Āmaal 23
1paulus nay ghaur say adaalat-ay-aaliya kay maimbaraan kee taraf dekh kar kaha, “bhaaiyo, aaj tak main nay saaf zameer kay saath allaah kay saamnay zindagee guzaaree hai.” 2is par imaam-ay-aazam hananiyaah nay paulus kay qareeb khaday logon say kaha ki vah us kay munh par thappad maaren. 3paulus nay us say kaha, “makkaar [a] lafzee tarjuma : saphedee kee huee deevaar. ! allaah tum ko hee maarega, kyoonki tum yahaan baithay shareeat kay mutaabiq mera faisla karna chaahatay ho jabki mujhay maarnay ka hukm day kar khud shareeat kee khilaafvarzee kar rahay ho!”
4paulus kay qareeb khaday aadmiyon nay kaha, “tum allaah kay imaam-ay-aazam ko bura kahenay kee jur’at kyoonkar kartay ho?”
5paulus nay javaab diya, “bhaaiyo, mujhay maaloom na tha ki vah imaam-ay-aazam hain, varna aisay alfaaz istemaal na karta. kyoonki kalaam-ay-muqaddas men likha hai ki apnee qaum kay haakimon ko bura-bhala mat kahena.”
6paulus ko ilm tha ki adaalat-ay-aaliya kay kuchh log sadooqee hain jabki deegar fareesee hain. is liyay vah ijlaas men pukaar utha, “bhaaiyo, main fareesee balki fareesee ka beta bhee hoon. mujhay is liyay adaalat men pesh kiya gaya hai ki main murdon men say jee uthnay kee ummeed rakhta hoon.”
7is baat say fareesee aur sadooqee ek doosray say jhagadnay lagay aur ijlaas kay afraad do gurohon men bat gaay. 8vajah yah thee ki sadooqee naheen maantay ki ham jee uthengay. vah farishton aur roohon ka bhee inkaar kartay hain. is kay muqaablay men fareesee yah sab kuchh maantay hain. 9hotay hotay bada shor mach gaya. fareesee firqay kay kuchh aalim khaday ho kar josh say bahs karnay lagay, “hamen is aadmee men koee ghaltee nazar naheen aatee, shaayad koee rooh ya farishta is say hamkalaam hua ho.”
10jhagday nay itna zor pakda ki kamaandar dar gaya, kyoonki khatra tha ki vah paulus kay tukday kar daalen. is liyay us nay apnay faujiyon ko hukm diya ki vah utren aur paulus ko yahoodiyon kay beech men say chheen kar qilaay men vaapas laaen.
11usee raat khudaavand paulus kay paas a khada hua aur kaha, “hausla rakh, kyoonki jis tarah too nay yarooshalam men meray baaray men gavaahee dee hai laazim hai ki isee tarah rom shaher men bhee gavaahee day.”
paulus kay khilaaf saazish
12aglay din kuchh yahoodiyon nay saazish karkay qasam khaaee, “ham na to kuchh khaaengay, na piengay jab tak paulus ko qatl na kar len.” 13chaalees say ziyaada mardon nay is saazish men hissa liya. 14vah raahanuma imaamon aur buzurgon kay paas gaay aur kaha, “ham nay pakkee qasam khaaee hai ki kuchh naheen khaaengay jab tak paulus ko qatl na kar len. 15ab zara yahoodee adaalat-ay-aaliya kay saath mil kar kamaandar say guzaarish karen ki vah usay dubaara aap kay paas laaen. bahaana yah pesh karen ki aap mazeed tafseel say us kay muaamalay ka jaaiza lena chaahatay hain. jab usay laaya jaaega to ham us kay yahaan pahunchnay say pahelay pahelay usay maar daalnay kay liyay tayyaar hongay.”
16lekin paulus kay bhaanjay ko is baat ka pata chal gaya. us nay qilaay men ja kar paulus ko ittila dee. 17is par paulus nay romee afsaron [b] sau sipaahiyon par muqarrar afsar. men say ek ko bula kar kaha, “is javaan ko kamaandar kay paas lay jaaen. is kay paas un kay liyay khabar hai.” 18afsar bhaanjay ko kamaandar kay paas lay gaya aur kaha, “qaidee paulus nay mujhay bula kar mujh say guzaarish kee ki is naujavaan ko aap kay paas lay aaoon. us kay paas aap kay liyay khabar hai.”
19kamaandar naujavaan ka haath pakad kar doosron say alag ho gaya. phir us nay poochha, “kya khabar hai jo aap mujhay bataana chaahatay hain?”
20us nay javaab diya, “yahoodee aap say darakhwaast karnay par muttafiq ho gaay hain ki aap kal paulus ko dubaara yahoodee adaalat-ay-aaliya kay saamnay laaen. bahaana yah hoga ki vah aur ziyaada tafseel say us kay baaray men maaloomaat haasil karna chaahatay hain. 21lekin un kee baat na maanen, kyoonki un men say chaalees say ziyaada aadmee us kee taak men baithay hain. unhon nay qasam khaaee hai ki ham na kuchh khaaengay na piengay jab tak usay qatl na kar len. vah abhee tayyaar baithay hain aur sirf is intizaar men hain ki aap un kee baat maanen.”
22kamaandar nay naujavaan ko rukhsat karkay kaha, “jo kuchh aap nay mujhay bata diya hai us ka kisee say zikr na karna.”
paulus ko gavarnar pheliks kay paas bheja jaata hai
23phir kamaandar nay apnay afsaron men say do ko bulaaya jo sau sau faujiyon par muqarrar thay. us nay hukm diya, “do sau faujee, sattar ghudsavaar aur do sau nezaabaaz tayyaar karen. unhen aaj raat ko nau bajay qaisriya jaana hai. 24paulus kay liyay bhee ghoday tayyaar rakhna taaki vah saheeh-salaamat gavarnar kay paas pahunchay.” 25phir us nay yah khat likha,
26“az : klaudiyus loosiyaas
muazzaz gavarnar pheliks ko salaam. 27yahoodee is aadmee ko pakad kar qatl karnay ko thay. mujhay pata chala ki yah romee shaheree hai, is liyay main nay apnay daston kay saath a kar isay nikaal kar bacha liya. 28main maaloom karna chaahata tha ki vah kyoon is par ilzaam laga rahay hain, is liyay main utar kar isay un kee adaalat-ay-aaliya kay saamnay laaya. 29mujhay maaloom hua ki un ka ilzaam un kee shareeat say taalluq rakhta hai. lekin is nay aisa kuchh naheen kiya jis kee bina par yah jel men daalnay ya saza-ay-maut kay laaiq ho. 30phir mujhay ittila dee gaee ki is aadmee ko qatl karnay kee saazish kee gaee hai, is liyay main nay isay fauran aap kay paas bhej diya. main nay ilzaam lagaanay vaalon ko bhee hukm diya ki vah is par apna ilzaam aap ko hee pesh karen.”
31faujiyon nay usee raat kamaandar ka hukm poora kiya. paulus ko saath lay kar vah anteepatris tak pahunch gaay. 32aglay din payaaday qilaay ko vaapas chalay jabki ghudasavaaron nay paulus ko lay kar safar jaaree rakha. 33qaisriya pahunch kar unhon nay paulus ko khat samet gavarnar pheliks kay saamnay pesh kiya. 34us nay khat padh liya aur phir paulus say poochha, “aap kis soobay kay hain?” paulus nay kaha, “kilikiya ka.” 35is par gavarnar nay kaha, “main aap kee samaaat us vaqt karoonga jab aap par ilzaam lagaanay vaalay pahunchengay.” aur us nay hukm diya ki herodes kay mahel men paulus kee paheraadaaree kee jaaay.