Āmaal 8
1aur saaool ko bhee stifanus ka qatl manzoor tha.
saaool jamaaat ko sataata hai
us din yarooshalam men maujood jamaaat sakht eezaarasaanee kee zad men a gaee. is liyay siva-ay-rasoolon kay tamaam eemaandaar yahoodiya aur saamriya kay ilaaqon men tittar-bittar ho gaay. 2kuchh khudaataras aadmiyon nay stifanus ko dafan karkay ro ro kar us ka maatam kiya.
3lekin saaool eesa kee jamaaat ko tabaah karnay par tula hua tha. us nay ghar ghar ja kar eemaandaar mard-o-khavaateen ko nikaal diya aur unhen ghaseet kar qaidkhaanay men dalva diya.
khushkhabaree saamriya men phail jaatee hai
4jo eemaandaar bikhar gaay thay vah jagah jagah ja kar allaah kee khushkhabaree sunaatay phiray. 5is tarah filippus saamriya kay kisee shaher ko gaya aur vahaan kay logon ko maseeh kay baaray men bataaya. 6jo kuchh bhee filippus nay kaha aur jo bhee ilaahee nishaan us nay dikhaaay, us par sunnay vaalay hujoom nay yakdil ho kar tavajjuh dee. 7bahut say logon men say badruhen zordaar cheekhen maar maar kar nikal gaeen, aur bahut say mafloojon aur langadon ko shifa mil gaee. 8yoon us shaher men badee shaadmaanee phail gaee.
9vahaan kaafee arsay say ek aadmee raheta tha jis ka naam shamaaoon tha. vah jaadoogar tha aur us kay hairat’angez kaam say saamriya kay log bahut mut’assir thay. us ka apna daava tha ki main koee khaas shakhs hoon. 10is liyay sab log chhotay say lay kar baday tak us par khaas tavajjuh detay thay. un ka kahena tha, ‘yah aadmee vah ilaahee quvvat hai jo azeem kahelaatee hai.’ 11vah is liyay us kay peechhay lag gaay thay ki us nay unhen badee der say apnay hairat’angez kaamon say mut’assir kar rakha tha. 12lekin ab log filippus kee allaah kee baadshaahee aur eesa kay naam kay baaray men khushkhabaree par eemaan lay aaay, aur mard-o-khavaateen nay baptisma liya. 13khud shamaaoon nay bhee eemaan la kar baptisma liya aur filippus kay saath raha. jab us nay vah baday ilaahee nishaan aur mojizay dekhay jo filippus kay haath say zaahir huay to vah hakka-bakka rah gaya.
14jab yarooshalam men rasoolon nay suna ki saamriya nay allaah ka kalaam qabool kar liya hai to unhon nay patras aur yoohanna ko un kay paas bhej diya. 15vahaan pahunch kar unhon nay un kay liyay dua kee ki unhen rooh-ul-quds mil jaaay, 16kyoonki abhee rooh-ul-quds un par naazil naheen hua tha balki unhen sirf khudaavand eesa kay naam men baptisma diya gaya tha. 17ab jab patras aur yoohanna nay apnay haath un par rakhay to unhen rooh-ul-quds mil gaya.
18shamaaoon nay dekha ki jab rasool logon par haath rakhtay hain to un ko rooh-ul-quds milta hai. is liyay us nay unhen paisay pesh karke 19kaha, “mujhay bhee yah ikhtiyaar day den ki jis par main haath rakhoon usay rooh-ul-quds mil jaaay.”
20lekin patras nay javaab diya, “aap kay paisay aap kay saath ghaarat ho jaaen, kyoonki aap nay socha ki allaah kee nemat paison say khareedee ja saktee hai. 21is khidmat men aap ka koee hissa naheen hai, kyoonki aap ka dil allaah kay saamnay khaalis naheen hai. 22apnee is sharaarat say tauba karkay khudaavand say dua karen. shaayad vah aap ko is iraaday kee muaafee day jo aap nay dil men rakha hai. 23kyoonki main dekhta hoon ki aap kadvay pit say bharay aur naaraastee kay bandhan men jakday huay hain.”
24shamaaoon nay kaha, “phir khudaavand say meray liyay dua karen ki aap kee mazkoora museebaton men say mujh par koee na aaay.”
25khudaavand kay kalaam kee gavaahee denay aur us kee munaadee karnay kay baad patras aur yoohanna vaapas yarooshalam kay liyay ravaana huay. raastay men unhon nay saamriya kay bahut say deehaaton men allaah kee khushkhabaree sunaaee.
filippus aur ethopiya ka afsar
26ek din rabb kay farishtay nay filippus say kaha, “uth kar junoob kee taraf us raah par ja jo registaan men say guzar kar yarooshalam say ghazza ko jaatee hai.” 27filippus uth kar ravaana hua. chaltay chaltay us kee mulaaqaat ethopiya kee malika kandaakay kay ek khwaajaasara say huee. malika kay pooray khazaanay par muqarrar yah darbaaree ibaadat karnay kay liyay yarooshalam gaya thaa 28aur ab apnay mulk men vaapas ja raha tha. us vaqt vah rath men savaar yasaayaah nabee kee kitaab kee tilaavat kar raha tha. 29rooh-ul-quds nay filippus say kaha, “us kay paas ja kar rath kay saath ho lay.” 30filippus daud kar rath kay paas pahuncha to suna ki vah yasaayaah nabee kee kitaab kee tilaavat kar raha hai. us nay poochha, “kya aap ko us sab kee samajh aatee hai jo aap padh rahay hain?”
31darbaaree nay javaab diya, “main kyoonkar samjhoon jab tak koee meree raahanumaaee na karay?” aur us nay filippus ko rath men savaar honay kee daavat dee. 32kalaam-ay-muqaddas ka jo havaala vah padh raha tha yah tha,
‘usay bhed kee tarah zabah karnay kay liyay lay gaay.
jis tarah lela baal katarnay vaalay kay saamnay khaamosh raheta hai,
usee tarah us nay apna munh na khola.
33us kee tazleel kee gaee aur usay insaaf na mila.
kaun us kee nasal bayaan kar sakta hai?
kyoonki us kee jaan duniya say chheen lee gaee.’
34darbaaree nay filippus say poochha, “meharbaanee karkay mujhay bata deejiay ki nabee yahaan kis ka zikr kar raha hai, apna ya kisee aur ka?” 35javaab men filippus nay kalaam-ay-muqaddas kay isee havaalay say shuroo karkay usay eesa kay baaray men khushkhabaree sunaaee. 36sadak par safar kartay kartay vah ek jagah say guzray jahaan paanee tha. khwaajaasara nay kaha, “dekhen, yahaan paanee hai. ab mujhay baptisma lenay say kaun see cheez rok saktee hai?” 37[filippus nay kaha, “agar aap pooray dil say eemaan laaen to lay saktay hain.” us nay javaab diya, “main eemaan rakhta hoon ki eesa maseeh allaah ka farzand hai.”]
38us nay rath ko roknay ka hukm diya. donon paanee men utar gaay aur filippus nay usay baptisma diya. 39jab vah paanee say nikal aaay to khudaavand ka rooh filippus ko utha lay gaya. is kay baad khwaajaasara nay usay phir kabhee na dekha, lekin us nay khushee manaatay huay apna safar jaaree rakha. 40itnay men filippus ko ashdood shaher men paaya gaya. vah vahaan aur qaisriya tak kay tamaam shaheron men say guzar kar allaah kee khushkhabaree sunaata gaya.