Āmaal 22
1“bhaaiyo aur buzurgo, meree baat sunen ki main apnay difa men kuchh bataaoon.” 2jab unhon nay suna ki vah araamee zabaan men bol raha hai to vah mazeed khaamosh ho gaay. paulus nay apnee baat jaaree rakhee.
3“main yahoodee hoon aur kilikiya kay shaher tarsus men paida hua. lekin main nay isee shaher yarooshalam men parvarish paaee aur jamleeel kay zer-ay-nigraanee taaleem haasil kee. unhon nay mujhay tafseel aur ehatiyaat say hamaaray baapdaada kee shareeat sikhaaee. us vaqt main bhee aap kee tarah allaah kay liyay sargarm tha. 4is liyay main nay is naee raah kay pairokaaron ka peechha kiya aur mardon aur khavaateen ko giriftaar karkay jel men dalva diya yahaan tak ki marva bhee diya. 5imaam-ay-aazam aur yahoodee adaalat-ay-aaliya kay maimbaraan is baat kee tasdeeq kar saktay hain. un hee say mujhay damishq men rahenay vaalay yahoodee bhaaiyon kay liyay sifaarishee khat mil gaay taaki main vahaan bhee ja kar is naay firqay kay logon ko giriftaar karkay saza denay kay liyay yarooshalam laaoon.
paulus kee tabdeelee ka bayaan
6main is maqsad kay liyay damishq kay qareeb pahunch gaya tha ki achaanak aasmaan kee taraf say ek tez raushnee meray gird chamkee. 7main zameen par gir pada to ek aavaaz sunaaee dee, ‘saaool, saaool, too mujhay kyoon sataata hai?’ 8main nay poochha, ‘khudaavand, aap kaun hain?’ aavaaz nay javaab diya, ‘main eesa naasree hoon jisay too sataata hai.’ 9meray hamsafron nay raushnee ko to dekha, lekin mujh say mukhaatib honay vaalay kee aavaaz na sunee. 10main nay poochha, ‘khudaavand, main kya karoon?’ khudaavand nay javaab diya, ‘uth kar damishq men ja. vahaan tujhay vah saara kaam bataaya jaaega jo allaah teray zimmay lagaanay ka iraada rakhta hai.’ 11raushnee kee tezee nay mujhay andha kar diya tha, is liyay meray saathee mera haath pakad kar mujhay damishq lay gaay.
12vahaan ek aadmee raheta tha jis ka naam hananiyaah tha. vah shareeat ka kattar pairokaar tha aur vahaan kay rahenay vaalay yahoodiyon men neknaam. 13vah aaya aur meray paas khaday ho kar kaha, ‘saaool bhaaee, dubaara beena ho jaaen!’ usee lamhay main usay dekh saka. 14phir us nay kaha, ‘hamaaray baapdaada kay khuda nay aap ko is maqsad kay liyay chun liya hai ki aap us kee marzee jaan kar us kay raast khaadim ko dekhen aur us kay apnay munh say us kee aavaaz sunen. 15jo kuchh aap nay dekh aur sun liya hai us kee gavaahee aap tamaam logon ko dengay. 16chunaanchay aap kyoon der kar rahay hain? uthen aur us kay naam men baptisma len taaki aap kay gunaah dhul jaaen.’
paulus kee ghairyahoodiyon men khidmat ka bulaavaa
17jab main yarooshalam vaapas aaya to main ek din bait-ul-muqaddas men gaya. vahaan dua kartay kartay main vajd kee haalat men a gayaa 18aur khudaavand ko dekha. us nay farmaaya, ‘jaldee kar! yarooshalam ko fauran chhod day kyoonki log meray baaray men teree gavaahee ko qabool naheen karengay.’ 19main nay etiraaz kiya, ‘ai khudaavand, vah to jaantay hain ki main nay jagah-ba-jagah ibaadatkhaanay men ja kar tujh par eemaan rakhnay vaalon ko giriftaar kiya aur un kee pitaaee karvaaee. 20aur us vaqt bhee jab teray shaheed stifanus ko qatl kiya ja raha tha main saath khada tha. main raazee tha aur un logon kay kapdon kee nigraanee kar raha tha jo usay sangasaar kar rahay thay.’ 21lekin khudaavand nay kaha, ‘ja, kyoonki main tujhay doordaraaz ilaaqon men ghairyahoodiyon kay paas bhej doonga’.”
22yahaan tak hujoom paulus kee baaten sunta raha. lekin ab vah chilla uthay, “isay hata do! isay jaan say maar do! yah zinda rahenay kay laaiq naheen!” 23vah cheekhen maar maar kar apnee chaadren utaarnay aur hava men gard udaanay lagay. 24is par kamaandar nay hukm diya ki paulus ko qilaay men lay jaaya jaaay aur koday laga kar us kee poochhgichh kee jaaay. kyoonki vah maaloom karna chaahata tha ki log kis vajah say paulus kay khilaaf yoon cheekhen maar rahay hain. 25jab vah usay koday lagaanay kay liyay lay kar ja rahay thay to paulus nay saath khaday afsar [a] sau sipaahiyon par muqarrar afsar. say kaha, “kya aap kay liyay jaaiz hai ki ek romee shaheree kay koday lagvaaen aur vah bhee adaalat men pesh kiay baghair?”
26afsar nay jab yah suna to kamaandar kay paas ja kar usay ittila dee, “aap kya karnay ko hain? yah aadmee to romee shaheree hai!”
27kamaandar paulus kay paas aaya aur poochha, “mujhay saheeh bataaen, kya aap romee shaheree hain?”
paulus nay javaab diya, “jee haan.”
28kamaandar nay kaha, “main to badee raqam day kar shaheree bana hoon.”
paulus nay javaab diya, “lekin main to paidaaishee shaheree hoon.”
29yah suntay hee vah faujee jo us kee poochhgichh karnay ko thay peechhay hat gaay. kamaandar khud ghabra gaya ki main nay ek romee shaheree ko zanjeeron men jakad rakha hai.
paulus yahoodee adaalat-ay-aaliya kay saamne
30aglay din kamaandar saaf maaloom karna chaahata tha ki yahoodee paulus par kyoon ilzaam laga rahay hain. is liyay us nay raahanuma imaamon aur yahoodee adaalat-ay-aaliya kay tamaam maimbaraan ka ijlaas mun’aqid karnay ka hukm diya. phir paulus ko aazaad karkay qilaay say neechay laaya aur un kay saamnay khada kiya.