Āmaal 2

rooh-ul-quds kee aamad

¹phir eed-ay-pantikust ka din aaya. sab ek jagah jama the ²ki achaanak aasmaan say aisee aavaaz aaee jaisay shadeed aandhee chal rahee ho. poora makaan jis men vah baithay thay is aavaaz say goonj utha. ³aur unhen sholay kee lauen jaisee nazar aaeen jo alag alag ho kar un men say har ek par utar kar thaher gaeen. ⁴sab rooh-ul-quds say bhar gaay aur mukhtalif ghairmulkee zabaanon men bolnay lagay, har ek us zabaan men jo bolnay kee rooh-ul-quds nay usay taufeeq dee.

⁵us vaqt yarooshalam men aisay khudaataras yahoodee thaheray huay thay jo aasmaan talay kee har qaum men say thay. ⁶jab yah aavaaz sunaaee dee to ek bada hujoom jama hua. sab ghabra gaay kyoonki har ek nay eemaandaaron ko apnee maadree zabaan men boltay suna. ⁷sakht hairatzada ho kar vah kahenay lagay, “kya yah sab galeel kay rahenay vaalay naheen hain? ⁸to phir yah kis tarah ho sakta hai ki ham men say har ek unhen apnee maadree zabaan men baaten kartay sun raha hai ⁹jabki hamaaray mamaalik yah hain : paarthiya, maadiya, ailaam, masoputaamiya, yahoodiya, kappadukiya, puntus, aasiya, ¹⁰faroogiya, pamfeeliya, misr aur libiya ka vah ilaaqa jo kuren kay ird-gird hai. rom say bhee log maujood hain. ¹¹yahaan yahoodee bhee hain aur ghairyahoodee naumureed bhee, kretay kay log aur arab kay baashinday bhee. aur ab ham sab kay sab in ko apnee apnee zabaan men allaah kay azeem kaamon ka zikr kartay sun rahay hain.” ¹²sab dang rah gaay. uljhan men pad kar vah ek doosray say poochhnay lagay, “is ka kya matlab hai?”

¹³lekin kuchh log un ka mazaaq uda kar kahenay lagay, “yah bas naee mai pee kar nashay men dhut ho gaay hain.”

patras ka paighaam

¹⁴phir patras baaqee gyaarah rasoolon samet khada ho kar oonchee aavaaz say un say mukhaatib hua, “sunen, yahoodee bhaaiyo aur yarooshalam kay tamaam rahenay vaalo! jaan len aur ghaur say meree baat sun len! ¹⁵aap ka khayaal hai ki yah log nashay men hain. lekin aisa naheen hai. dekhen, abhee to subah kay nau bajay ka vaqt hai. ¹⁶ab vah kuchh ho raha hai jis kee peshgoee yoel nabee nay kee thee,

¹⁷‘allaah farmaata hai ki aakhiree dinon men

main apnay rooh ko tamaam insaanon par undel doonga.

tumhaaray betay-betiyaan nubuvvat karengay,

tumhaaray naujavaan royaaen aur

tumhaaray buzurg khwaab dekhengay.

¹⁸un dinon men

main apnay rooh ko apnay khaadimon aur khaadimaaon par bhee undel doonga,

aur vah nubuvvat karengay.

¹⁹main oopar aasmaan par mojizay dikhaaoongaa

aur neechay zameen par ilaahee nishaan zaahir karoonga,

khoon, aag aur dhuen kay baadal.

²⁰sooraj taareek ho jaaega,

chaand ka rang khoon sa ho jaaega,

aur phir rabb ka azeem aur jalaalee din aaega.

²¹us vaqt jo bhee rabb ka naam legaa

najaat paaega.’

²²israaeel kay mardo, meree baat sunen! allaah nay aap kay saamnay hee eesa naasree kee tasdeeq kee, kyoonki us nay us kay vaseelay say aap kay darmiyaan ajoobay, mojizay aur ilaahee nishaan dikhaaay. aap khud is baat say vaaqif hain. ²³lekin allaah ko pahelay hee ilm tha ki kya hona hai, kyoonki us nay khud apnee marzee say muqarrar kiya tha ki eesa ko dushman kay havaalay kar diya jaaay. chunaanchay aap nay bedeen logon kay zareeay usay saleeb par chadhva kar qatl kiya. ²⁴lekin allaah nay usay maut kee aziyatanaak girift say aazaad karkay zinda kar diya, kyoonki mumkin hee naheen tha ki maut usay apnay qabzay men rakhay. ²⁵chunaanchay daaood nay us kay baaray men kaha,

‘rabb har vaqt meree aankhon kay saamnay raha.

vah meray dahenay haath raheta hai

taaki main na dagamagaaoon.

²⁶is liyay mera dil shaadmaan hai,

aur meree zabaan khushee kay naaray lagaatee hai.

haan, mera badan puraummeed zindagee guzaarega.

²⁷kyoonki too meree jaan ko paataal men naheen chhodega,

aur na apnay muqaddas ko galnay sadnay kee naubat tak pahunchnay dega.

²⁸too nay mujhay zindagee kee raahon say aagaah kar diya hai,

aur too apnay huzoor mujhay khushee say sarshaar karega.’

²⁹meray bhaaiyo, agar ijaazat ho to main aap ko dileree say apnay buzurg daaood kay baaray men kuchh bataaoon. vah to faut ho kar dafnaaya gaya aur us kee qabr aaj tak hamaaray darmiyaan maujood hai. ³⁰lekin vah nabee tha aur jaanta tha ki allaah nay qasam kha kar mujh say vaada kiya hai ki vah meree aulaad men say ek ko meray takht par bithaaega. ³¹mazkoora aayaat men daaood mustaqbil men dekh kar maseeh kay jee uthnay ka zikr kar raha hai, yaanee ki na usay paataal men chhoda gaya, na us ka badan galnay sadnay kee naubat tak pahuncha. ³²allaah nay isee eesa ko zinda kar diya hai aur ham sab is kay gavaah hain. ³³ab usay sarfaraaz karkay khuda kay dahenay haath bithaaya gaya aur baap kee taraf say usay mauooda rooh-ul-quds mil gaya hai. isee ko us nay ham par undel diya, jis tarah aap dekh aur sun rahay hain. ³⁴daaood khud to aasmaan par naheen chadha, to bhee us nay farmaaya,

‘rabb nay meray rabb say kaha,

meray dahenay haath baith

³⁵jab tak main teray dushmanon ko

teray paaon kee chaukee na bana doon.’

³⁶chunaanchay poora israaeel yaqeen jaanay ki jis eesa ko aap nay masloob kiya hai usay hee allaah nay khudaavand aur maseeh bana diya hai.”

³⁷patras kee yah baaten sun kar logon kay dil chhid gaay. unhon nay patras aur baaqee rasoolon say poochha, “bhaaiyo, phir ham kya karen?”

³⁸patras nay javaab diya, “aap men say har ek tauba karkay eesa kay naam par baptisma lay taaki aap kay gunaah muaaf kar diay jaaen. phir aap ko rooh-ul-quds kee nemat mil jaaegee. ³⁹kyoonki yah denay ka vaada aap say aur aap kay bachchon say kiya gaya hai, balki un say bhee jo door kay hain, un sab say jinhen rabb hamaara khuda apnay paas bulaaega.”

⁴⁰patras nay mazeed bahut see baaton say unhen naseehat kee aur samjhaaya ki “is tedhee nasal say nikal kar najaat paaen.” ⁴¹jinhon nay patras kee baat qabool kee un ka baptisma hua. yoon us din jamaaat men taqreeban 3,000 afraad ka izaafa hua. ⁴²yah eemaandaar rasoolon say taaleem paanay, rifaaqat rakhnay aur rifaaqtee khaanon aur duaaon men shareek hotay rahay.

eemaandaaron kee hairat’angez zindagee

⁴³sab par khauf chha gaya aur rasoolon kee taraf say bahut say mojizay aur ilaahee nishaan dikhaaay gaay. ⁴⁴jo bhee eemaan laatay thay vah ek jagah jama hotay thay. un kee har cheez mushtaraka hotee thee. ⁴⁵apnee milkiyat aur maal farokht karkay unhon nay har ek ko us kee zaroorat kay mutaabiq diya. ⁴⁶rozaana vah yakdilee say bait-ul-muqaddas men jama hotay rahay. saath saath vah maseeh kee yaad men apnay gharon men rotee todtay, badee khushee aur saadgee say rifaaqtee khaana khaate ⁴⁷aur allaah kee tamjeed kartay rahay. us vaqt vah tamaam logon kay manzoor-ay-nazar thay. aur khudaavand roz-ba-roz jamaaat men najaatayaafta logon ka izaafa karta raha.