Daanyaal 3

sonay kay but kee pooja karnay ka hukm

¹ek din nabookadnazzar nay sonay ka mujassma banvaaya. us kee oonchaaee 90 fut aur chaudaaee 9 fut thee. us nay hukm diya ki but ko sooba baabal kay maidaan banaam doora men khada kiya jaaay. ²phir us nay tamaam soobedaaron, gavarnaron, muntazimon, musheeron, khazaanachiyon, jajon, majistreton, aur soobon kay deegar tamaam baday baday sarkaaree mulaazimon ko paighaam bheja ki mujassmay kee makhsoosiyat kay liyay a kar jama ho jaao. ³chunaanchay sab but kee makhsoosiyat kay liyay jama ho gaay. jab sab us kay saamnay khaday the ⁴to shaahee naqeeb nay buland aavaaz say elaan kiya,

“ai mukhtalif qaumon, ummaton aur zabaanon kay logo, suno! baadshaah farmaata hai, ⁵‘joon hee narsinga, shahenaaee, santoor, sarod, ood, been aur deegar tamaam saaz bajengay to laazim hai ki sab aundhay munh ho kar baadshaah kay khaday kiay gaay sonay kay but ko sijda karen. ⁶jo bhee sijda na karay usay fauran bhadaktee bhattee men phainka jaaega’.”

⁷chunaanchay joon hee saaz bajnay lagay to mukhtalif qaumon, ummaton aur zabaanon kay tamaam log munh kay bal ho kar nabookadnazzar kay khaday kiay gaay but ko sijda karnay lagay.

⁸us vaqt kuchh najoomee baadshaah kay paas a kar yahoodiyon par ilzaam lagaanay lagay. ⁹vah bolay, “baadshaah salaamat abad tak jeetay rahen! ¹⁰ai baadshaah, aap nay farmaaya, ‘joon hee narsinga, shahenaaee, santoor, sarod, ood, been aur deegar tamaam saaz bajengay to laazim hai ki sab aundhay munh ho kar baadshaah kay khaday kiay gaay is sonay kay but ko sijda karen. ¹¹jo bhee sijda na karay usay bhadaktee bhattee men phainka jaaega’ ¹²lekin kuchh yahoodee aadmee hain jo aap kee parva hee naheen kartay, haalaanki aap nay unhen sooba baabal kee intizaamiya par muqarrar kiya tha. yah aadmee banaam sadrak, meesak aur abadnajoo na aap kay devtaaon kee pooja kartay, na sonay kay us but kee parastish kartay hain jo aap nay khada kiya hai.”

¹³yah sun kar nabookadnazzar aapay say baahar ho gaya. us nay seedha sadrak, meesak aur abadnajoo ko bulaaya. jab pahunche ¹⁴to bola, “ai sadrak, meesak aur abadnajoo, kya yah saheeh hai ki na tum meray devtaaon kee pooja kartay, na meray khaday kiay gaay mujassmay kee parastish kartay ho? ¹⁵main tumhen ek aakhiree mauqa deta hoon. saaz dubaara bajengay to tumhen munh kay bal ho kar meray banvaaay huay mujassmay ko sijda karna hai. agar tum aisa na karo to tumhen seedha bhadaktee bhattee men phainka jaaega. tab kaun sa khuda tumhen meray haath say bacha sakega?”

¹⁶sadrak, meesak aur abadnajoo nay javaab diya, “ai nabookadnazzar, is muaamalay men hamen apna difa karnay kee zaroorat naheen hai. ¹⁷jis khuda kee khidmat ham kartay hain vah hamen bacha sakta hai, khwaah hamen bhadaktee bhattee men kyoon na phainka jaaay. ai baadshaah, vah hamen zaroor aap kay haath say bachaaega. ¹⁸lekin agar vah hamen na bhee bachaaay to bhee aap ko maaloom ho ki na ham aap kay devtaaon kee pooja karengay, na aap kay khaday kiay gaay sonay kay mujassmay kee parastish karengay.”

¹⁹yah sun kar nabookadnazzar aag-bagoola ho gaya. sadrak, meesak aur abadnajoo kay saamnay us ka chihara bigad gaya aur us nay hukm diya ki bhattee ko maamool kee nisbat saat guna ziyaada garm kiya jaaay. ²⁰phir us nay kaha ki behtareen faujiyon men say chand ek sadrak, meesak aur abadnajoo ko baandh kar bhadaktee bhattee men phaink den. ²¹teenon ko baandh kar bhadaktee bhattee men phainka gaya. un kay choghay, paajaamay aur topiyaan utaaree na gaeen. ²²choonki baadshaah nay bhattee ko garm karnay par khaas zor diya tha is liyay aag itnee tez huee ki jo faujee sadrak, meesak aur abadnajoo ko lay kar bhattee kay munh tak chadh gaay vah fauran nazar-ay-aatish ho gaay. ²³un kay qaidee bandhee huee haalat men sholaazan aag men gir gaay.

²⁴achaanak nabookadnazzar baadshaah chaunk utha. us nay uchhal kar apnay musheeron say poochha, “ham nay to teen aadmiyon ko baandh kar bhattee men phainkavaaya ki naheen?” unhon nay javaab diya, “jee, ai baadshaah.” ²⁵vah bola, “to phir yah kya hai? mujhay chaar aadmee aag men idhar udhar phirtay huay nazar a rahay hain. na vah bandhay huay hain, na unhen nuqsaan pahunch raha hai. chautha aadmee devtaaon ka beta sa lag raha hai.”

²⁶nabookadnazzar jaltee huee bhattee kay munh kay qareeb gaya aur pukaara, “ai sadrak, meesak aur abadnajoo, ai allaah t’aala kay bando, nikal aao! idhar aao.” tab sadrak, meesak aur abadnajoo aag say nikal aaay. ²⁷soobedaar, gavarnar, muntazim aur shaahee musheer un kay gird jama huay to dekha ki aag nay un kay jismon ko nuqsaan naheen pahunchaaya. baalon men say ek bhee jhulas naheen gaya tha, na un kay libaas aag say mut’assir huay thay. aag aur dhuen kee boo tak naheen thee.

²⁸tab nabookadnazzar bola, “sadrak, meesak aur abadnajoo kay khuda kee tamjeed ho jis nay apnay farishtay ko bhej kar apnay bandon ko bachaaya. unhon nay us par bharosa rakh kar baadshaah kay hukm kee naafarmaanee kee. apnay khuda kay siva kisee aur kee khidmat ya parastish karnay say pahelay vah apnee jaan ko denay kay liyay tayyaar thay. ²⁹chunaanchay mera hukm suno! sadrak, meesak aur abadnajoo kay khuda kay khilaaf kufr bakna tamaam qaumon, ummaton aur zabaanon kay afraad kay liyay sakht mana hai. jo bhee aisa karay usay tukday tukday kar diya jaaega aur us kay ghar ko kachray ka dher banaaya jaaega. kyoonki koee bhee devta is tarah naheen bacha sakta.” ³⁰phir baadshaah nay teenon aadmiyon ko sooba baabal men sarfaraaz kiya.