Kulussiyon 1

¹yah khat paulus kee taraf say hai jo allaah kee marzee say maseeh eesa ka rasool hai. saath hee yah bhaaee teemuthiyus kee taraf say bhee hai.

²main kulussay shaher kay muqaddas bhaaiyon ko likh raha hoon jo maseeh par eemaan laaay hain :

khuda hamaara baap aap ko fazl aur salaamatee bakhshay.

shukrguzaaree kee duaa

³jab ham aap kay liyay dua kartay hain to har vaqt khuda apnay khudaavand eesa maseeh kay baap ka shukr kartay hain, ⁴kyoonki ham nay aap kay maseeh eesa par eemaan aur aap kee tamaam muqaddaseen say muhabbat kay baaray men sun liya hai. ⁵aap ka yah eemaan aur muhabbat vah kuchh zaahir kartay hain jis kee aap ummeed rakhtay hain aur jo aasmaan par aap kay liyay mahfooz rakha gaya hai. aur aap nay yah ummeed us vaqt say rakhee hai jab say aap nay pahelee martaba sachchaaee ka kalaam yaanee allaah kee khushkhabaree sunee. ⁶yah paighaam jo aap kay paas pahunch gaya pooree duniya men phal la raha aur badh raha hai, bilkul usee tarah jis tarah yah aap men bhee us din say kaam kar raha hai jab aap nay pahelee baar isay sun kar allaah kay fazl kee pooree haqeeqat samajh lee. ⁷aap nay hamaaray azeez hamkhidmat ipafraas say is khushkhabaree kee taaleem pa lee thee. maseeh ka yah vafaadaar khaadim hamaaree jagah aap kee khidmat kar raha hai. ⁸usee nay hamen aap kee us muhabbat kay baaray men bataaya jo rooh-ul-quds nay aap kay dilon men daal dee hai.

⁹is vajah say ham aap kay liyay dua karnay say baaz naheen aaay balki yah maangtay rahetay hain ki allaah aap ko har ruhaanee hikmat aur samajh say navaaz kar apnee marzee kay ilm say bhar day. ¹⁰kyoonki phir hee aap apnee zindagee khudaavand kay laaiq guzaar sakengay aur har tarah say usay pasand aaengay. haan, aap har qism ka achchha kaam karkay phal laaengay aur allaah kay ilm-o-irfaan men taraqqee karengay. ¹¹aur aap us kee jalaalee qudrat say milnay vaalee har qism kee quvvat say taqviyat pa kar har vaqt saabitqadmee aur sabr say chal sakengay. aap khushee se ¹²baap ka shukr karengay jis nay aap ko us meeraas men hissa lenay kay laaiq bana diya jo us kay raushnee men rahenay vaalay muqaddaseen ko haasil hai. ¹³kyoonki vahee hamen taareekee kay ikhtiyaar say rihaaee day kar apnay piyaaray farzand kee baadshaahee men laaya, ¹⁴us vaahid shakhs kay ikhtiyaar men jis nay hamaara fidya day kar hamaaray gunaahon ko muaaf kar diya.

maseeh kee shakhsiyat aur kaam

¹⁵allaah ko dekha naheen ja sakta, lekin ham maseeh ko dekh saktay hain jo allaah kee soorat aur kaainaat ka pahelautha hai. ¹⁶kyoonki allaah nay usee men sab kuchh khalaq kiya, khwaah aasmaan par ho ya zameen par, aankhon ko nazar aaay ya na, khwaah shaahee takht, quvvaten, hukmaraan ya ikhtiyaar vaalay hoon. sab kuchh maseeh kay zareeay aur usee kay liyay khalaq hua. ¹⁷vahee sab cheezon say pahelay hai aur usee men sab kuchh qaaim raheta hai. ¹⁸aur vah badan yaanee apnee jamaaat ka sar bhee hai. vahee ibtida hai, aur choonki pahelay vahee murdon men say jee utha is liyay vahee un men say pahelautha bhee hai taaki vah sab baaton men avval ho. ¹⁹kyoonki allaah ko pasand aaya ki maseeh men us kee pooree maamooree sukoonat kare ²⁰aur vah maseeh kay zareeay sab baaton kee apnay saath sulah kara lay, khwaah vah zameen kee hoon khwaah aasmaan kee. kyoonki us nay maseeh kay saleeb par bahaaay gaay khoon kay vaseelay say sulah-salaamatee qaaim kee.

²¹aap bhee pahelay allaah kay saamnay ajnabee thay aur dushman kee see soch rakh kar buray kaam kartay thay. ²²lekin ab us nay maseeh kay insaanee badan kee maut say aap kay saath sulah kar lee hai taaki vah aap ko muqaddas, bedaagh aur beilzaam haalat men apnay huzoor khada karay. ²³beshak ab zarooree hai ki aap eemaan men qaaim rahen, ki aap thos bunyaad par mazbootee say khaday rahen aur us khushkhabaree kee ummeed say hat na jaaen jo aap nay sun lee hai. yah vahee paighaam hai jis kee munaadee duniya men har makhlooq kay saamnay kar dee gaee hai aur jis ka khaadim main paulus ban gaya hoon.

jamaaat kay khaadim kee haisiyat say paulus kee khidmat

²⁴ab main un dukhon kay baais khushee manaata hoon jo main aap kee khaatir utha raha hoon. kyoonki main apnay jism men maseeh kay badan yaanee us kee jamaaat kee khaatir maseeh kee museebaton kee vah kamiyaan pooree kar raha hoon jo ab tak rah gaee hain. ²⁵haan, allaah nay mujhay apnee jamaaat ka khaadim bana kar yah zimmaadaaree dee ki main aap ko allaah ka poora kalaam suna doon, ²⁶vah raaz jo azal say tamaam guzree naslon say posheeda raha tha lekin ab muqaddaseen par zaahir kiya gaya hai. ²⁷kyoonki allaah chaahata tha ki vah jaan len ki ghairyahoodiyon men yah raaz kitna beshaqeemat aur jalaalee hai. aur yah raaz hai kya? yah ki maseeh aap men hai. vahee aap men hai jis kay baais ham allaah kay jalaal men shareek honay kee ummeed rakhtay hain. ²⁸yoon ham sab ko maseeh ka paighaam sunaatay hain. har mumkina hikmat say ham unhen samjhaatay aur taaleem detay hain taaki har ek ko maseeh men kaamil haalat men allaah kay huzoor pesh karen. ²⁹yahee maqsad poora karnay kay liyay main sakht mehanat karta hoon. haan, main pooree jidd-o-jahd karkay maseeh kee us quvvat ka sahaara leta hoon jo baday zor say meray andar kaam kar rahee hai.