Āmaal 25
paulus shahenshaah say apeel karta hai
1qaisriya pahunchnay kay teen din baad festus yarooshalam chala gaya. 2vahaan raahanuma imaamon aur baaqee yahoodee raahanumaaon nay us kay saamnay paulus par apnay ilzaamaat pesh kiay. unhon nay baday zor se 3minnat kee ki vah un kee riaayat karkay paulus ko yarooshalam muntaqil karay. vajah yah thee ki vah ghaat men baith kar raastay men paulus ko qatl karna chaahatay thay. 4lekin festus nay javaab diya, “paulus ko qaisriya men rakha gaya hai aur main khud vahaan jaanay ko hoon. 5agar us say koee jurm sarzad hua hai to aap kay kuchh raahanuma meray saath vahaan ja kar us par ilzaam lagaaen.”
6festus nay mazeed aath das din un kay saath guzaaray, phir qaisriya chala gaya. aglay din vah adaalat karnay kay liyay baitha aur paulus ko laanay ka hukm diya. 7jab paulus pahuncha to yarooshalam say aaay huay yahoodee us kay ird-gird khaday huay aur us par kaee sanjeeda ilzaamaat lagaaay, lekin vah koee bhee baat saabit na kar sakay. 8paulus nay apna difa karkay kaha, “mujh say na yahoodee shareeat, na bait-ul-muqaddas aur na shahenshaah kay khilaaf jurm sarzad hua hai.”
9lekin festus yahoodiyon kay saath riaayat baratna chaahata tha, is liyay us nay poochha, “kya aap yarooshalam ja kar vahaan kee adaalat men meray saamnay pesh kiay jaanay kay liyay tayyaar hain?”
10paulus nay javaab diya, “main shahenshaah kee romee adaalat men khada hoon aur laazim hai ki yaheen mera faisla kiya jaaay. aap bhee is say khoob vaaqif hain ki main nay yahoodiyon say koee naainsaafee naheen kee. 11agar mujh say koee aisa kaam sarzad hua ho jo saza-ay-maut kay laaiq ho to main marnay say inkaar naheen karoonga. lekin agar bequsoor hoon to kisee ko bhee mujhay in aadmiyon kay havaalay karnay ka haq naheen hai. main shahenshaah say apeel karta hoon!”
12yah sun kar festus nay apnee kaunsal say mashvra karkay kaha, “aap nay shahenshaah say apeel kee hai, is liyay aap shahenshaah hee kay paas jaaengay.”
paulus agrippa aur birneekay kay saamne
13kuchh din guzar gaay to agrippa baadshaah apnee bahen birneekay kay saath festus say milnay aaya. 14vah kaee din vahaan thaheray rahay. itnay men festus nay paulus kay muaamalay par baadshaah kay saath baat kee. us nay kaha, “yahaan ek qaidee hai jisay pheliks chhod kar chala gaya hai. 15jab main yarooshalam gaya to raahanuma imaamon aur yahoodee buzurgon nay us par ilzaamaat laga kar usay mujrim qaraar denay ka taqaaza kiya. 16main nay unhen javaab diya, ‘romee qaanoon kisee ko adaalat men pesh kiay baghair mujrim qaraar naheen deta. laazim hai ki usay pahelay ilzaam lagaanay vaalon ka saamna karnay ka mauqa diya jaaay taaki apna difa kar sakay.’ 17jab us par ilzaam lagaanay vaalay yahaan pahunchay to main nay taakheer na kee. main nay aglay hee din adaalat mun’aqid karkay paulus ko pesh karnay ka hukm diya. 18lekin jab us kay mukhaalif ilzaam lagaanay kay liyay khaday huay to vah aisay jurm naheen thay jin kee tavaqqo main kar raha tha. 19un ka us kay saath koee aur jhagda tha jo un kay apnay mazhab aur ek murda aadmee banaam eesa say taalluq rakhta hai. is eesa kay baaray men paulus daava karta hai ki vah zinda hai. 20main uljhan men pad gaya kyoonki mujhay maaloom naheen tha ki kis tarah is muaamalay ka saheeh jaaiza loon. chunaanchay main nay poochha, ‘kya aap yarooshalam ja kar vahaan adaalat men pesh kiay jaanay kay liyay tayyaar hain?’ 21lekin paulus nay apeel kee, ‘shahenshaah hee mera faisla karay.’ phir main nay hukm diya ki usay us vaqt tak qaid men rakha jaaay jab tak usay shahenshaah kay paas bhejnay ka intizaam na karva sakoon.”
22agrippa nay festus say kaha, “main bhee us shakhs ko sunna chaahata hoon.”
us nay javaab diya, “kal hee aap us ko sun lengay.”
23aglay din agrippa aur birneekay badee dhoomdhaam kay saath aaay aur baday faujee afsaron aur shaher kay naamvar aadmiyon kay saath deevaan-ay-aam men daakhil huay. festus kay hukm par paulus ko andar laaya gaya. 24festus nay kaha, “agrippa baadshaah aur tamaam khavaateen-o-hazraat! aap yahaan ek aadmee ko dekhtay hain jis kay baaray men tamaam yahoodee khwaah vah yarooshalam kay rahenay vaalay hon, khwaah yahaan kay, shor macha kar saza-ay-maut ka taqaaza kar rahay hain. 25meree daanist men to is nay koee aisa kaam naheen kiya jo saza-ay-maut kay laaiq ho. lekin is nay shahenshaah say apeel kee hai, is liyay main nay isay rom bhejnay ka faisla kiya hai. 26lekin main shahenshaah ko kya likh doon? kyoonki is par koee saaf ilzaam naheen lagaaya gaya. is liyay main isay aap sab kay saamnay laaya hoon, khaaskar agrippa baadshaah aap kay saamnay, taaki aap is kee tafteesh karen aur main kuchh likh sakoon. 27kyoonki mujhay betukee see baat lag rahee hai ki ham ek qaidee ko rom bhejen jis par ab tak saaf ilzaamaat naheen lagaaay gaay hain.”