Daanyaal 11

¹maadee baadshaah daara kee hukoomat kay pahelay saal say hee main meekaael kay saath khada raha hoon taaki us ko sahaara doon aur us kee hifaazat karoon.)

shimaalee aur junoobee saltanaton kee jangen

²ab main tujhay vah kuchh bataata hoon jo yaqeenan pesh aaega. faars men mazeed teen baadshaah takht par baithengay. is kay baad ek chautha aadmee baadshaah banega jo tamaam doosron say kaheen ziyaada daulatmand hoga. jab vah daulat kay baais taaqatvar ho jaaega to vah yoonaanee mamlakat say ladnay kay liyay sab kuchh jama karega.

³phir ek zoraavar baadshaah barpa ho jaaega jo badee quvvat say hukoomat karega aur jo jee chaahay karega. ⁴lekin joon hee vah barpa ho jaaay us kee saltanat tukday tukday ho kar ek shimaalee, ek junoobee, ek maghribee aur ek mashriqee hissay men taqseem ho jaaegee. na yah chaar hissay pahelee saltanat jitnay taaqatvar hongay, na baadshaah kee aulaad takht par baithegee, kyoonki us kee saltanat jad say ukhaad kar doosron ko dee jaaegee. ⁵junoobee mulk ka baadshaah taqviyat paaega, lekin us ka ek afsar kaheen ziyaada taaqatvar ho jaaega, us kee hukoomat kaheen ziyaada mazboot hogee.

⁶chand saal kay baad donon saltanaten muttahid ho jaaengee. ahd ko mazboot karnay kay liyay junoobee baadshaah kee betee kee shaadee shimaalee baadshaah say karaaee jaaegee. lekin na betee kaamyaab hogee, na us ka shauhar aur na us kee taaqat qaaim rahegee. un dinon men usay us kay saathiyon, baap aur shauhar samet dushman kay havaalay kiya jaaega. ⁷betee kee jagah us ka ek rishtedaar khada ho jaaega jo shimaalee baadshaah kee fauj par hamla karkay us kay qilaay men ghus aaega. vah un say nipat kar fatah paaegaa ⁸aur un kay dhaalay huay buton ko sonay-chaandee kee qeemtee cheezon samet chheen kar misr lay jaaega. vah kuchh saal tak shimaalee baadshaah ko naheen chhedega. ⁹phir shimaalee baadshaah junoobee baadshaah kay mulk men ghus aaega, lekin usay apnay mulk men vaapas jaana padega. ¹⁰is kay baad us kay betay jang kee tayyaariyaan karkay badee badee faujen jama karengay. un men say ek junoobee baadshaah kee taraf badh kar sailaab kee tarah junoobee mulk par aaegee aur ladtay ladtay us kay qilaay tak pahunchegee.

¹¹phir junoobee baadshaah taish men a kar shimaalee baadshaah say ladnay kay liyay niklega. shimaalee baadshaah javaab men badee fauj khadee karega, lekin vah shikast kha kar ¹²tabaah ho jaaegee. tab junoobee baadshaah ka dil gharoor say bhar jaaega, aur vah beshumaar afraad ko maut kay ghaat utaarega. to bhee vah taaqatvar naheen rahega. ¹³kyoonki shimaalee baadshaah ek aur fauj jama karega jo pahelee kee nisbat kaheen ziyaada badee hogee. chand saal kay baad vah is badee aur hathiyaaron say les fauj kay saath junoobee baadshaah say ladnay aaega.

¹⁴us vaqt bahut say log junoobee baadshaah kay khilaaf uth khaday hongay. teree qaum kay bedeen log bhee us kay khilaaf khaday ho jaaengay aur yoon roya ko poora karengay. lekin vah thokar kha kar gir jaaengay. ¹⁵phir shimaalee baadshaah a kar ek qil’aaband shaher ka muhaasara karega. vah pushta bana kar shaher par qabza kar lega. junoob kee faujen usay rok naheen sakengee, un kay behtareen dastay bhee bebas ho kar us ka saamna naheen kar sakengay. ¹⁶hamlaaaavar baadshaah jo jee chaahay karega, aur koee us ka saamna naheen kar sakega.

us vaqt vah khoobsoorat mulk israaeel men tik jaaega aur usay tabaah karnay ka ikhtiyaar rakhega. ¹⁷tab vah apnee pooree saltanat par qaaboo paanay ka mansooba baandhega. is zimn men vah junoobee baadshaah kay saath ahd baandh kar us say apnee betee kee shaadee karaaega taaki junoobee mulk ko tabaah karay, lekin befaaida. mansooba naakaam ho jaaega.

¹⁸is kay baad vah saahilee ilaaqon kee taraf rukh karega. un men say vah bahuton par qabza bhee karega, lekin aakhirkaar ek hukmaraan us kay gustaakhaana ravayyay ka khaatma karega, aur usay sharminda ho kar peechhay hatna padega. ¹⁹phir shimaalee baadshaah apnay mulk kay qilaon kay paas vaapas aaega, lekin itnay men thokar kha kar gir jaaega. tab us ka naam-o-nishaan tak naheen rahega.

²⁰us kee jagah ek baadshaah barpa ho jaaega jo apnay afsar ko shaandaar mulk israaeel men bhejega taaki vahaan say guzar kar logon say taiks lay. lekin thoday dinon kay baad vah tabaah ho jaaega. na vah kisee jhagday kay sabab say halaak hoga, na kisee jang men.

israaeelee qaum ka bada dushman

²¹us kee jagah ek qaabil-ay-mazammat aadmee khada ho jaaega. vah takht kay liyay muqarrar naheen hua hoga balki ghairmutvaqqay taur par a kar saazishon kay vaseelay say baadshaah banega. ²²mukhaalif faujen us par toot padengee, lekin vah sailaab kee tarah un par a kar unhen baha lay jaaega. vah aur ahd ka ek raees tabaah ho jaaengay. ²³kyoonki us kay saath ahd baandhnay kay baad vah usay fareb dega aur sirf thoday hee afraad kay zareeay iqtidaar haasil kar lega. ²⁴vah ghairmutvaqqay taur par daulatmand soobon men ghus kar vah kuchh karega jo na us kay baap aur na us kay baapdaada say kabhee sarzad hua hoga. loota hua maal aur milkiyat vah apnay logon men taqseem karega. vah qil’aaband shaheron par qabza karnay kay mansoobay bhee baandhega, lekin sirf mahdood arsay kay liyay.

²⁵phir vah himmat baandh kar aur poora zor laga kar badee fauj kay saath junoobee baadshaah say ladnay jaaega. javaab men junoobee baadshaah ek badee aur nihaayat hee taaqatvar fauj ko ladnay kay liyay tayyaar karega. to bhee vah shimaalee baadshaah ka saamna naheen kar paaega, is liyay ki us kay khilaaf saazishen kaamyaab ho jaaengee. ²⁶us kee rotee khaanay vaalay hee usay tabaah karengay. tab us kee fauj muntashir ho jaaegee, aur bahut say afraad maidaan-ay-jang men khet aaengay.

²⁷donon baadshaah muzaakraat kay liyay ek hee mez par baith jaaengay. vahaan donon jhoot boltay huay ek doosray ko nuqsaan pahunchaanay kay liyay koshaan rahengay. lekin kisee ko kaamyaabee haasil naheen hogee, kyoonki muqarrara aakhiree vaqt abhee naheen aana hai. ²⁸shimaalee baadshaah badee daulat kay saath apnay mulk men vaapas chala jaaega. raastay men vah muqaddas ahd kee qaum israaeel par dhyaan day kar usay nuqsaan pahunchaaega, phir apnay vatan vaapas jaaega.

²⁹muqarrara vaqt par vah dubaara junoobee mulk men ghus aaega, lekin pahelay kee nisbat is baar nateeja farq hoga. ³⁰kyoonki kitteem kay baheree jahaaz us kee mukhaalafat karengay, aur vah hausla haarega.

tab vah mud kar muqaddas ahd kee qaum par apna poora ghussa utaarega. jo muqaddas ahd ko tark karengay un par vah meharbaanee karega. ³¹us kay faujee a kar qil’aaband maqdis kee behuramtee karengay. vah rozaana kee qurbaaniyon ka intizaam band karkay tabaahee ka makrooh but khada karengay. ³²jo yahoodee pahelay say ahd kee khilaafvarzee kar rahay hongay unhen vah chiknee-chupdee baaton say murtad ho jaanay par aamaada karega. lekin jo log apnay khuda ko jaantay hain vah mazboot rah kar us kee mukhaalafat karengay. ³³qaum kay samajhdaar bahuton ko saheeh raah kee taaleem dengay. lekin kuchh arsay kay liyay vah talvaar, aag, qaid aur loot-maar kay baais daanvaandol rahengay. ³⁴us vaqt unhen thodee bahut madad haasil to hogee, lekin bahut say aisay log un kay saath mil jaaengay jo mukhlis naheen hongay. ³⁵samajhdaaron men say kuchh daanvaandol ho jaaengay taaki logon ko aazma kar aakhiree vaqt tak khaalis aur paak-saaf kiya jaaay. kyoonki muqarrara vaqt kuchh der kay baad aaega.

³⁶baadshaah jo jee chaahay karega. vah sarfaraaz ho kar apnay aap ko tamaam maaboodon say azeem qaraar dega. khudaaon kay khuda kay khilaaf vah naaqaabil-ay-bayaan kufr bakega. usay kaamyaabee bhee haasil hogee, lekin sirf us vaqt tak jab tak ilaahee ghazab thanda na ho jaaay. kyoonki jo kuchh muqarrar hua hai usay poora hona hai. ³⁷baadshaah na apnay baapdaada kay devtaaon kee parva karega, na aurton kay azeez devta kee, na kisee aur kee. kyoonki vah apnay aap ko sab par sarfaraaz karega. ³⁸in devtaaon kay bajaay vah qilaon kay devta kee pooja karega jis say us kay baapdaada vaaqif hee naheen thay. vah sonay-chaandee, javaahiraat aur qeemtee tuhfon say devta ka ehatiraam karega. ³⁹chunaanchay vah ajnabee maabood kee madad say mazboot qilaon par hamla karega. jo us kee hukoomat maanen un kee vah badee izzat karega, inhen bahuton par muqarrar karega aur un men ajr kay taur par zameen taqseem karega.

⁴⁰lekin phir aakhiree vaqt aaega. junoobee baadshaah jang men us say takaraaega, to javaab men shimaalee baadshaah rath, ghudsavaar aur mut’addid baheree jahaaz lay kar us par toot padega. tab vah bahut say mulkon men ghus aaega aur sailaab kee tarah sab kuchh gharq karkay aagay badhega. ⁴¹is dauraan vah khoobsoorat mulk israaeel men bhee ghus aaega. bahut say mamaalik shikast khaaengay, lekin adom aur moaab ammon kay markzee hissay samet bach jaaengay. ⁴²us vaqt us ka iqtidaar bahut say mamaalik par chha jaaega, misr bhee naheen bachega. ⁴³shimaalee baadshaah misr kee sonay-chaandee aur baaqee daulat par qabza karega, aur libiya aur ethopiya bhee us kay naqsh-ay-qadam par chalengay. ⁴⁴lekin phir mashriq aur shimaal kee taraf say afwaahen usay sadma pahunchaaengee, aur vah baday taish men a kar bahuton ko tabaah aur halaak karnay kay liyay niklega. ⁴⁵raastay men vah samundar aur khoobsoorat muqaddas pahaad kay darmiyaan apnay shaahee khaimay laga lega. lekin phir us ka anjaam aaega, aur koee us kee madad naheen karega.