Āmaal 24
paulus par muqaddmaa
1paanch din kay baad imaam-ay-aazam hananiyaah, kuchh yahoodee buzurg aur ek vakeel banaam tirtullus qaisriya aaay taaki gavarnar kay saamnay paulus par apna ilzaam pesh karen. 2paulus ko bulaaya gaya to tirtullus nay pheliks ko yahoodiyon ka ilzaam pesh kiya,
“aap kay zer-ay-hukoomat hamen bada amn-o-amaan haasil hai, aur aap kee door’andeshee say is mulk men bahut taraqqee huee hai. 3muazzaz pheliks, in tamaam baaton kay liyay ham aap kay khaas mamnoon hain. 4lekin main naheen chaahata ki aap meree baaton say hadd say ziyaada thak jaaen. arz sirf yah hai ki aap ham par meharbaanee ka izhaar karkay ek lamhay kay liyay hamaaray muaamalay par tavajjuh den. 5ham nay is aadmee ko avaam dushman paaya hai jo pooree duniya kay yahoodiyon men fasaad paida karta raheta hai. yah naasree firqay ka ek sarghana hai 6aur hamaaray bait-ul-muqaddas kee behuramtee karnay kee koshish kar raha tha jab ham nay isay pakda [taaki apnee shareeat kay mutaabiq is par muqaddma chalaaen. 7magar loosiyaas kamaandar a kar isay zabardastee ham say chheen kar lay gaya aur hukm diya ki is kay muddaee aap kay paas haazir hon.] 8is kee poochhgichh karkay aap khud hamaaray ilzaamaat kee tasdeeq kara saktay hain.” 9phir baaqee yahoodiyon nay us kee haan men haan mila kar kaha ki yah vaaqaee aisa hee hai.
paulus ka difaa
10gavarnar nay ishaara kiya ki paulus apnee baat pesh karay. us nay javaab men kaha,
“main jaanta hoon ki aap kaee saalon say is qaum kay jaj muqarrar hain, is liyay khushee say aap ko apna difa pesh karta hoon. 11aap khud maaloom kar saktay hain ki mujhay yarooshalam gaay sirf baarah din huay hain. jaanay ka maqsad ibaadat men shareek hona tha. 12vahaan na main nay bait-ul-muqaddas men kisee say bahs-mubaahasa kiya, na shaher kay kisee ibaadatkhaanay men ya kisee aur jagah halchal machaaee. in logon nay bhee meree koee aisee harkat naheen dekhee. 13jo ilzaam yah mujh par laga rahay hain us ka koee bhee saboot pesh naheen kar saktay. 14beshak main tasleem karta hoon ki main usee raah par chalta hoon jisay yah bid’at qaraar detay hain. lekin main apnay baapdaada kay khuda kee parastish karta hoon. jo kuchh bhee shareeat aur nabiyon kay saheefon men likha hai usay main maanta hoon. 15aur main allaah par vahee ummeed rakhta hoon jo yah bhee rakhtay hain, ki qiyaamat ka ek din hoga jab vah raastbaazon aur naaraaston ko murdon men say zinda kar dega. 16is liyay meree pooree koshish yahee hotee hai ki har vaqt mera zameer allaah aur insaan kay saamnay saaf ho.
17kaee saalon kay baad main yarooshalam vaapas aaya. meray paas qaum kay ghareebon kay liyay khairaat thee aur main bait-ul-muqaddas men qurbaaniyaan bhee pesh karna chaahata tha. 18mujh par ilzaam lagaanay vaalon nay mujhay bait-ul-muqaddas men dekha jab main tahaarat kee rusoomaat ada kar raha tha. us vaqt na koee hujoom tha, na fasaad. 19lekin sooba aasiya kay kuchh yahoodee vahaan thay. agar unhen meray khilaaf koee shikaayat hai to unhen hee yahaan haazir ho kar mujh par ilzaam lagaana chaahiay. 20ya yah log khud bataaen ki jab main yahoodee adaalat-ay-aaliya kay saamnay khada tha to unhon nay mera kya jurm maaloom kiya. 21sirf yah ek jurm ho sakta hai ki main nay us vaqt un kay huzoor pukaar kar yah baat bayaan kee, ‘aaj mujh par is liyay ilzaam lagaaya ja raha hai ki main eemaan rakhta hoon ki murday jee uthengay’.”
22pheliks nay jo eesa kee raah say khoob vaaqif tha muqaddma multavee kar diya. us nay kaha, “jab kamaandar loosiyaas aaengay phir main faisla doonga.” 23us nay paulus par muqarrar afsar [a] sau sipaahiyon par muqarrar afsar. ko hukm diya ki vah us kee paheraadaaree to karay lekin usay kuchh sahooliyaat bhee day aur us kay azeezon ko us say milnay aur us kee khidmat karnay say na rokay.
paulus pheliks aur droosilla kay saamne
24kuchh dinon kay baad pheliks apnee aheliya droosilla kay hamraah vaapas aaya. droosilla yahoodee thee. paulus ko bula kar unhon nay eesa par eemaan kay baaray men us kee baaten suneen. 25lekin jab raastbaazee, zabt-ay-nafs aur aanay vaalee adaalat kay mazaameen chhid gaay to pheliks nay ghabra kar us kee baat kaatee, “filahaal kaafee hai. ab ijaazat hai, jab meray paas vaqt hoga main aap ko bula loonga.” 26saath saath vah yah ummeed bhee rakhta tha ki paulus rishvat dega, is liyay vah kaee baar usay bula kar us say baat karta raha.
27do saal guzar gaay to pheliks kee jagah purkiyus festus a gaya. taaham us nay paulus ko qaidkhaanay men chhod diya, kyoonki vah yahoodiyon kay saath riaayat baratna chaahata tha.