Āmaal 27
paulus ka rom kee taraf safar
1jab hamaara itlee kay liyay safar mut’ayyin kiya gaya to paulus ko chand ek aur qaidiyon samet ek romee afsar [a] sau sipaahiyon par muqarrar afsar. kay havaalay kiya gaya jis ka naam yooliyus tha jo shaahee paltan par muqarrar tha. 2aristarkhus bhee hamaaray saath tha. vah thissaluneekay shaher ka makidunee aadmee tha. ham adramittiyum shaher kay ek jahaaz par savaar huay jisay sooba aasiya kee chand bandaragaahon ko jaana tha. 3aglay din ham saida pahunchay to yooliyus nay meharbaanee karkay paulus ko shaher men us kay doston kay paas jaanay kee ijaazat dee taaki vah us kee zarooriyaat pooree kar saken. 4jab ham vahaan say ravaana huay to mukhaalif havaaon kee vajah say jazeera-ay-qubrus aur sooba aasiya kay darmiyaan say guzray. 5phir khulay samundar par chaltay chaltay ham kilikiya aur pamfeeliya kay samundar say guzar kar sooba lookiya kay shaher moora pahunchay. 6vahaan qaidiyon par muqarrar afsar ko pata chala ki iskandariya ka ek misree jahaaz itlee ja raha hai. us par us nay hamen savaar kiya.
7kaee din ham aahista aahista chalay aur badee mushkil say kanidus kay qareeb pahunchay. lekin mukhaalif hava kee vajah say ham nay jazeera-ay-kretay kee taraf rukh kiya aur salmonay shaher kay qareeb say guzar kar kretay kee aad men safar kiya. 8lekin vahaan ham saahil kay saath saath chaltay huay badee mushkil say ek jagah pahunchay jis ka naam ‘haseen-bandar’ tha. shaher lasya us kay qareeb vaaqay tha.
9bahut vaqt zaaay ho gaya tha aur ab baheree safar khatarnaak bhee ho chuka tha, kyoonki kaffaara ka din (taqreeban navambar kay shuroo men) guzar chuka tha. is liyay paulus nay unhen aagaah kiya, 10“hazraat, mujhay pata hai ki aagay ja kar ham par badee museebat aaegee. hamen jahaaz, maal-o-asbaab aur jaanon ka nuqsaan uthaana padega.” 11lekin qaidiyon par muqarrar romee afsar nay us kee baat nazar’andaaz karkay jahaaz kay naakhuda aur maalik kee baat maanee. 12choonki ‘haseen-bandar’ men jahaaz ko sardiyon kay mausam kay liyay rakhna mushkil tha is liyay aksar log aagay feniks tak pahunch kar sardiyon ka mausam guzaarna chaahatay thay. kyoonki feniks jazeera-ay-kretay kee achchhee bandargaah thee jo sirf junoob-maghrib aur shimaal-maghrib kee taraf khulee thee.
samundar par toofaan
13chunaanchay ek din jab junoob kee simt say halkee see hava chalnay lagee to mallaahon nay socha ki hamaara iraada poora ho gaya hai. vah langar utha kar kretay kay saahil kay saath saath chalnay lagay. 14lekin thodee hee der kay baad mausam badal gaya aur un par jazeeray kee taraf say ek toofaanee hava toot padee jo baad-ay-shimaal-mashriqee kahelaatee hai. 15jahaaz hava kay qaaboo men a gaya aur hava kee taraf rukh na kar saka, is liyay ham nay haar maan kar jahaaz ko hava kay saath saath chalnay diya. 16jab ham ek chhotay jazeera banaam kauda kee aad men say guzarnay lagay to ham nay badee mushkil say bachaao-kashtee ko jahaaz par utha kar mahfooz rakha. (ab tak vah rassay say jahaaz kay saath khainchee ja rahee thee.) 17phir mallaahon nay jahaaz kay dhaanchay ko ziyaada mazboot banaanay kee khaatir us kay ird-gird rassay baandhay. khauf yah tha ki jahaaz shimaalee afreeqa kay qareeb paday chorbaaloo men dhans jaaay. (in reton ka naam soortis tha.) is say bachnay kay liyay unhon nay langar daal diyaa [b] langar yaanee chhota langar jis kee madad say jahaaz ka rukh ek hee simt men rakha jaata hai. taaki jahaaz kuchh aahista chalay. yoon jahaaz hava kay saath chaltay chaltay aagay badha. 18aglay din bhee toofaan jahaaz ko itnee shiddat say jhanjhod raha tha ki mallaah maal-o-asbaab ko samundar men phainknay lagay. 19teesray din unhon nay apnay hee haathon say jahaaz chalaanay ka kuchh saamaan samundar men phaink diya. 20toofaan kee shiddat bahut dinon kay baad bhee khatm na huee. na sooraj aur na sitaaray nazar aaay yahaan tak ki aakhirkaar hamaaray bachnay kee har ummeed jaatee rahee.
21kaafee der say dil naheen chaahata tha ki khaana khaaya jaaay. aakhirkaar paulus nay logon kay beech men khaday ho kar kaha, “hazraat, behatar hota ki aap meree baat maan kar kretay say ravaana na hotay. phir aap is museebat aur khasaaray say bach jaatay. 22lekin ab main aap ko naseehat karta hoon ki hausla rakhen. aap men say ek bhee naheen marega. sirf jahaaz tabaah ho jaaega. 23kyoonki pichhlee raat ek farishta meray paas a khada hua, usee khuda ka farishta jis ka main banda hoon aur jis kee ibaadat main karta hoon. 24us nay kaha, ‘paulus, mat dar. laazim hai ki tujhay shahenshaah kay saamnay pesh kiya jaaay. aur allaah apnee meharbaanee say teray vaastay tamaam hamsafron kee jaanen bhee bachaaay rakhega.’ 25is liyay hausla rakhen, kyoonki mera allaah par eemaan hai ki aisa hee hoga jis tarah us nay farmaaya hai. 26lekin jahaaz ko kisee jazeeray kay saahil par chadh jaana hai.”
27toofaan kee chaudhveen raat jahaaz baheera-ay-adriya par bahay chala ja raha tha ki taqreeban aadhee raat ko mallaahon nay mahsoos kiya ki saahil nazdeek a raha hai. 28paanee kee gaheraaee kee paimaaish karkay unhen maaloom hua ki vah 120 fut thee. thodee der kay baad us kee gaheraaee 90 fut ho chukee thee. 29vah dar gaay, kyoonki unhon nay andaaza lagaaya ki khatra hai ki ham saahil par padee chataanon say takra jaaen. is liyay unhon nay jahaaz kay pichhlay hissay say chaar langar daal kar dua kee ki din jaldee say chadh jaaay. 30us vaqt mallaahon nay jahaaz say faraar honay kee koshish kee. unhon nay yah bahaana bana kar ki ham jahaaz kay saamnay say bhee langar daalna chaahatay hain bachaao-kashtee paanee men utarnay dee. 31is par paulus nay qaidiyon par muqarrar afsar aur faujiyon say kaha, “agar yah aadmee jahaaz par na rahen to aap sab mar jaaengay.” 32chunaanchay unhon nay bachaao kashtee kay rassay ko kaat kar usay khula chhod diya.
33pau phatnay vaalee thee ki paulus nay sab ko samjhaaya ki vah kuchh kha len. us nay kaha, “aap nay chaudah din say iztiraab kee haalat men rah kar kuchh naheen khaaya. 34ab meharbaanee karkay kuchh kha len. yah aap kay bachaao kay liyay zarooree hai, kyoonki aap na sirf bach jaaengay balki aap ka ek baal bhee beeka naheen hoga.” 35yah kah kar us nay kuchh rotee lee aur un sab kay saamnay allaah say shukrguzaaree kee dua kee. phir usay tod kar khaanay laga. 36is say doosron kee hausalaaafzaaee huee aur unhon nay bhee kuchh khaana khaaya. 37jahaaz par ham 276 afraad thay. 38jab sab ser ho gaay to gandum ko bhee samundar men phainka gaya taaki jahaaz aur halka ho jaaay.
jahaaz tukday tukday ho jaata hai
39jab din chadh gaya to mallaahon nay saahilee ilaaqay ko na pahechaana. lekin ek khaleej nazar aaee jis ka saahil achchha tha. unhen khayaal aaya ki shaayad ham jahaaz ko vahaan khushkee par chadha saken. 40chunaanchay unhon nay langaron kay rassay kaat kar unhen samundar men chhod diya. phir unhon nay vah rassay khol diay jin say patvaar bandhay hotay thay aur saamnay vaalay baadbaan ko chadha kar hava kay zor say saahil kee taraf rukh kiya. 41lekin chaltay chaltay jahaaz ek chorbaaloo say takra kar us par chadh gaya. jahaaz ka maatha dhans gaya yahaan tak ki vah hil bhee na saka jabki us ka pichhla hissa maujon kee takkaron say tukday tukday honay laga.
42faujee qaidiyon ko qatl karna chaahatay thay taaki vah jahaaz say tair kar faraar na ho saken. 43lekin un par muqarrar afsar paulus ko bachaana chaahata tha, is liyay us nay unhen aisa karnay na diya. us nay hukm diya ki pahelay vah sab jo tair saktay hain paanee men chhalaang laga kar kinaaray tak pahunchen. 44baaqiyon ko takhton ya jahaaz kay kisee tukday ko pakad kar pahunchna tha. yoon sab saheeh-salaamat saahil tak pahunchay.