Āmaal 9
paulus kee tabdeelee
1ab tak saaool khudaavand kay shaagirdon ko dhamkaanay aur qatl karnay kay darpai tha. us nay imaam-ay-aazam kay paas ja kar 2us say guzaarish kee ki “mujhay damishq men yahoodee ibaadatkhaanon kay liyay sifaarishee khat likh kar den taaki vah meray saath t’aavun karen. kyoonki main vahaan maseeh kee raah par chalnay vaalon ko khwaah vah mard hon ya khavaateen dhoond kar aur baandh kar yarooshalam laana chaahata hoon.”
3vah is maqsad say safar karkay damishq kay qareeb pahuncha hee tha ki achaanak aasmaan kee taraf say ek tez raushnee us kay gird chamkee. 4vah zameen par gir pada to ek aavaaz sunaaee dee, “saaool, saaool, too mujhay kyoon sataata hai?”
5us nay poochha, “khudaavand, aap kaun hain?”
aavaaz nay javaab diya, “main eesa hoon jisay too sataata hai. 6ab uth kar shaher men ja. vahaan tujhay bataaya jaaega ki tujhay kya karna hai.”
7saaool kay paas khaday hamsafar dam-ba-khud rah gaay. aavaaz to vah sun rahay thay, lekin unhen koee nazar na aaya. 8saaool zameen par say utha, lekin jab us nay apnee aankhen kholeen to maaloom hua ki vah andha hai. chunaanchay us kay saathee us ka haath pakad kar usay damishq lay gaay. 9vahaan teen din kay dauraan vah andha raha. itnay men us nay na kuchh khaaya, na piya.
10us vaqt damishq men eesa ka ek shaagird raheta tha jis ka naam hananiyaah tha. ab khudaavand roya men us say hamkalaam hua, “hananiyaah!”
us nay javaab diya, “jee khudaavand, main haazir hoon.”
11khudaavand nay farmaaya, “uth, us galee men ja jo ‘seedhee’ kahelaatee hai. vahaan yahoodaah kay ghar men tarsus kay ek aadmee ka pata karna jis ka naam saaool hai. kyoonki dekh, vah dua kar raha hai. 12aur roya men us nay dekh liya hai ki ek aadmee banaam hananiyaah meray paas a kar apnay haath mujh par rakhega. is say meree aankhen bahaal ho jaaengee.”
13hananiyaah nay etiraaz kiya, “ai khudaavand, main nay bahut say logon say us shakhs kee shareer harkaton kay baaray men suna hai. yarooshalam men us nay teray muqaddason kay saath bahut ziyaadtee kee hai. 14ab usay raahanuma imaamon say ikhtiyaar mil gaya hai ki yahaan bhee har ek ko giriftaar karay jo teree ibaadat karta hai.”
15lekin khudaavand nay kaha, “ja, yah aadmee mera chuna hua vaseela hai jo mera naam ghairyahoodiyon, baadshaahon aur israaeeliyon tak pahunchaaega. 16aur main usay dikha doonga ki usay meray naam kee khaatir kitna dukh uthaana padega.”
17chunaanchay hananiyaah mazkoora ghar kay paas gaya, us men daakhil hua aur apnay haath saaool par rakh diay. us nay kaha, “saaool bhaaee, khudaavand eesa jo aap par zaahir hua jab aap yahaan a rahay thay usee nay mujhay bheja hai taaki aap dubaara dekh paaen aur rooh-ul-quds say maamoor ho jaaen.” 18yah kahetay hee chhilkon jaisee koee cheez saaool kee aankhon par say giree aur vah dubaara dekhnay laga. us nay uth kar baptisma liya, 19phir kuchh khaana kha kar naay siray say taqviyat paaee.
saaool damishq men allaah kee khushkhabaree sunaata hai
saaool kaee din shaagirdon kay saath damishq men raha. 20usee vaqt vah seedha yahoodee ibaadatkhaanon men ja kar elaan karnay laga ki eesa allaah ka farzand hai.
21aur jis nay bhee usay suna vah hairaan rah gaya aur poochha, “kya yah vah aadmee naheen jo yarooshalam men eesa kee ibaadat karnay vaalon ko halaak kar raha tha? aur kya vah is maqsad say yahaan naheen aaya ki aisay logon ko baandh kar raahanuma imaamon kay paas lay jaaay?”
22lekin saaool roz-ba-roz zor pakadta gaya, aur choonki us nay saabit kiya ki eesa vaada kiya hua maseeh hai is liyay damishq men aabaad yahoodee uljhan men pad gaay.
23chunaanchay kaafee dinon kay baad unhon nay mil kar usay qatl karnay ka mansooba banaaya. 24lekin saaool ko pata chal gaya. yahoodee din raat shaher kay darvaazon kee paheraadaaree kartay rahay taaki usay qatl karen, 25is liyay us kay shaagirdon nay usay raat kay vaqt tokray men bitha kar shaher kee chaardeevaaree kay ek sooraakh men say utaar diya.
saaool yarooshalam men
26saaool yarooshalam vaapas chala gaya. vahaan us nay shaagirdon say raabita karnay kee koshish kee, lekin sab us say dartay thay, kyoonki unhen yaqeen naheen aaya tha ki vah vaaqaee eesa ka shaagird ban gaya hai. 27phir barnabaas usay rasoolon kay paas lay aaya. us nay unhen saaool kay baaray men sab kuchh bataaya, ki us nay damishq kee taraf safar kartay vaqt raastay men khudaavand ko dekha, ki khudaavand us say hamkalaam hua tha aur us nay damishq men dileree say eesa kay naam say baat kee thee. 28chunaanchay saaool un kay saath rah kar aazaadee say yarooshalam men phirnay aur dileree say khudaavand eesa kay naam say kalaam karnay laga. 29us nay yoonaanee zabaan bolnay vaalay yahoodiyon say bhee mukhaatib ho kar bahs kee, lekin javaab men vah usay qatl karnay kee koshish karnay lagay. 30jab bhaaiyon ko maaloom hua to unhon nay usay qaisriya pahuncha diya aur jahaaz men bitha kar tarsus kay liyay ravaana kar diya.
31is par yahoodiya, galeel aur saamriya kay pooray ilaaqay men phailee huee jamaaat ko amn-o-amaan haasil hua. rooh-ul-quds kee himaayat say us kee taameer-o-taqviyat huee, vah khuda ka khauf maan kar chaltee rahee aur taadaad men bhee badhtee gaee.
patras ludda aur yaafa men
32ek din jab patras jagah jagah safar kar raha tha to vah ludda men aabaad muqaddason kay paas bhee aaya. 33vahaan us kee mulaaqaat ek aadmee banaam ainiyaas say huee. ainiyaas maflooj tha. vah aath saal say bistar say uth na saka tha. 34patras nay us say kaha, “ainiyaas, eesa maseeh aap ko shifa deta hai. uth kar apna bistar samet len.” ainiyaas fauran uth khada hua. 35jab ludda aur maidaanee ilaaqay shaaroon kay tamaam rahenay vaalon nay usay dekha to unhon nay khudaavand kee taraf rujoo kiya.
36yaafa men ek aurat thee jo shaagird thee aur nek kaam karnay aur khairaat denay men bahut aagay thee. us ka naam tabeeta (ghazaala) tha. 37un hee dinon men vah beemaar ho kar faut ho gaee. logon nay usay ghusal day kar baalaakhaanay men rakh diya. 38ludda yaafa kay qareeb hai, is liyay jab shaagirdon nay suna ki patras ludda men hai to unhon nay us kay paas do aadmiyon ko bhej kar iltimaas kee, “seedhay hamaaray paas aaen aur der na karen.” 39patras uth kar un kay saath chala gaya. vahaan pahunch kar log usay baalaakhaanay men lay gaay. tamaam bevaaon nay usay gher liya aur rotay chillaatay vah saaree qameesen aur baaqee libaas dikhaanay lageen jo tabeeta nay un kay liyay banaaay thay jab vah abhee zinda thee. 40lekin patras nay un sab ko kamray say nikaal diya aur ghutnay tek kar dua kee. phir laash kee taraf mud kar us nay kaha, “tabeeta, uthen!” aurat nay apnee aankhen khol deen. patras ko dekh kar vah baith gaee. 41patras nay us ka haath pakad liya aur uthnay men us kee madad kee. phir us nay muqaddason aur bevaaon ko bula kar tabeeta ko zinda un kay sapurd kiya. 42yah vaaqia pooray yaafa men mashhoor hua, aur bahut say log khudaavand eesa par eemaan laaay. 43patras kaafee dinon tak yaafa men raha. vahaan vah chamda rangnay vaalay ek aadmee kay ghar thahera jis ka naam shamaaoon tha.