Kulussiyon 2

¹main chaahata hoon ki aap jaan len ki main aap kay liyay kis qadar jaanfishaanee kar raha hoon - aap kay liyay, laudeekiya vaalon kay liyay aur un tamaam eemaandaaron kay liyay bhee jin kee meray saath mulaaqaat naheen huee. ²meree koshish yah hai ki un kee dilee hausalaaafzaaee kee jaaay aur vah muhabbat men ek ho jaaen, ki unhen vah thos etimaad haasil ho jaaay jo pooree samajh say paida hota hai. kyoonki main chaahata hoon ki vah allaah ka raaz jaan len. raaz kya hai? maseeh khud. ³usee men hikmat aur ilm-o-irfaan kay tamaam khazaanay posheeda hain.

⁴gharaz khabardaar rahen ki koee aap ko bazaahir saheeh aur meethay meethay alfaaz say dhoka na day. ⁵kyoonki go main jism kay lihaaz say haazir naheen hoon, lekin rooh men main aap kay saath hoon. aur main yah dekh kar khush hoon ki aap kitnee munazzam zindagee guzaartay hain, ki aap ka maseeh par eemaan kitna pukhta hai.

maseeh men zindagee

⁶aap nay eesa maseeh ko khudaavand kay taur par qabool kar liya hai. ab us men zindagee guzaaren. ⁷us men jad pakden, us par apnee zindagee taameer karen, us eemaan men mazboot rahen jis kee aap ko taaleem dee gaee hai aur shukrguzaaree say labrez ho jaaen.

⁸muhtaat rahen ki koee aap ko falsafiyaana aur mahez fareb denay vaalee baaton say apnay jaal men na phansa lay. aisee baaton ka sarchashma maseeh naheen balki insaanee rivaayaten aur is duniya kee quvvaten hain. ⁹kyoonki maseeh men uloohiyat kee saaree maamooree mujassam ho kar sukoonat kartee hai. ¹⁰aur aap ko jo maseeh men hain us kee maamooree men shareek kar diya gaya hai. vahee har hukmaraan aur ikhtiyaar vaalay ka sar hai.

¹¹us men aatay vaqt aap ka khatna bhee karvaaya gaya. lekin yah khatna insaanee haathon say naheen kiya gaya balki maseeh kay vaseelay say. us vaqt aap kee puraanee fitrat utaar dee gaee, ¹²aap ko baptisma day kar maseeh kay saath dafnaaya gaya aur aap ko eemaan say zinda kar diya gaya. kyoonki aap allaah kee qudrat par eemaan laaay thay, usee qudrat par jis nay maseeh ko murdon men say zinda kar diya tha. ¹³pahelay aap apnay gunaahon aur naamakhtoon jismaanee haalat kay sabab say murda thay, lekin ab allaah nay aap ko maseeh kay saath zinda kar diya hai. us nay hamaaray tamaam gunaahon ko muaaf kar diya hai. ¹⁴hamaaray qarz kee jo raseed apnee sharaait kee bina par hamaaray khilaaf thee usay us nay mansookh kar diya. haan, us nay ham say door karkay usay keelon say saleeb par jad diya. ¹⁵us nay hukmaraanon aur ikhtiyaar vaalon say un ka asaliha chheen kar sab kay saamnay un kee rusvaaee kee. haan, maseeh kee saleebee maut say vah allaah kay qaidee ban gaay aur unhen fatah kay juloos men us kay peechhay peechhay chalna pada.

¹⁶chunaanchay koee aap ko is vajah say mujrim na thaheraaay ki aap kya kya khaatay-peetay ya kaun kaun see eeden manaatay hain. isee tarah koee aap kee adaalat na karay agar aap hilaal kee eed ya sabat ka din naheen manaatay. ¹⁷yah cheezen to sirf aanay vaalee haqeeqat ka saaya hee hain jabki yah haqeeqat khud maseeh men paaee jaatee hai. ¹⁸aisay log aap ko mujrim na thaheraaen jo zaahiree farotnee aur farishton kee pooja par israar kartay hain. badee tafseel say apnee royaaon men dekhee huee baaten bayaan kartay kartay un kay ghairruhaanee zahen khwaah-m-khwaah phool jaatay hain. ¹⁹yoon unhon nay maseeh kay saath lagay rahena chhod diya agarchi vah badan ka sar hai. vahee jodon aur patthon kay zareeay pooray badan ko sahaara day kar us kay mukhtalif hisson ko jod deta hai. yoon poora badan allaah kee madad say taraqqee karta jaata hai.

maseeh kay saath marna aur zindagee guzaarnaa

²⁰aap to maseeh kay saath mar kar duniya kee kuvvaton say aazaad ho gaay hain. agar aisa hai to aap zindagee aisay kyoon guzaartay hain jaisay ki aap abhee tak is duniya kee milkiyat hain? aap kyoon is kay ahkaam kay taabay rahetay hain? ²¹maslan “isay haath na lagaana, vah na chakhna, yah na chhoona.” ²²in tamaam cheezon ka maqsad to yah hai ki istemaal ho kar khatm ho jaaen. yah sirf insaanee ahkaam aur taaleemaat hain. ²³beshak yah ahkaam jo ghaday huay mazhabee faraaiz, naam-nihaad farotnee aur jism kay sakht dabaao ka taqaaza kartay hain hikmat par mabnee to lagtay hain, lekin yah bekaar hain aur sirf jism hee kee khwaahishaat pooree kartay hain.