Daanyaal 2

nabookadnazzar ka khwaab

¹apnee hukoomat kay doosray saal men nabookadnazzar nay khwaab dekha. khwaab itna haulnaak tha ki vah ghabra kar jaag utha. ²us nay hukm diya ki tamaam qismat ka haal bataanay vaalay, jaadoogar, afsoongar aur najoomee meray paas a kar khwaab ka matlab bataaen. jab vah haazir hue ³to baadshaah bola, “main nay ek khwaab dekha hai jo mujhay bahut pareshaan kar raha hai. ab main us ka matlab jaanna chaahata hoon.”

⁴nujoomiyon nay araamee zabaan men javaab diya, “baadshaah salaamat apnay khaadimon kay saamnay yah khwaab bayaan karen to ham us kee taabeer karengay.”

⁵lekin baadshaah bola, “naheen, tum hee mujhay vah kuchh bataao aur us kee taabeer karo jo main nay khwaab men dekha. agar tum yah na kar sako to main hukm doonga ki tumhen tukday tukday kar diya jaaay aur tumhaaray ghar kachray kay dher ho jaaen. yah mera musammam iraada hai. ⁶lekin agar tum mujhay vah kuchh bata kar us kee taabeer karo jo main nay khwaab men dekha to main tumhen achchhay tuhfay aur in’aam doonga, neez tumhaaree khaas izzat karoonga. ab shuroo karo! mujhay vah kuchh bataao aur us kee taabeer karo jo main nay khwaab men dekha.”

⁷ek baar phir unhon nay minnat kee, “baadshaah apnay khaadimon kay saamnay apna khwaab bataaen to ham zaroor us kee taabeer karengay.”

⁸baadshaah nay javaab diya, “mujhay saaf pata hai ki tum kya kar rahay ho! tum sirf taal-matol kar rahay ho, kyoonki tum samajh gaay ho ki mera iraada pakka hai. ⁹agar tum mujhay khwaab na bataao to tum sab ko ek hee saza dee jaaegee. kyoonki tum sab jhoot aur ghalat baaten pesh karnay par muttafiq ho gaay ho, yah ummeed rakhtay huay ki haalaat kisee vaqt badal jaaengay. mujhay khwaab bataao to mujhay pata chal jaaega ki tum mujhay us kee saheeh taabeer pesh kar saktay ho.”

¹⁰nujoomiyon nay etiraaz kiya, “duniya men koee bhee insaan vah kuchh naheen kar paata jo baadshaah maangtay hain. yah kabhee hua bhee naheen ki kisee baadshaah nay aisee baat kisee qismat ka haal bataanay vaalay, jaadoogar ya najoomee say talab kee, khwaah baadshaah kitna azeem kyoon na tha. ¹¹jis cheez ka taqaaza baadshaah kartay hain vah hadd say ziyaada mushkil hai. sirf devta hee yah baat baadshaah par zaahir kar saktay hain, lekin vah to insaan kay darmiyaan rahetay naheen.”

¹²yah sun kar baadshaah aag-bagoola ho gaya. baday ghussay men us nay hukm diya ki baabal kay tamaam daanishmandon ko saza-ay-maut dee jaaay. ¹³farmaan saadir hua ki daanishmandon ko maar daalna hai. chunaanchay daanyaal aur us kay doston ko bhee talaash kiya gaya taaki unhen saza-ay-maut den.

¹⁴shaahee muhaafizon ka afsar banaam aryook abhee daanishmandon ko maar daalnay kay liyay ravaana hua ki daanyaal badee hikmat aur mauqaashanaasee say us say mukhaatib hua. ¹⁵us nay afsar say poochha, “baadshaah nay itna sakht farmaan kyoon jaaree kiya?” aryook nay daanyaal ko saara muaamala bayaan kiya. ¹⁶daanyaal fauran baadshaah kay paas gaya aur us say darakhwaast kee, “zara mujhay kuchh muhalat deejiay taaki main baadshaah kay khwaab kee taabeer kar sakoon.” ¹⁷phir vah apnay ghar vaapas gaya aur apnay doston hananiyaah, meesaael aur azariyaah ko tamaam soorat-ay-haal sunaaee. ¹⁸vah bola, “aasmaan kay khuda say iltija karen ki vah mujh par rahem karay. minnat karen ki vah meray liyay bhed kholay taaki ham deegar daanishmandon kay saath halaak na ho jaaen.”

¹⁹raat kay vaqt daanyaal nay roya dekhee jis men us kay liyay bhed khola gaya. tab us nay aasmaan kay khuda kee hamd-o-sana kee,

²⁰“allaah kay naam kee tamjeed azal say abad tak ho. vahee hikmat aur quvvat ka maalik hai. ²¹vahee auqaat aur zamaanay badalnay deta hai. vahee baadshaahon ko takht par bitha deta aur unhen takht par say utaar deta hai. vahee daanishmandon ko daanaaee aur samajhdaaron ko samajh ata karta hai. ²²vahee gaheree aur posheeda baaten zaahir karta hai. jo kuchh andheray men chhupa raheta hai us ka ilm vah rakhta hai, kyoonki vah raushnee say ghira raheta hai. ²³ai meray baapdaada kay khuda, main teree hamd-o-sana karta hoon! too nay mujhay hikmat aur taaqat ata kee hai. jo baat ham nay tujh say maangee vah too nay ham par zaahir kee, kyoonki too nay ham par baadshaah ka khwaab zaahir kiya hai.”

²⁴phir daanyaal aryook kay paas gaya jisay baadshaah nay baabal kay daanishmandon ko saza-ay-maut denay kee zimmaadaaree dee thee. us nay us say darakhwaast kee, “baabal kay daanishmandon ko maut kay ghaat na utaaren, kyoonki main baadshaah kay khwaab kee taabeer kar sakta hoon. mujhay baadshaah kay huzoor pahuncha den to main unhen sab kuchh bata doonga.”

²⁵yah sun kar aryook bhaag kar daanyaal ko baadshaah kay huzoor lay gaya. vah bola, “mujhay yahoodaah kay jilaavatanon men say ek aadmee mil gaya jo baadshaah ko khwaab ka matlab bata sakta hai.” ²⁶tab nabookadnazzar nay daanyaal say jo beltashazzar kahelaata tha poochha, “kya tum mujhay vah kuchh bata saktay ho jo main nay khwaab men dekha? kya tum us kee taabeer kar saktay ho?”

²⁷daanyaal nay javaab diya, “jo bhed baadshaah jaanna chaahatay hain usay kholnay kee kunjee kisee bhee daanishmand, jaadoogar, qismat ka haal bataanay vaalay ya ghaibdaan kay paas naheen hotee. ²⁸lekin aasmaan par ek khuda hai jo bhedon ka matlab insaan par zaahir kar deta hai. usee nay nabookadnazzar baadshaah ko dikhaaya ki aanay vaalay dinon men kya kuchh pesh aaega. sotay vaqt aap nay khwaab men roya dekhee. ²⁹ai baadshaah, jab aap palang par letay huay thay to aap kay zahen men aanay vaalay dinon kay baaray men khayaalaat ubhar aaay. tab bhedon ko kholnay vaalay khuda nay aap par zaahir kiya ki aanay vaalay dinon men kya kuchh pesh aaega. ³⁰is bhed ka matlab mujh par zaahir hua hai, lekin is liyay naheen ki mujhay deegar tamaam daanishmandon say ziyaada hikmat haasil hai balki is liyay ki aap ko bhed ka matlab maaloom ho jaaay aur aap samajh saken ki aap kay zahen men kya kuchh ubhar aaya hai.

³¹ai baadshaah, roya men aap nay apnay saamnay ek bada aur lamba-tadanga mujassma dekha jo tezee say chamak raha tha. shakl-o-soorat aisee thee ki insaan kay rongtay khaday ho jaatay thay. ³²sar khaalis sonay ka tha jabki seena aur baazoo chaandee kay, pet aur raan peetal kee ³³aur pindaliyaan lohay kee theen. us kay paaon ka aadha hissa loha aur aadha hissa pakee huee mittee tha. ³⁴aap is manzar par ghaur hee kar rahay thay ki achaanak kisee pahaadee dhalaan say patthar ka bada tukda alag hua. yah baghair kisee insaanee haath kay hua. patthar dhadaam say mujassmay kay lohay aur mittee kay paaon par gir kar donon ko choor choor kar diya. ³⁵nateejay men poora mujassma paash paash ho gaya. jitna bhee loha, mittee, peetal, chaandee aur sona tha vah us bhoosay kee maanind ban gaya jo gaahatay vaqt baaqee rah jaata hai. hava nay sab kuchh yoon uda diya ki in cheezon ka naam-o-nishaan tak na raha. lekin jis patthar nay mujassmay ko gira diya vah zabardast pahaad ban kar itna badh gaya ki pooree duniya us say bhar gaee.

³⁶yahee baadshaah ka khwaab tha. ab ham baadshaah ko khwaab ka matlab bataatay hain. ³⁷ai baadshaah, aap shahenshaah hain. aasmaan kay khuda nay aap ko saltanat, quvvat, taaqat aur izzat say navaaza hai. ³⁸us nay insaan ko janglee jaanvaron aur parindon samet aap hee kay havaalay kar diya hai. jahaan bhee vah bastay hain us nay aap ko hee un par muqarrar kiya hai. aap hee mazkoora sonay ka sar hain. ³⁹aap kay baad ek aur saltanat qaaim ho jaaegee, lekin us kee taaqat aap kee saltanat say kam hogee. phir peetal kee ek teesree saltanat vujood men aaegee jo pooree duniya par hukoomat karegee. ⁴⁰aakhir men ek chauthee saltanat aaegee jo lohay jaisee taaqatvar hogee. jis tarah loha sab kuchh tod kar paash paash kar deta hai usee tarah vah deegar sab ko tod kar paash paash karegee. ⁴¹aap nay dekha ki mujassmay kay paaon aur ungaliyon men kuchh loha aur kuchh pakee huee mittee thee. is ka matlab hai, is saltanat kay do alag hissay hongay. lekin jis tarah khwaab men mittee kay saath loha milaaya gaya tha usee tarah chauthee saltanat men lohay kee kuchh na kuchh taaqat hogee. ⁴²khwaab men paaon kee ungaliyon men kuchh loha bhee tha aur kuchh mittee bhee. is ka matlab hai, chauthee saltanat ka ek hissa taaqatvar aur doosra naazuk hoga. ⁴³lohay aur mittee kee milaavat ka matlab hai ki go log aapas men shaadee karnay say ek doosray kay saath muttahid honay kee koshish karengay to bhee vah ek doosray say paivast naheen rahengay, bilkul usee tarah jis tarah loha mittee kay saath paivast naheen rah sakta.

⁴⁴jab yah baadshaah hukoomat karengay, un hee dinon men aasmaan ka khuda ek baadshaahee qaaim karega jo na kabhee tabaah hogee, na kisee doosree qaum kay haath men aaegee. yah baadshaahee in deegar tamaam saltanaton ko paash paash karkay khatm karegee, lekin khud abad tak qaaim rahegee. ⁴⁵yahee khwaab men us patthar ka matlab hai jis nay baghair kisee insaanee haath kay pahaadee dhalaan say alag ho kar mujassmay kay lohay, peetal, mittee, chaandee aur sonay ko paash paash kar diya. is tareeqay say azeem khuda nay baadshaah par zaahir kiya hai ki mustaqbil men kya kuchh pesh aaega. yah khwaab qaabil-ay-etimaad aur us kee taabeer saheeh hai.”

⁴⁶yah sun kar nabookadnazzar baadshaah nay aundhay munh ho kar daanyaal ko sijda kiya aur hukm diya ki daanyaal ko ghalla aur bakhoor kee qurbaaniyaan pesh kee jaaen. ⁴⁷daanyaal say us nay kaha, “yaqeenan, tumhaara khuda khudaaon ka khuda aur baadshaahon ka maalik hai. vah vaaqaee bhedon ko kholta hai, varna tum yah bhed meray liyay khol na paatay.” ⁴⁸nabookadnazzar nay daanyaal ko bada uhda aur mut’addid beshaqeemat tuhfay diay. us nay usay pooray sooba baabal ka gavarnar bana diya. saath saath daanyaal baabal kay tamaam daanishmandon par muqarrar hua. ⁴⁹us kee guzaarish par baadshaah nay sadrak, meesak aur abadnajoo ko sooba baabal kee intizaamiya par muqarrar kiya. daanyaal khud shaahee darbaar men haazir raheta tha.