Āmaal 6

rasoolon kay saat madadgaar

¹un dinon men jab eesa kay shaagirdon kee taadaad badhtee gaee to yoonaanee zabaan bolnay vaalay eemaandaar ibraanee bolnay vaalay eemaandaaron kay baaray men budbudaanay lagay. unhon nay kaha, “jab rozmarra ka khaana taqseem hota hai to hamaaree bevaaon ko nazar’andaaz kiya jaata hai.” ²tab baarah rasoolon nay shaagirdon kee pooree jamaaat ko ikattha karkay kaha, “yah theek naheen ki ham allaah ka kalaam sikhaanay kee khidmat ko chhod kar khaana taqseem karnay men masroof rahen. ³bhaaiyo, yah baat pesh-ay-nazar rakh kar apnay men say saat aadmee chun len, jin kay nek kirdaar kee aap tasdeeq kar saktay hain aur jo rooh-ul-quds aur hikmat say maamoor hain. phir ham unhen khaana taqseem karnay kee yah zimmaadaaree day kar ⁴apna poora vaqt dua aur kalaam kee khidmat men sarf kar sakengay.”

⁵yah baat pooree jamaaat ko pasand aaee aur unhon nay saat aadmee chun liyay : stifanus (jo eemaan aur rooh-ul-quds say maamoor tha), filippus, prukhurus, neekaanor, teemon, parminaas aur antaakiya ka neekulaaus. (neekalaaos ghairyahoodee tha jis nay eesa par eemaan laanay say pahelay yahoodee mazhab ko apna liya tha.) ⁶in saat aadmiyon ko rasoolon kay saamnay pesh kiya gaya to unhon nay in par haath rakh kar dua kee.

⁷yoon allaah ka paighaam phailta gaya. yarooshalam men eemaandaaron kee taadaad nihaayat badhtee gaee aur bait-ul-muqaddas kay bahut say imaam bhee eemaan lay aaay.

stifanus kee giriftaaree

⁸stifanus allaah kay fazl aur quvvat say maamoor tha aur logon kay darmiyaan baday baday mojizay aur ilaahee nishaan dikhaata tha. ⁹ek din kuchh yahoodee stifanus say bahs karnay lagay. (vah kuren, iskandariya, kilikiya aur sooba aasiya kay rahenay vaalay thay aur un kay ibaadatkhaanay ka naam labarateeniyon yaanee aazaad kiay gaay ghulaamon ka ibaadatkhaana tha.) ¹⁰lekin vah na us kee hikmat ka saamna kar sakay, na us rooh ka jo kalaam kartay vaqt us kee madad karta tha. ¹¹is liyay unhon nay baaz aadmiyon ko yah kahenay ko uksaaya ki “is nay moosa aur allaah kay baaray men kufr baka hai. ham khud is kay gavaah hain.” ¹²yoon aam logon, buzurgon aur shareeat kay ulma men halchal mach gaee. vah stifanus par chadh aaay aur usay ghaseet kar yahoodee adaalat-ay-aaliya kay paas laaay. ¹³vahaan unhon nay jhootay gavaah khaday kiay jinhon nay kaha, “yah aadmee bait-ul-muqaddas aur shareeat kay khilaaf baaten karnay say baaz naheen aata. ¹⁴ham nay is kay munh say suna hai ki eesa naasree yah maqaam tabaah karega aur vah rasm-o-rivaaj badal dega jo moosa nay hamaaray sapurd kiay hain.” ¹⁵jab ijlaas men baithay tamaam log ghoor ghoor kar stifanus kee taraf dekhnay lagay to us ka chihara farishtay ka sa nazar aaya.