Āmaal 5

hananiyaah aur safeeraa

¹ek aur aadmee tha jis nay apnee beevee kay saath mil kar apnee koee zameen bech dee. un kay naam hananiyaah aur safeera thay. ²lekin hananiyaah pooree raqam rasoolon kay paas na laaya balki us men say kuchh apnay liyay rakh chhoda aur baaqee rasoolon kay paaon men rakh diya. us kee beevee bhee is baat say vaaqif thee. ³lekin patras nay kaha, “hananiyaah, iblees nay aap kay dil ko yoon kyoon bhar diya hai ki aap nay rooh-ul-quds say jhoot bola hai? kyoonki aap nay zameen kee raqam kay kuchh paisay apnay paas rakh liyay hain. ⁴kya yah zameen farokht karnay say pahelay aap kee naheen thee? aur usay bech kar kya aap paisay jaisay chaahatay istemaal naheen kar saktay thay? aap nay kyoon apnay dil men yah thaan liya? aap nay hamen naheen balki allaah ko dhoka diya hai.”

⁵yah suntay hee hananiyaah farsh par gir kar mar gaya. aur tamaam sunnay vaalon par badee dahshat taaree ho gaee. ⁶jamaaat kay naujvaanon nay uth kar laash ko kafan men lapet diya aur usay baahar lay ja kar dafan kar diya.

⁷taqreeban teen ghantay guzar gaay to us kee beevee andar aaee. usay maaloom na tha ki shauhar ko kya hua hai.

⁸patras nay us say poochha, “mujhay bataaen, kya aap ko apnee zameen kay liyay itnee hee raqam milee thee?”

safeera nay javaab diya, “jee, itnee hee raqam thee.”

⁹patras nay kaha, “kyoon aap donon rabb kay rooh ko aazmaanay par muttafiq huay? dekho, jinhon nay aap kay khaavand ko dafnaaya hai vah darvaazay par khaday hain aur aap ko bhee utha kar baahar lay jaaengay.” ¹⁰usee lamhay safeera patras kay paaon men gir kar mar gaee. naujavaan andar aaay to us kee laash dekh kar usay bhee baahar lay gaay aur us kay shauhar kay paas dafan kar diya. ¹¹pooree jamaaat balki har sunnay vaalay par bada khauf taaree ho gaya.

mojize

¹²rasoolon kee maarifat avaam men bahut say ilaahee nishaan aur mojizay zaahir huay. us vaqt tamaam eemaandaar yakdilee say bait-ul-muqaddas men sulemaan kay baraamday men jama hua kartay thay. ¹³baaqee log un say qareebee taalluq rakhnay kee jur’at naheen kartay thay, agarchi avaam un kee bahut izzat kartay thay. ¹⁴to bhee khudaavand par eemaan rakhnay vaalay mard-o-khavaateen kee taadaad badhtee gaee. ¹⁵log apnay mareezon ko chaarpaaiyon aur chataaiyon par rakh kar sadkon par laatay thay taaki jab patras vahaan say guzray to kam az kam us ka saaya kisee na kisee par pad jaaay. ¹⁶bahut say log yarooshalam kay ird-gird kee aabaadiyon say bhee apnay mareezon aur badruh-girifta azeezon ko laatay, aur sab shifa paatay thay.

rasoolon kee eezaarasaanee

¹⁷phir imaam-ay-aazam sadooqee firqay kay tamaam saathiyon kay saath harkat men aaya. hasad say jal kar ¹⁸unhon nay rasoolon ko giriftaar karkay avaamee jel men daal diya. ¹⁹lekin raat ko rabb ka ek farishta qaidkhaanay kay darvaazon ko khol kar unhen baahar laaya. us nay kaha, ²⁰“jaao, bait-ul-muqaddas men khaday ho kar logon ko is naee zindagee say mutaalliq sab baaten sunaao.” ²¹farishtay kee sun kar rasool subah-saveray bait-ul-muqaddas men ja kar taaleem denay lagay.

ab aisa hua ki imaam-ay-aazam apnay saathiyon samet pahuncha aur yahoodee adaalat-ay-aaliya ka ijlaas mun’aqid kiya. is men israaeel kay tamaam buzurg shareek huay. phir unhon nay apnay mulaazimon ko qaidkhaanay men bhej diya taaki rasoolon ko la kar un kay saamnay pesh kiya jaaay. ²²lekin jab vah vahaan pahunchay to pata chala ki rasool jel men naheen hain. vah vaapas aaay aur kahenay lagay, ²³“jab ham pahunchay to jel badee ehatiyaat say band thee aur darvaazon par paheredaar khaday thay. lekin jab ham darvaazon ko khol kar andar gaay to vahaan koee naheen tha!” ²⁴yah sun kar bait-ul-muqaddas kay paheredaaron ka kaptaan aur raahanuma imaam badee uljhan men pad gaay aur sochnay lagay ki ab kya hoga? ²⁵itnay men koee a kar kahenay laga, “baat sunen, jin aadmiyon ko aap nay jel men daala tha vah bait-ul-muqaddas men khaday logon ko taaleem day rahay hain.” ²⁶tab bait-ul-muqaddas kay paheredaaron ka kaptaan apnay mulaazimon kay saath rasoolon kay paas gaya aur unhen laaya, lekin zabardastee naheen, kyoonki vah dartay thay ki jamaashuda log unhen sangasaar na kar den.

²⁷chunaanchay unhon nay rasoolon ko la kar ijlaas kay saamnay khada kiya. imaam-ay-aazam un say mukhaatib hua, ²⁸“ham nay to tum ko sakhtee say mana kiya tha ki is aadmee ka naam lay kar taaleem na do. is kay bar’aks tum nay na sirf apnee taaleem yarooshalam kee har jagah tak pahuncha dee hai balki hamen is aadmee kee maut kay zimmaadaar bhee thaheraana chaahatay ho.”

²⁹patras aur baaqee rasoolon nay javaab diya, “laazim hai ki ham pahelay allaah kee sunen, phir insaan kee. ³⁰hamaaray baapdaada kay khuda nay eesa ko zinda kar diya, usee shakhs ko jisay aap nay saleeb par chadhva kar maar daala tha. ³¹allaah nay usee ko hukmaraan aur najaatadihanda kee haisiyat say sarfaraaz karkay apnay dahenay haath bitha liya taaki vah israaeel ko tauba aur gunaahon kee muaafee ka mauqa faraaham karay. ³²ham khud in baaton kay gavaah hain aur rooh-ul-quds bhee, jisay allaah nay apnay faramaambardaaron ko day diya hai.”

³³yah sun kar adaalat kay log taish men a kar unhen qatl karna chaahatay thay. ³⁴lekin ek fareesee aalim ijlaas men khada hua jis ka naam jamleeel tha. pooree qaum men vah izzatdaar tha. us nay hukm diya ki rasoolon ko thodee der kay liyay ijlaas say nikaal diya jaaay. ³⁵phir us nay kaha, “meray israaeelee bhaaiyo, ghaur say sochen ki aap in aadmiyon kay saath kya karengay. ³⁶kyoonki kuchh der huee thiyoodaas uth kar kahenay laga ki main koee khaas shakhs hoon. taqreeban 400 aadmee us kay peechhay lag gaay. lekin usay qatl kiya gaya aur us kay pairokaar bikhar gaay. un kee sargarmiyon say kuchh na hua. ³⁷is kay baad mardumashumaaree kay dinon men yahoodaah galeelee utha. us nay bhee kaafee logon ko apnay pairokaar bana kar baghaavat karnay par uksaaya. lekin usay bhee maar diya gaya aur us kay pairokaar muntashir huay. ³⁸yah pesh-ay-nazar rakh kar mera mashvra yah hai ki in logon ko chhod den, inhen jaanay den. agar in ka iraada ya sargarmiyaan insaanee hain to sab kuchh khud-ba-khud khatm ho jaaega. ³⁹lekin agar yah allaah kee taraf say hai to aap inhen khatm naheen kar sakengay. aisa na ho ki aakhirkaar aap allaah hee kay khilaaf lad rahay hon.”

haazireen nay us kee baat maan lee. ⁴⁰unhon nay rasoolon ko bula kar un ko koday lagvaaay. phir unhon nay unhen eesa ka naam lay kar bolnay say mana kiya aur phir jaanay diya. ⁴¹rasool yahoodee adaalat-ay-aaliya say nikal kar chalay gaay. yah baat un kay liyay badee khushee ka baais thee ki allaah nay hamen is laaiq samjha hai ki eesa kay naam kee khaatir beizzat ho jaaen. ⁴²is kay baad bhee vah rozaana bait-ul-muqaddas aur mukhtalif gharon men ja ja kar sikhaatay aur is khushkhabaree kee munaadee kartay rahay ki eesa hee maseeh hai.