Āmaal 3

langday aadmee kee shifaa

¹ek dopaher patras aur yoohanna dua karnay kay liyay bait-ul-muqaddas kee taraf chal paday. teen baj gaay thay. ²us vaqt log ek paidaaishee langday ko utha kar vahaan la rahay thay. rozaana usay sahen kay us darvaazay kay paas laaya jaata tha jo ‘khoobsoorat darvaaza’ kahelaata tha taaki vah bait-ul-muqaddas kay sahenon men daakhil honay vaalon say bheek maang sakay. ³patras aur yoohanna bait-ul-muqaddas men daakhil honay vaalay thay to langda un say bheek maangnay laga. ⁴patras aur yoohanna ghaur say us kee taraf dekhnay lagay. phir patras nay kaha, “hamaaree taraf dekhen.” ⁵is tavaqqo say ki usay kuchh milega langda un kee taraf mutavajjih hua. ⁶lekin patras nay kaha, “meray paas na to chaandee hai, na sona, lekin jo kuchh hai vah aap ko day deta hoon. naasrat kay eesa maseeh kay naam say uthen aur chalen phiren!” ⁷us nay us ka dahena haath pakad kar usay khada kiya. usee vaqt langday kay paaon aur takhnay mazboot ho gaay. ⁸vah uchhal kar khada hua aur chalnay phirnay laga. phir vah chaltay, koodtay aur allaah kee tamjeed kartay huay un kay saath bait-ul-muqaddas men daakhil hua. ⁹aur tamaam logon nay usay chaltay phirtay aur allaah kee tamjeed kartay huay dekha. ¹⁰jab unhon nay jaan liya ki yah vahee aadmee hai jo khoobsoorat naamee darvaazay par baitha bheek maanga karta tha to vah us kee tabdeelee dekh kar dang rah gaay.

bait-ul-muqaddas men patras ka paighaam

¹¹vah sab daud kar sulemaan kay baraamday men aaay jahaan bheek maangnay vaala ab tak patras aur yoohanna say lipta hua tha. ¹²yah dekh kar patras un say mukhaatib hua, “israaeel kay hazraat, aap yah dekh kar kyoon hairaan hain? aap kyoon ghoor ghoor kar hamaaree taraf dekh rahay hain goya ham nay apnee zaatee taaqat ya deendaaree kay baais yah kiya hai ki yah aadmee chal phir sakay? ¹³yah hamaaray baapdaada kay khuda, ibraaheem, ishaaq aur yaaqoob kay khuda kee taraf say hai jis nay apnay banday eesa ko jalaal diya hai. yah vahee eesa hai jisay aap nay dushman kay havaalay karkay peelaatus kay saamnay radd kiya, agarchi vah usay riha karnay ka faisla kar chuka tha. ¹⁴aap nay us quddoos aur raastbaaz ko radd karkay taqaaza kiya ki peelaatus us kay ivz ek qaatil ko riha karkay aap ko day day. ¹⁵aap nay zindagee kay sardaar ko qatl kiya, lekin allaah nay usay murdon men say zinda kar diya. ham is baat kay gavaah hain. ¹⁶aap to is aadmee say vaaqif hain jisay dekh rahay hain. ab vah eesa kay naam par eemaan laanay say bahaal ho gaya hai, kyoonki jo eemaan eesa kay zareeay milta hai usee nay is aadmee ko aap kay saamnay pooree sehatmandee ata kee.

¹⁷meray bhaaiyo, main jaanta hoon ki aap aur aap kay raahanumaaon ko saheeh ilm naheen tha, is liyay aap nay aisa kiya. ¹⁸lekin allaah nay vah kuchh poora kiya jis kee peshgoee us nay tamaam nabiyon kee maarifat kee thee, yaanee yah ki us ka maseeh dukh uthaaega. ¹⁹ab tauba karen aur allaah kee taraf rujoo laaen taaki aap kay gunaahon ko mitaaya jaaay. ²⁰phir aap ko rabb kay huzoor say taazgee kay din muyassar aaengay aur vah dubaara eesa yaanee maseeh ko bhej dega jisay aap kay liyay muqarrar kiya gaya hai. ²¹laazim hai ki vah us vaqt tak aasmaan par rahay jab tak allaah sab kuchh bahaal na kar day, jis tarah vah ibtida say apnay muqaddas nabiyon kee zabaanee farmaata aaya hai. ²²kyoonki moosa nay kaha, ‘rabb tumhaara khuda tumhaaray vaastay tumhaaray bhaaiyon men say mujh jaisay nabee ko barpa karega. jo bhee baat vah kahay us kee sunna. ²³jo naheen sunega usay mita kar qaum say nikaal diya jaaega.’ ²⁴aur samooel say lay kar har nabee nay in dinon kee peshgoee kee hai. ²⁵aap to in nabiyon kee aulaad aur us ahd kay vaaris hain jo allaah nay aap kay baapdaada say qaaim kiya tha, kyoonki us nay ibraaheem say kaha tha, ‘teree aulaad say duniya kee tamaam qaumen barkat paaengee.’ ²⁶jab allaah nay apnay banday eesa ko barpa kiya to pahelay usay aap kay paas bhej diya taaki vah aap men say har ek ko us kee buree raahon say pher kar barkat day.”