Āmaal 20

makiduniya aur akhya men

¹jab shaher men afra-tafree khatm huee to paulus nay shaagirdon ko bula kar un kee hausalaaafzaaee kee. phir vah unhen khairbaad kah kar makiduniya kay liyay ravaana hua. ²vahaan pahunch kar us nay jagah-ba-jagah ja kar bahut see baaton say eemaandaaron kee hausalaaafzaaee kee. yoon chaltay chaltay vah yoonaan pahunch gayaa ³jahaan vah teen maah tak thahera. vah mulk-ay-shaam kay liyay jahaaz par savaar honay vaala tha ki pata chala ki yahoodiyon nay us kay khilaaf saazish kee hai. is par us nay makiduniya say ho kar vaapas jaanay ka faisla kiya. ⁴us kay kaee hamsafar thay : beriya say purus ka beta sopatrus, thissaluneekay say aristarkhus aur sikundus, dirbay say gayus, teemuthiyus aur sooba aasiya say tukhikus aur trufimus. ⁵yah aadmee aagay nikal kar troaas chalay gaay jahaan unhon nay hamaara intizaar kiya. ⁶bekhameeree rotee kee eed kay baad ham filippee kay qareeb jahaaz par savaar huay aur paanch din kay baad un kay paas troaas pahunch gaay. vahaan ham saat din rahay.

troaas men paulus kee alavidaaee meeting

⁷itwaar ko ham asha-ay-rabbaanee manaanay kay liyay jama huay. paulus logon say baat karnay laga aur choonki vah aglay din ravaana honay vaala tha is liyay vah aadhee raat tak bolta raha. ⁸oopar kee manzil men jis kamray men ham jama thay vahaan bahut say charaagh jal rahay thay. ⁹ek javaan khidkee kee daheleez par baitha tha. us ka naam yootikhus tha. joon joon paulus kee baaten lambee hotee ja rahee theen us par neend ghaalib aatee ja rahee thee. aakhirkaar vah gaheree neend men teesree manzil say zameen par gir gaya. jab logon nay neechay pahunch kar usay zameen par say uthaaya to vah jaan-ba-haq ho chuka tha. ¹⁰lekin paulus utar kar us par jhuk gaya aur usay apnay baazooon men lay liya. us nay kaha, “mat ghabraaen, vah zinda hai.” ¹¹phir vah vaapas oopar a gaya, asha-ay-rabbaanee manaaee aur khaana khaaya. us nay apnee baaten pau phatnay tak jaaree rakheen, phir ravaana hua. ¹²aur unhon nay javaan ko zinda haalat men vahaan say lay kar bahut tasallee paaee.

troaas say meeletus tak

¹³ham aagay nikal kar assus kay liyay jahaaz par savaar huay. khud paulus nay intizaam karvaaya tha ki vah paidal ja kar assus men hamaaray jahaaz par aaega. ¹⁴vahaan vah ham say mila aur ham usay jahaaz par la kar matulenay pahunchay. ¹⁵aglay din ham khiyus kay jazeeray say guzray. us say aglay din ham saamus kay jazeeray kay qareeb aaay. is kay baad kay din ham meeletus pahunch gaay. ¹⁶paulus pahelay say faisla kar chuka tha ki main ifisus men naheen thaheroonga balki aagay nikaloonga, kyoonki vah jaldee men tha. vah jahaan tak mumkin tha pantikust kee eed say pahelay pahelay yarooshalam pahunchna chaahata tha.

ifisus kay buzurgon kay liyay paulus kee alavidaaee taqreer

¹⁷meeletus say paulus nay ifisus kee jamaaat kay buzurgon ko bula liya. ¹⁸jab vah pahunchay to us nay un say kaha, “aap jaantay hain ki main sooba aasiya men pahela qadam uthaanay say lay kar poora vaqt aap kay saath kis tarah raha. ¹⁹main nay badee inkisaaree say khudaavand kee khidmat kee hai. mujhay bahut aansoo bahaanay paday aur yahoodiyon kee saazishon say mujh par bahut aazmaaishen aaeen. ²⁰main nay aap kay faaiday kee koee bhee baat aap say chhupaaay na rakhee balki aap ko alaaniya aur ghar ghar ja kar taaleem deta raha. ²¹main nay yahoodiyon ko yoonaaniyon samet gavaahee dee ki unhen tauba karkay allaah kee taraf rujoo karnay aur hamaaray khudaavand eesa par eemaan laanay kee zaroorat hai. ²²aur ab main rooh-ul-quds say bandha hua yarooshalam ja raha hoon. main naheen jaanta ki meray saath kya kuchh hoga, ²³lekin itna mujhay maaloom hai ki rooh-ul-quds mujhay shaher-ba-shaher is baat say aagaah kar raha hai ki mujhay qaid aur museebaton ka saamna karna padega. ²⁴khair, main apnee zindagee ko kisee tarah bhee ahem naheen samajhta. ahem baat sirf yah hai ki main apna vah mishan aur zimmaadaaree pooree karoon jo khudaavand eesa nay meray sapurd kee hai. aur vah zimmaadaaree yah hai ki main logon ko gavaahee day kar yah khushkhabaree sunaaoon ki allaah nay apnay fazl say un kay liyay kya kuchh kiya hai.

²⁵aur ab main jaanta hoon ki aap sab jinhen main nay allaah kee baadshaahee ka paighaam suna diya hai mujhay is kay baad kabhee naheen dekhengay. ²⁶is liyay main aaj hee aap ko bataata hoon ki agar aap men say koee bhee halaak ho jaaay to main bequsoor hoon, ²⁷kyoonki main aap ko allaah kee pooree marzee bataanay say na jhijka. ²⁸chunaanchay khabardaar rah kar apna aur us pooray gallay ka khayaal rakhna jis par rooh-ul-qoodas nay aap ko muqarrar kiya hai. nigraanon aur charvaahon kee haisiyat say allaah kee jamaaat kee khidmat karen, us jamaaat kee jisay us nay apnay hee farzand kay khoon say haasil kiya hai. ²⁹mujhay maaloom hai ki meray jaanay kay baad vaheshee bhediay aap men ghus aaengay jo gallay ko naheen chhodengay. ³⁰aap kay darmiyaan say bhee aadmee uth kar sachchaaee ko tod-marod kar bayaan karengay taaki shaagirdon ko apnay peechhay laga len. ³¹is liyay jaagtay rahen! yah baat zahen men rakhen ki main teen saal kay dauraan din raat har ek ko samjhaanay say baaz na aaya. meray aansooon ko yaad rakhen jo main nay aap kay liyay bahaaay hain.

³²aur ab main aap ko allaah aur us kay fazl kay kalaam kay sapurd karta hoon. yahee kalaam aap kee taameer karkay aap ko vah meeraas muhayya karnay kay qaabil hai jo allaah tamaam muqaddas kiay gaay logon ko deta hai. ³³main nay kisee kay bhee sonay, chaandee ya kapdon ka laalach na kiya. ³⁴aap khud jaantay hain ki main nay apnay in haathon say kaam karkay na sirf apnee balki apnay saathiyon kee zarooriyaat bhee pooree keen. ³⁵apnay har kaam men main aap ko dikhaata raha ki laazim hai ki ham is qism kee mehanat karkay kamzoron kee madad karen. kyoonki hamaaray saamnay khudaavand eesa kay yah alfaaz honay chaahien ki dena lenay say mubaarak hai.”

³⁶yah sab kuchh kah kar paulus nay ghutnay tek kar un sab kay saath dua kee. ³⁷sab khoob roay aur us ko galay laga laga kar bosay diay. ³⁸unhen khaaskar paulus kee is baat say takleef huee ki ‘aap is kay baad mujhay kabhee naheen dekhengay.’ phir vah us kay saath jahaaz tak gaay.