charega. saat saal yoon hee guzar jaaengay. phir aakhirkaar too iqraar karega ki allaah t’aala ka insaanee saltanaton par ikhtiyaar hai, vah apnee hee marzee say logon ko un par muqarrar karta hai.”

³³joon hee aavaaz band huee to aisa hee hua. nabookadnazzar ko insaanee sangat say nikaal kar bhagaaya gaya, aur vah bailon kee tarah ghaas charnay laga. us ka jism aasmaan kee os say tar hota raha. hotay hotay us kay baal uqaab kay paron jitnay lambay aur us kay naakhun parinday kay changul kee maanind huay. ³⁴lekin saat saal guzarnay kay baad main, nabookadnazzar apnee aankhon ko aasmaan kee taraf utha kar dubaara hosh men aaya. tab main nay allaah t’aala kee tamjeed kee, main nay us kee hamd-o-sana kee jo hamesha tak zinda hai. us kee hukoomat abdee hai, us kee saltanat nasal-dar-nasal qaaim rahetee hai. ³⁵us kee nisbat duniya kay tamaam baashinday sifar kay baraabar hain. vah aasmaanee fauj aur duniya kay baashindon kay saath jo jee chaahay karta hai. usay kuchh karnay say koee naheen rok sakta, koee us say javaab talab karkay poochh naheen sakta, “too nay kya kiya?”

³⁶joon hee main dubaara hosh men aaya to mujhay pahelee shaahee izzat aur shaan-o-shaukat bhee az sar-ay-nau haasil huee. meray musheer aur shurfa dubaara meray saamnay haazir huay, aur mujhay dubaara takht par bithaaya gaya. pahelay kee nisbat meree azmat men izaafa hua.

³⁷ab main, nabookadnazzar aasmaan kay baadshaah kee hamd-o-sana karta hoon. main usee ko jalaal deta hoon, kyoonki jo kuchh bhee vah karay vah saheeh hai. us kee tamaam raahen munsifaana hain. jo maghroor ho kar zindagee guzaartay hain unhen vah past karnay kay qaabil hai.