Kulussiyon 3
1aap ko maseeh kay saath zinda kar diya gaya hai, is liyay vah kuchh talaash karen jo aasmaan par hai jahaan maseeh allaah kay dahenay haath baitha hai. 2duniyaavee cheezon ko apnay khayaalon ka markaz na banaaen balki aasmaanee cheezon ko. 3kyoonki aap mar gaay hain aur ab aap kee zindagee maseeh kay saath allaah men posheeda hai. 4maseeh hee aap kee zindagee hai. jab vah zaahir ho jaaega to aap bhee us kay saath zaahir ho kar us kay jalaal men shareek ho jaaengay.
puraanee aur naee zindagee
5chunaanchay un duniyaavee cheezon ko maar daalen jo aap kay andar kaam kar rahee hain : zinaakaaree, naapaakee, shahevatparastee, buree khwaahishaat aur laalach (laalach to ek qism kee butparastee hai). 6allaah ka ghazab aisee hee baaton kee vajah say naazil hoga. 7ek vaqt tha jab aap bhee in kay mutaabiq zindagee guzaartay thay, jab aap kee zindagee in kay qaaboo men thee.
8lekin ab vaqt a gaya hai ki aap yah sab kuchh yaanee ghussa, taish, badasulookee, buhtaan aur gandee zabaan khastaahaal kapday kee tarah utaar kar phaink den. 9ek doosray say baat kartay vaqt jhoot mat bolna, kyoonki aap nay apnee puraanee fitrat us kee harkaton samet utaar dee hai. 10saath saath aap nay naee fitrat pahen lee hai, vah fitrat jis kee tajdeed hamaara khaaliq apnee soorat par karta ja raha hai taaki aap usay aur behatar taur par jaan len. 11jahaan yah kaam ho raha hai vahaan logon men koee farq naheen hai, khwaah koee ghairyahoodee ho ya yahoodee, makhtoon ho ya naamakhtoon, ghairyoonaanee ho ya skootee [a] ek qabeela jo zaleel samjha jaata tha. , ghulaam ho ya aazaad. koee farq naheen padta, sirf maseeh hee sab kuchh aur sab men hai.
12allaah nay aap ko chun kar apnay liyay makhsoos-o-muqaddas kar liya hai. vah aap say muhabbat rakhta hai. is liyay ab taras, nekee, farotnee, narmdilee aur sabr ko pahen len. 13ek doosray ko bardaasht karen, aur agar aap kee kisee say shikaayat ho to usay muaaf kar den. haan, yoon muaaf karen jis tarah khudaavand nay aap ko muaaf kar diya hai. 14in kay ilaava muhabbat bhee pahen len jo sab kuchh baandh kar kaamiliyat kee taraf lay jaatee hai. 15maseeh kee salaamatee aap kay dilon men hukoomat karay. kyoonki allaah nay aap ko isee salaamatee kee zindagee guzaarnay kay liyay bula kar ek badan men shaamil kar diya hai. shukrguzaar bhee rahen. 16aap kee zindagee men maseeh kay kalaam kee pooree daulat ghar kar jaaay. ek doosray ko har tarah kee hikmat say taaleem detay aur samjhaatay rahen. saath saath apnay dilon men allaah kay liyay shukrguzaaree kay saath zaboor, hamd-o-sana aur ruhaanee geet gaatay rahen. 17aur jo kuchh bhee aap karen khwaah zabaanee ho ya amlee vah khudaavand eesa ka naam lay kar karen. har kaam men usee kay vaseelay say khuda baap ka shukr karen.
naee zindagee men taalluqaat kaisay hoon
18beeviyo, apnay shauhar kay taabay rahen, kyoonki jo khudaavand men hai us kay liyay yahee munaasib hai.
19shauharo, apnee beeviyon say muhabbat rakhen. un say talkhamizaajee say pesh na aaen.
20bachcho, har baat men apnay maan-baap kay taabay rahen, kyoonki yahee khudaavand ko pasand hai.
21vaalido, apnay bachchon ko mushtail na karen, varna vah bedil ho jaaengay.
22ghulaamo, har baat men apnay duniyaavee maalikon kay taabay rahen. na sirf un kay saamnay hee aur unhen khush rakhnay kay liyay khidmat karen balki khuloosdilee aur khudaavand ka khauf maan kar kaam karen. 23jo kuchh bhee aap kartay hain usay pooree lagan kay saath karen, is tarah jaisa ki aap na sirf insaanon kee balki khudaavand kee khidmat kar rahay hoon. 24aap to jaantay hain ki khudaavand aap ko is kay muaavazay men vah meeraas dega jis ka vaada us nay kiya hai. haqeeqat men aap khudaavand maseeh kee hee khidmat kar rahay hain. 25lekin jo ghalat kaam karay usay apnee ghaltiyon ka muaavaza bhee milega. allaah to kisee kee bhee jaanibdaaree naheen karta.