Āmaal 21

paulus yarooshalam jaata hai

¹mushkil say ifisus kay buzurgon say alag ho kar ham ravaana huay aur seedhay jazeera-ay-kos pahunch gaay. aglay din ham rudus aaay aur vahaan say patra pahunchay. ²patra men feneekay kay liyay jahaaz mil gaya to ham us par savaar ho kar ravaana huay. ³jab qubrus door say nazar aaya to ham us kay junoob men say guzar kar shaam kay shaher soor pahunch gaay jahaan jahaaz ko apna saamaan utaarna tha. ⁴jahaaz say utar kar ham nay maqaamee shaagirdon ko talaash kiya aur saat din un kay saath thaheray. un eemaandaaron nay rooh-ul-quds kee hidaayat say paulus ko samjhaanay kee koshish kee ki vah yarooshalam na jaaay. ⁵jab ham ek haftay kay baad jahaaz par vaapas chalay gaay to pooree jamaaat baal-bachchon samet hamaaray saath shaher say nikal kar saahil tak aaee. vaheen ham nay ghutnay tek kar dua kee ⁶aur ek doosray ko alvida kaha. phir ham dubaara jahaaz par savaar huay jabki vah apnay gharon ko laut gaay.

⁷soor say apna safar jaaree rakh kar ham patulimayis pahunchay jahaan ham nay maqaamee eemaandaaron ko salaam kiya aur ek din un kay saath guzaara. ⁸aglay din ham ravaana ho kar qaisriya pahunch gaay. vahaan ham filippus kay ghar thaheray. yah vahee filippus tha jo allaah kee khushkhabaree ka munaad tha aur jisay ibatidaaee dinon men yarooshalam men khaana taqseem karnay kay liyay chhah aur aadmiyon kay saath muqarrar kiya gaya tha. ⁹us kee chaar ghairshaadeeshuda betiyaan theen jo nubuvvat kee nemat rakhtee theen. ¹⁰kaee din guzar gaay to yahoodiya say ek nabee aaya jis ka naam agbus tha. ¹¹jab vah ham say milnay aaya to us nay paulus kee petee lay kar apnay paaon aur haathon ko baandh liya aur kaha, “rooh-ul-quds farmaata hai ki yarooshalam men yahoodee is petee kay maalik ko yoon baandh kar ghairyahoodiyon kay havaalay karengay.”

¹²yah sun kar ham nay maqaamee eemaandaaron samet paulus ko samjhaanay kee khoob koshish kee ki vah yarooshalam na jaaay. ¹³lekin us nay javaab diya, “aap kyoon rotay aur mera dil todtay hain? dekhen, main khudaavand eesa kay naam kee khaatir yarooshalam men na sirf baandhay jaanay balki us kay liyay apnee jaan tak denay ko tayyaar hoon.”

¹⁴ham usay qaail na kar sakay, is liyay ham yah kahetay huay khaamosh ho gaay ki “khudaavand kee marzee pooree ho.”

¹⁵is kay baad ham tayyaariyaan karkay yarooshalam chalay gaay. ¹⁶qaisriya kay kuchh shaagird bhee hamaaray saath chalay aur hamen manaason kay ghar pahuncha diya jahaan hamen thaherna tha. manaason qubrus ka tha aur jamaaat kay ibatidaaee dinon men eemaan laaya tha.

paulus yaaqoob say milta hai

¹⁷jab ham yarooshalam pahunchay to maqaamee bhaaiyon nay garmajoshee say hamaara istiqbaal kiya. ¹⁸aglay din paulus hamaaray saath yaaqoob say milnay gaya. tamaam maqaamee buzurg bhee haazir huay. ¹⁹unhen salaam karkay paulus nay tafseel say bayaan kiya ki allaah nay us kee khidmat kee maarifat ghairyahoodiyon men kya kiya tha. ²⁰yah sun kar unhon nay allaah kee tamjeed kee. phir unhon nay kaha, “bhaaee, aap ko maaloom hai ki hazaaron yahoodee eemaan laaay hain. aur sab badee sargarmee say shareeat par amal kartay hain. ²¹unhen aap kay baaray men khabar dee gaee hai ki aap ghairyahoodiyon kay darmiyaan rahenay vaalay yahoodiyon ko taaleem detay hain ki vah moosa kee shareeat ko chhod kar na apnay bachchon ka khatna karvaaen aur na hamaaray rasm-o-rivaaj kay mutaabiq zindagee guzaaren. ²²ab ham kya karen? vah to zaroor sunengay ki aap yahaan a gaay hain. ²³is liyay ham chaahatay hain ki aap yah karen : hamaaray paas chaar mard hain jinhon nay mannat maan kar usay poora kar liya hai. ²⁴ab unhen saath lay kar un kee tahaarat kee rusoomaat men shareek ho jaaen. un kay akhraajaat bhee aap bardaasht karen taaki vah apnay saron ko mundva saken. phir sab jaan lengay ki jo kuchh aap kay baaray men kaha jaata hai vah jhoot hai aur ki aap bhee shareeat kay mutaabiq zindagee guzaar rahay hain. ²⁵jahaan tak ghairyahoodee eemaandaaron kee baat hai ham unhen apna faisla khat kay zareeay bhej chukay hain ki vah in cheezon say parhez karen : buton ko pesh kiya gaya khaana, khoon, aisay jaanvaron ka gosht jinhen gala ghoont kar maar diya gaya ho aur zinaakaaree.”

²⁶chunaanchay aglay din paulus un aadmiyon ko saath lay kar un kee tahaarat kee rusoomaat men shareek hua. phir vah bait-ul-muqaddas men us din ka elaan karnay gaya jab tahaarat kay din pooray ho jaaengay aur un sab kay liyay qurbaanee pesh kee jaaegee.

bait-ul-muqaddas men paulus kee giriftaaree

²⁷is rasm kay liyay muqarrara saat din khatm honay ko thay ki sooba aasiya kay kuchh yahoodiyon nay paulus ko bait-ul-muqaddas men dekha. unhon nay pooray hujoom men halchal macha kar usay pakad liyaa ²⁸aur cheekhnay lagay, “israaeel kay hazraat, hamaaree madad karen! yah vahee aadmee hai jo har jagah tamaam logon ko hamaaree qaum, hamaaree shareeat aur is maqaam kay khilaaf taaleem deta hai. na sirf yah balki is nay bait-ul-muqaddas men ghairyahoodiyon ko la kar is muqaddas jagah kee behuramtee bhee kee hai.” ²⁹(yah aakhiree baat unhon nay is liyay kee kyoonki unhon nay shaher men ifisus kay ghairyahoodee trufimus ko paulus kay saath dekha aur khayaal kiya tha ki vah usay bait-ul-muqaddas men laaya hai.)

³⁰pooray shaher men hangaama barpa hua aur log chaaron taraf say daud kar aaay. paulus ko pakad kar unhon nay usay bait-ul-muqaddas say baahar ghaseet liya. joon hee vah nikal gaay bait-ul-muqaddas kay sahen kay darvaazon ko band kar diya gaya. ³¹vah usay maar daalnay kee koshish kar rahay thay ki romee paltan kay kamaandar ko khabar mil gaee, “pooray yarooshalam men halchal mach gaee hai.” ³²yah suntay hee us nay apnay faujiyon aur afsaron ko ikattha kiya aur daud kar un kay saath hujoom kay paas utar gaya. jab hujoom nay kamaandar aur us kay faujiyon ko dekha to vah paulus kee pitaaee karnay say ruk gaya. ³³kamaandar nay nazdeek a kar usay giriftaar kiya aur do zanjeeron say baandhnay ka hukm diya. phir us nay poochha, “yah kaun hai? is nay kya kiya hai?” ³⁴hujoom men say baaz kuchh chillaaay aur baaz kuchh. kamaandar koee yaqeenee baat maaloom na kar saka, kyoonki afra-tafree aur shor-sharaaba bahut tha. is liyay us nay hukm diya ki paulus ko qilaay men lay jaaya jaaay. ³⁵vah qilaay kee seedhee tak pahunch to gaay, lekin phir hujoom itna bekaaboo ho gaya ki faujiyon ko usay apnay kandhon par utha kar chalna pada. ³⁶log un kay peechhay peechhay chaltay aur cheekhtay chillaatay rahay, “usay maar daalo! usay maar daalo!”

paulus apna difa karta hai

³⁷vah paulus ko qilaay men lay ja rahay thay ki us nay kamaandar say poochha, “kya aap say ek baat karnay kee ijaazat hai?”

kamaandar nay kaha, “achchha, aap yoonaanee bol letay hain? ³⁸to kya aap vahee misree naheen hain jo kuchh der pahelay hukoomat kay khilaaf uth kar chaar hazaar dahshatagaradon ko registaan men laaya tha?”

³⁹paulus nay javaab diya, “main yahoodee aur kilikiya kay markzee shaher tarsus ka shaheree hoon. meharbaanee karkay mujhay logon say baat karnay den.”

⁴⁰kamaandar maan gaya aur paulus nay seedhee par khaday ho kar haath say ishaara kiya. jab sab khaamosh ho gaay to paulus araamee zabaan men un say mukhaatib huaa