Daanyaal 1

daanyaal aur us kay dost shaah-ay-baabal kay darbaar men

¹shaah-ay-yahoodaah yahooyaqeem kee saltanat kay teesray saal men shaah-ay-baabal nabookadnazzar nay yarooshalam a kar us ka muhaasara kiya. ²us vaqt rabb nay yahooyaqeem aur allaah kay ghar ka kaafee saamaan nabookadnazzar kay havaalay kar diya. nabookadnazzar nay yah cheezen mulk-ay-baabal men lay ja kar apnay devta kay mandir kay khazaanay men mahfooz kar deen.

³phir us nay apnay darbaar kay aala afsar ashpanaaz ko hukm diya, “yahoodaah kay shaahee khaandaan aur oonchay tabqay kay khaandaanon kee tafteesh karo. un men say kuchh aisay naujvaanon ko chun kar lay aao ⁴jo beaib, khoobsoorat, hikmat kay har lihaaz say samajhdaar, taaleemayaafta aur samajhnay men tez hon. gharaz yah aadmee shaahee mahel men khidmat karnay kay qaabil hon. unhen baabal kee zabaan likhnay aur bolnay kee taaleem do.” ⁵baadshaah nay muqarrar kiya ki rozaana unhen shaahee baavarcheekhaanay say kitna khaana aur mai milnee hai. teen saal kee tarbiyat kay baad unhen baadshaah kee khidmat kay liyay haazir hona tha.

⁶jab in naujvaanon ko chuna gaya to chaar aadmee un men shaamil thay jin kay naam daanyaal, hananiyaah, meesaael aur azariyaah thay. ⁷darbaar kay aala afsar nay un kay naay naam rakhay. daanyaal beltashazzar men badal gaya, hananiyaah sadrak men, meesaael meesak men aur azariyaah abadnajoo men.

⁸lekin daanyaal nay musammam iraada kar liya ki main apnay aap ko shaahee khaana khaanay aur shaahee mai peenay say naapaak naheen karoonga. us nay darbaar kay aala afsar say in cheezon say parhez karnay kee ijaazat maangee. ⁹allaah nay pahelay say is afsar ka dil narm kar diya tha, is liyay vah daanyaal ka khaas lihaaz karta aur us par meharbaanee karta tha. ¹⁰lekin daanyaal kee darakhwaast sun kar us nay javaab diya, “mujhay apnay aaqa baadshaah say dar hai. un hee nay mut’ayyin kiya ki tumhen kya kya khaana aur peena hai. agar unhen pata chalay ki tum doosray naujvaanon kee nisbat dublay-patlay aur kamzor lagay to vah mera sar qalam karengay.” ¹¹tab daanyaal nay us nigraan say baat kee jisay darbaar kay aala afsar nay daanyaal, hananiyaah, meesaael aur azariyaah par muqarrar kiya tha. vah bola, ¹²“zara das din tak apnay khaadimon ko aazmaaen. itnay men hamen khaanay kay liyay sirf saag-paat aur peenay kay liyay paanee deejiay. ¹³is kay baad hamaaree soorat ka muqaabla un deegar naujvaanon kay saath karen jo shaahee khaana khaatay hain. phir is kay madd-ay-nazar faisla karen ki aainda aap apnay khaadimon ko ijaazat dengay ki naheen.”

¹⁴nigraan maan gaya. das din tak vah unhen saag-paat khila kar aur paanee pila kar aazmaata raha. ¹⁵das din kay baad kya dekhta hai ki daanyaal aur us kay teen dost shaahee khaana khaanay vaalay deegar naujvaanon kee nisbat kaheen ziyaada sehatmand aur motay-taazay lag rahay hain. ¹⁶tab nigraan un kay liyay muqarrara shaahee khaanay aur mai ka intizaam band karkay unhen sirf saag-paat khilaanay laga. ¹⁷allaah nay in chaar aadmiyon ko adab aur hikmat kay har shobay men ilm aur samajh ata kee. neez, daanyaal har qism kee roya aur khwaab kee taabeer kar sakta tha.

¹⁸muqarrara teen saal kay baad darbaar kay aala afsar nay tamaam naujvaanon ko nabookadnazzar kay saamnay pesh kiya. ¹⁹jab baadshaah nay un say guftagu kee to maaloom hua ki daanyaal, hananiyaah, meesaael aur azariyaah doosron par sabqat rakhtay hain. chunaanchay chaaron baadshaah kay mulaazim ban gaay. ²⁰jab bhee kisee muaamalay men khaas hikmat aur samajh darkaar hotee to baadshaah nay dekha ki yah chaar naujavaan mashvra denay men pooree saltanat kay tamaam qismat ka haal bataanay vaalon aur jaadoogaron say das guna ziyaada qaabil hain.

²¹daanyaal khoras kee hukoomat kay pahelay saal tak shaahee darbaar men khidmat karta raha.