Āmaal 4

patras aur yoohanna yahoodee adaalat-ay-aaliya kay saamne

¹patras aur yoohanna logon say baat kar hee rahay thay ki imaam, bait-ul-muqaddas kay paheredaaron ka kaptaan aur sadooqee un kay paas pahunchay. ²vah naaraaz thay ki rasool eesa kay jee uthnay kee munaadee karkay logon ko murdon men say jee uthnay kee taaleem day rahay hain. ³unhon nay unhen giriftaar karkay aglay din tak jel men daal diya, kyoonki shaam ho chukee thee. ⁴lekin jinhon nay un ka paighaam sun liya tha un men say bahut say log eemaan laaay. yoon eemaandaaron men mardon kee taadaad badh kar taqreeban 5,000 tak pahunch gaee.

⁵aglay din yarooshalam men yahoodee adaalat-ay-aliya kay sardaaron, buzurgon aur shareeat kay ulma ka ijlaas mun’aqid hua. ⁶imaam-ay-aazam hanna aur isee tarah kaaifa, yoohanna, sikandar aur imaam-ay-aazam kay khaandaan kay deegar mard bhee shaamil thay. ⁷unhon nay donon ko apnay darmiyaan khada karkay poochha, “tum nay yah kaam kis quvvat aur naam say kiya?”

⁸patras nay rooh-ul-quds say maamoor ho kar un say kaha, “qaum kay raahanumaao aur buzurgo, ⁹aaj hamaaree poochhgichh kee ja rahee hai ki ham nay maazoor aadmee par rahem ka izhaar kis kay vaseelay say kiya ki usay shifa mil gaee hai. ¹⁰to phir aap sab aur pooree qaum israaeel jaan lay ki yah naasrat kay eesa maseeh kay naam say hua hai, jisay aap nay masloob kiya aur jisay allaah nay murdon men say zinda kar diya. yah aadmee usee kay vaseelay say sehat pa kar yahaan aap kay saamnay khada hai. ¹¹eesa vah patthar hai jis kay baaray men kalaam-ay-muqaddas men likha hai, ‘jis patthar ko makaan banaanay vaalon nay radd kiya vah konay ka bunyaadee patthar ban gaya.’ aur aap hee nay usay radd kar diya hai. ¹²kisee doosray kay vaseelay say najaat haasil naheen hotee, kyoonki aasmaan kay talay ham insaanon ko koee aur naam naheen bakhsha gaya jis kay vaseelay say ham najaat pa saken.”

¹³patras aur yoohanna kee baaten sun kar log hairaan huay kyoonki vah dileree say baat kar rahay thay agarchi vah na to aalim thay, na unhon nay shareeat kee khaas taaleem paaee thee. saath saath sunnay vaalon nay yah bhee jaan liya ki donon eesa kay saathee hain. ¹⁴lekin choonki vah apnee aankhon say us aadmee ko dekh rahay thay jo shifa pa kar un kay saath khada tha is liyay vah is kay khilaaf koee baat na kar sakay. ¹⁵chunaanchay unhon nay un donon ko ijlaas men say baahar jaanay ko kaha aur aapas men salaah-mashvra karnay lagay, ¹⁶“ham in logon kay saath kya sulook karen? baat vaazih hai ki un kay zareeay ek ilaahee nishaan dikhaaya gaya hai. is ka yarooshalam kay tamaam baashindon ko ilm hua hai. ham is ka inkaar naheen kar saktay. ¹⁷lekin laazim hai ki unhen dhamkee day kar hukm den ki vah kisee bhee shakhs say yah naam lay kar baat na karen, varna yah muaamala qaum men mazeed phail jaaega.”

¹⁸chunaanchay unhon nay donon ko bula kar hukm diya ki vah aainda eesa kay naam say na kabhee bolen aur na taaleem den.

¹⁹lekin patras aur yoohanna nay javaab men kaha, “aap khud faisla kar len, kya yah allaah kay nazdeek theek hai ki ham us kee nisbat aap kee baat maanen? ²⁰mumkin hee naheen ki jo kuchh ham nay dekh aur sun liya hai usay doosron ko sunaanay say baaz rahen.”

²¹tab ijlaas kay maimbaraan nay donon ko mazeed dhamkiyaan day kar chhod diya. vah faisla na kar sakay ki kya saza den, kyoonki tamaam log patras aur yoohanna kay is kaam kee vajah say allaah kee tamjeed kar rahay thay. ²²kyoonki jis aadmee ko mojizaana taur par shifa milee thee vah chaalees saal say ziyaada langda raha tha.

dileree kay liyay duaa

²³un kee rihaaee kay baad patras aur yoohanna apnay saathiyon kay paas vaapas gaay aur sab kuchh sunaaya jo raahanuma imaamon aur buzurgon nay unhen bataaya tha. ²⁴yah sun kar tamaam eemaandaaron nay mil kar oonchee aavaaz say dua kee, “ai aaqa, too nay aasmaan-o-zameen aur samundar ko aur jo kuchh un men hai khalaq kiya hai. ²⁵aur too nay apnay khaadim hamaaray baap daaood kay munh say rooh-ul-quds kee maarifat kaha,

‘aqvaam kyoon taish men a gaee hain?

ummaten kyoon bekaar saazishen kar rahee hain?

²⁶duniya kay baadshaah uth khaday huay,

hukmaraan rabb aur us kay maseeh kay khilaaf jama ho gaay hain.’

²⁷aur vaaqaee yahee kuchh is shaher men hua. herodes antipaas, puntiyus peelaatus, ghairyahoodee aur yahoodee sab teray muqaddas khaadim eesa kay khilaaf jama huay jisay too nay masah kiya tha. ²⁸lekin jo kuchh unhon nay kiya vah too nay apnee qudrat aur marzee say pahelay hee say muqarrar kiya tha. ²⁹ai rabb, ab un kee dhamkiyon par ghaur kar. apnay khaadimon ko apna kalaam sunaanay kee badee dileree ata farma. ³⁰apnee qudrat ka izhaar kar taaki ham teray muqaddas khaadim eesa kay naam say shifa, ilaahee nishaan aur mojizay dikha saken.”

³¹dua kay ikhtitaam par vah jagah hil gaee jahaan vah jama thay. sab rooh-ul-quds say maamoor ho gaay aur dileree say allaah ka kalaam sunaanay lagay.

eemaandaaron kee mushtaraka milkiyat

³²eemaandaaron kee pooree jamaaat yakdil thee. kisee nay bhee apnee milkiyat kee kisee cheez kay baaray men naheen kaha ki yah meree hai balki un kee har cheez mushtaraka thee. ³³aur rasool baday ikhtiyaar kay saath khudaavand eesa kay jee uthnay kee gavaahee detay rahay. allaah kee badee meharbaanee un sab par thee. ³⁴un men say koee bhee zarooratmand naheen tha, kyoonki jis kay paas bhee zameenen ya makaan thay us nay unhen farokht karkay raqam ³⁵rasoolon kay paaon men rakh dee. yoon jamaashuda paison men say har ek ko utnay diay jaatay jitnon kee usay zaroorat hotee thee.

³⁶maslan yoosuf naamee ek aadmee tha jis ka naam rasoolon nay barnabaas (hausalaaafzaaee ka beta) rakha tha. vah laavee qabeelay say aur jazeera-ay-qubrus ka rahenay vaala tha. ³⁷us nay apna ek khet farokht karkay paisay rasoolon kay paaon men rakh diay.