Āmaal 7

stifanus kee taqreer

¹imaam-ay-aazam nay poochha, “kya yah sachch hai?”

²stifanus nay javaab diya, “bhaaiyo aur buzurgo, meree baat sunen. jalaal ka khuda hamaaray baap ibraaheem par zaahir hua jab vah abhee masoputaamiya men aabaad tha. us vaqt vah haaraan men muntaqil naheen hua tha. ³allaah nay us say kaha, ‘apnay vatan aur apnee qaum ko chhod kar is mulk men chala ja jo main tujhay dikhaaoonga.’ ⁴chunaanchay vah kasdiyon kay mulk ko chhod kar haaraan men rahenay laga. vahaan us ka baap faut hua to allaah nay usay is mulk men muntaqil kiya jis men aap aaj tak aabaad hain. ⁵us vaqt allaah nay usay is mulk men koee bhee mauroosee zameen na dee thee, ek murabba fut tak bhee naheen. lekin us nay us say vaada kiya, ‘main is mulk ko teray aur teree aulaad kay qabzay men kar doonga,’ agarchi us vaqt ibraaheem kay haan koee bachcha paida naheen hua tha. ⁶allaah nay usay yah bhee bataaya, ‘teree aulaad aisay mulk men rahegee jo us ka naheen hoga. vahaan vah ajnabee aur ghulaam hogee, aur us par 400 saal tak bahut zulm kiya jaaega. ⁷lekin main us qaum kee adaalat karoonga jis nay usay ghulaam banaaya hoga. is kay baad vah us mulk men say nikal kar is maqaam par meree ibaadat karengay.’ ⁸phir allaah nay ibraaheem ko khatna ka ahd diya. chunaanchay jab ibraaheem ka beta ishaaq paida hua to baap nay aathven din us ka khatna kiya. yah silsila jaaree raha jab ishaaq ka beta yaaqoob paida hua aur yaaqoob kay baarah betay, hamaaray baarah qabeelon kay sardaar.

⁹yah sardaar apnay bhaaee yoosuf say hasad karnay lagay aur is liyay usay bech diya. yoon vah ghulaam ban kar misr pahuncha. lekin allaah us kay saath rahaa ¹⁰aur usay us kee tamaam museebaton say rihaaee dee. us nay usay daanaaee ata karkay is qaabil bana diya ki vah misr kay baadshaah firaaun ka manzoor-ay-nazar ho jaaay. yoon firaaun nay usay misr aur apnay pooray gharaanay par hukmaraan muqarrar kiya. ¹¹phir tamaam misr aur kan’aan men kaal pada. log badee museebat men pad gaay aur hamaaray baapdaada kay paas bhee khuraak khatm ho gaee. ¹²yaaqoob ko pata chala ki misr men ab tak anaaj hai, is liyay us nay apnay beton ko anaaj khareednay ko vahaan bhej diya. ¹³jab unhen doosree baar vahaan jaana pada to yoosuf nay apnay aap ko apnay bhaaiyon par zaahir kiya, aur firaaun ko yoosuf kay khaandaan kay baaray men aagaah kiya gaya. ¹⁴is kay baad yoosuf nay apnay baap yaaqoob aur tamaam rishtedaaron ko bula liya. kul 75 afraad aaay. ¹⁵yoon yaaqoob misr pahuncha. vahaan vah aur hamaaray baapdaada mar gaay. ¹⁶unhen sikam men la kar us qabr men dafnaaya gaya jo ibraaheem nay hamor kee aulaad say paisay day kar khareedee thee.

¹⁷phir vah vaqt qareeb a gaya jis ka vaada allaah nay ibraaheem say kiya tha. misr men hamaaree qaum kee taadaad bahut badh chukee thee. ¹⁸lekin hotay hotay ek naya baadshaah takhtnasheen hua jo yoosuf say naavaaqif tha. ¹⁹us nay hamaaree qaum ka istihsaal karkay un say badasulookee kee aur unhen apnay sheerakhwaar bachchon ko zaaay karnay par majboor kiya. ²⁰us vaqt moosa paida hua. vah allaah kay nazdeek khoobsoorat bachcha tha aur teen maah tak apnay baap kay ghar men paala gaya. ²¹is kay baad vaalidain ko usay chhodna pada, lekin firaaun kee betee nay usay lepaalak bana kar apnay betay kay taur par paala. ²²aur moosa ko misriyon kee hikmat kay har shobay men tarbiyat milee. usay bolnay aur amal karnay kee zabardast qaabiliyat haasil thee.

²³jab vah chaalees saal ka tha to usay apnee qaum israaeel kay logon say milnay ka khayaal aaya. ²⁴jab us nay un kay paas ja kar dekha ki ek misree kisee israaeelee par tashaddud kar raha hai to us nay israaeelee kee himaayat karkay mazloom ka badla liya aur misree ko maar daala. ²⁵us ka khayaal to yah tha ki meray bhaaiyon ko samajh aaegee ki allaah meray vaseelay say unhen rihaaee dega, lekin aisa naheen tha. ²⁶aglay din vah do israaeeliyon kay paas say guzra jo aapas men lad rahay thay. us nay sulah karaanay kee koshish men kaha, ‘mardo, aap to bhaaee hain. aap kyoon ek doosray say ghalat sulook kar rahay hain?’ ²⁷lekin jo aadmee doosray say badasulookee kar raha tha us nay moosa ko ek taraf dhakel kar kaha, ‘kis nay aap ko ham par hukmaraan aur qaazee muqarrar kiya hai? ²⁸kya aap mujhay bhee qatl karna chaahatay hain jis tarah kal misree ko maar daala tha?’ ²⁹yah sun kar moosa faraar ho kar mulk-ay-midiyaan men ajnabee kay taur par rahenay laga. vahaan us kay do betay paida huay.

³⁰chaalees saal kay baad ek farishta jaltee huee kaantedaar jhaadee kay sholay men us par zaahir hua. us vaqt moosa seena pahaad kay qareeb registaan men tha. ³¹yah manzar dekh kar moosa hairaan hua. jab vah us ka muaaina karnay kay liyay qareeb pahuncha to rabb kee aavaaz sunaaee dee, ³²‘main teray baapdaada ka khuda, ibraaheem, ishaaq aur yaaqoob ka khuda hoon.’ moosa thartharaanay laga aur us taraf dekhnay kee jur’at na kee. ³³phir rabb nay us say kaha, ‘apnee jootiyaan utaar, kyoonki too muqaddas zameen par khada hai. ³⁴main nay misr men apnee qaum kee buree haalat dekhee aur un kee aahen sunee hain, is liyay unhen bachaanay kay liyay utar aaya hoon. ab ja, main tujhay misr bhejta hoon.’

³⁵yoon allaah nay us shakhs ko un kay paas bhej diya jisay vah yah kah kar radd kar chukay thay ki ‘kis nay aap ko ham par hukmaraan aur qaazee muqarrar kiya hai?’ jaltee huee kaantedaar jhaadee men maujood farishtay kee maarifat allaah nay moosa ko un kay paas bhej diya taaki vah un ka hukmaraan aur najaatadihanda ban jaaay. ³⁶aur vah mojizay aur ilaahee nishaan dikha kar unhen misr say nikaal laaya, phir baher-ay-qulzum say guzar kar 40 saal kay dauraan registaan men un kee raahanumaaee kee. ³⁷moosa nay khud israaeeliyon ko bataaya, ‘allaah tumhaaray vaastay tumhaaray bhaaiyon men say mujh jaisay nabee ko barpa karega.’ ³⁸moosa registaan men qaum kee jamaaat men shareek tha. ek taraf vah us farishtay kay saath tha jo seena pahaad par us say baaten karta tha, doosree taraf hamaaray baapdaada kay saath. farishtay say usay zindageebakhsh baaten mil gaeen jo usay hamaaray sapurd karnee theen.

³⁹lekin hamaaray baapdaada nay us kee sunnay say inkaar karkay usay radd kar diya. dil hee dil men vah misr kee taraf rujoo kar chukay thay. ⁴⁰vah haaroon say kahenay lagay, ‘aaen, hamaaray liyay devta bana den jo hamaaray aagay aagay chaltay huay hamaaree raahanumaaee karen. kyoonki kya maaloom ki us banday moosa ko kya hua hai jo hamen misr say nikaal laaya.’ ⁴¹usee vaqt unhon nay bachhday ka but bana kar usay qurbaaniyaan pesh keen aur apnay haathon kay kaam kee khushee manaaee. ⁴²is par allaah nay apna munh pher liya aur unhen sitaaron kee pooja kee girift men chhod diya, bilkul usee tarah jis tarah nabiyon kay saheefay men likha hai,

‘ai israaeel kay gharaanay,

jab tum registaan men ghoomtay phirtay the

to kya tum nay un 40 saalon kay dauraan

kabhee mujhay zabah aur ghalla kee qurbaaniyaan pesh keen?

⁴³naheen, us vaqt bhee tum molak devta ka taaboot

aur rifaan devta ka sitaara uthaaay phirtay thay,

go tum nay apnay haathon say yah but

pooja karnay kay liyay bana liyay thay.

is liyay main tumhen jilaavatan karke

baabal kay paar basa doonga.’

⁴⁴registaan men hamaaray baapdaada kay paas mulaaqaat ka khaima tha. usay us namoonay kay mutaabiq banaaya gaya tha jo allaah nay moosa ko dikhaaya tha. ⁴⁵moosa kee maut kay baad hamaaray baapdaada nay usay virsay men pa kar apnay saath lay liya jab unhon nay yashooa kee raahanumaaee men is mulk men daakhil ho kar us par qabza kar liya. us vaqt allaah us men aabaad qaumon ko un kay aagay aagay nikaalta gaya. yoon mulaaqaat ka khaima daaood baadshaah kay zamaanay tak mulk men raha. ⁴⁶daaood allaah ka manzoor-ay-nazar tha. us nay yaaqoob kay khuda ko ek sukoonatgaah muhayya karnay kee ijaazat maangee. ⁴⁷lekin sulemaan ko us kay liyay makaan banaanay ka ezaaz haasil hua.

⁴⁸haqeeqat men allaah t’aala insaan kay haath kay banaaay huay makaanon men naheen raheta. nabee rabb ka farmaan yoon bayaan karta hai,

⁴⁹‘aasmaan mera takht hai

aur zameen meray paaon kee chaukee,

to phir tum meray liyay kis qism ka ghar banaaogay?

vah jagah kahaan hai jahaan main aaraam karoonga?

⁵⁰kya meray haath nay yah sab kuchh naheen banaaya?’

⁵¹ai gardanakash logo! beshak aap ka khatna hua hai jo allaah kee qaum ka zaahiree nishaan hai. lekin us ka aap kay dilon aur kaanon par kuchh bhee asar naheen hua. aap apnay baapdaada kee tarah hamesha rooh-ul-quds kee mukhaalafat kartay rahetay hain. ⁵²kya kabhee koee nabee tha jisay aap kay baapdaada nay na sataaya? unhon nay unhen bhee qatl kiya jinhon nay raastbaaz maseeh kee peshgoee kee, us shakhs kee jisay aap nay dushmanon kay havaalay karkay maar daala. ⁵³aap hee ko farishton kay haath say allaah kee shareeat haasil huee magar us par amal naheen kiya.”

stifanus ko sangasaar kiya jaata hai

⁵⁴stifanus kee yah baaten sun kar ijlaas kay log taish men a kar daant peesnay lagay. ⁵⁵lekin stifanus rooh-ul-quds say maamoor apnee nazar utha kar aasmaan kee taraf taknay laga. vahaan usay allaah ka jalaal nazar aaya, aur eesa allaah kay dahenay haath khada tha. ⁵⁶us nay kaha, “dekho, mujhay aasmaan khula hua dikhaaee day raha hai aur ibn-ay-aadam allaah kay dahenay haath khada hai!”

⁵⁷yah suntay hee unhon nay cheekh cheekh kar haathon say apnay kaanon ko band kar liya aur mil kar us par jhapat paday. ⁵⁸phir vah usay shaher say nikaal kar sangasaar karnay lagay. aur jin logon nay us kay khilaaf gavaahee dee thee unhon nay apnee chaadren utaar kar ek javaan aadmee kay paaon men rakh deen. us aadmee ka naam saaool tha. ⁵⁹jab vah stifanus ko sangasaar kar rahay thay to us nay dua karkay kaha, “ai khudaavand eesa, meree rooh ko qabool kar.” ⁶⁰phir ghutnay tek kar us nay oonchee aavaaz say kaha, “ai khudaavand, unhen is gunaah kay zimmaadaar na thahera.” yah kah kar vah intiqaal kar gaya.