Āmaal 19

paulus ifisus men

¹jab apullos kurinthus men thahera hua tha to paulus eshiya-ay-koochak kay androonee ilaaqay men say safar kartay kartay saahilee shaher ifisus men aaya. vahaan usay kuchh shaagird mile ²jin say us nay poochha, “kya aap ko eemaan laatay vaqt rooh-ul-quds mila?”

unhon nay javaab diya, “naheen, ham nay to rooh-ul-quds ka zikr tak naheen suna.”

³us nay poochha, “to aap ko kaun sa baptisma diya gaya?”

unhon nay javaab diya, “yaheya ka.”

⁴paulus nay kaha, “yaheya nay baptisma diya jab logon nay tauba kee. lekin us nay khud unhen bataaya, ‘meray baad aanay vaalay par eemaan laao, yaanee eesa par’.”

⁵yah sun kar unhon nay khudaavand eesa kay naam par baptisma liya. ⁶aur jab paulus nay apnay haath un par rakhay to un par rooh-ul-qoodas naazil hua, aur vah ghairzabaanen bolnay aur nubuvvat karnay lagay. ⁷in aadmiyon kee kul taadaad taqreeban baarah thee.

⁸paulus yahoodee ibaadatkhaanay men gaya aur teen maheenay kay dauraan yahoodiyon say dileree say baat karta raha. un kay saath bahs karkay us nay unhen allaah kee baadshaahee kay baaray men qaail karnay kee koshish kee. ⁹lekin kuchh ad gaay. vah allaah kay taabay na huay balki avaam kay saamnay hee allaah kee raah ko bura-bhala kahenay lagay. is par paulus nay unhen chhod diya. shaagirdon ko bhee alag karkay vah un kay saath turannus kay laikchar haal men jama hua karta tha jahaan vah rozaana unhen taaleem deta raha. ¹⁰yah silsila do saal tak jaaree raha. yoon sooba aasiya kay tamaam logon ko khudaavand ka kalaam sunnay ka mauqa mila, khwaah vah yahoodee thay ya yoonaanee.

raahanuma imaam skiva kay saat bete

¹¹allaah nay paulus kee maarifat ghairmaamoolee mojizay kiay, ¹²yahaan tak ki jab roomaal ya epran us kay badan say lagaanay kay baad mareezon par rakhay jaatay to un kee beemaariyaan jaatee raheteen aur badruhen nikal jaateen. ¹³vahaan kuchh aisay yahoodee bhee thay jo jagah jagah ja kar badruhen nikaaltay thay. ab vah badroohon kay bandhan men phansay logon par khudaavand eesa ka naam istemaal karnay kee koshish karkay kahenay lagay, “main tujhay us eesa kay naam say nikalnay ka hukm deta hoon jis kee munaadee paulus karta hai.” ¹⁴ek yahoodee raahanuma imaam banaam skiva kay saat betay aisa kartay thay.

¹⁵lekin ek dafa jab yahee koshish kar rahay thay to badruh nay javaab diya, “eesa ko to main jaantee hoon aur paulus ko bhee, lekin tum kaun ho?”

¹⁶phir vah aadmee jis men badruh thee un par jhapat kar sab par ghaalib a gaya. us ka un par itna sakht hamla hua ki vah nangay aur zakhmee haalat men bhaag kar us ghar say nikal gaay. ¹⁷is vaakiay kee khabar ifisus kay tamaam rahenay vaalay yahoodiyon aur yoonaaniyon men phail gaee. un par khauf taaree hua aur khudaavand eesa kay naam kee taazeem huee. ¹⁸jo eemaan laaay thay un men say bahuteron nay a kar alaaniya apnay gunaahon ka iqraar kiya. ¹⁹jaadoogree karnay vaalon kee badee taadaad nay apnee jaadoomantr kee kitaaben ikatthee karkay avaam kay saamnay jala deen. pooree kitaabon ka hisaab kiya gaya to un kee kul raqam chaandee kay pachaas hazaar sikkay thee. ²⁰yoon khudaavand ka kalaam zabardast tareeqay say badhta aur zor pakadta gaya.

ifisus men hangaamaa

²¹in vaaqiaat kay baad paulus nay makiduniya aur akhya men say guzar kar yarooshalam jaanay ka faisla kiya. us nay kaha, “is kay baad laazim hai ki main rom bhee jaaoon.” ²²us nay apnay do madadgaaron teemuthiyus aur iraastus ko aagay makiduniya bhej diya jabki vah khud mazeed kuchh der kay liyay sooba aasiya men thahera raha.

²³taqreeban us vaqt allaah kee raah ek shadeed hangaamay ka baais ho gaee. ²⁴yah yoon hua, ifisus men ek chaandee kee ashya banaanay vaala raheta tha jis ka naam demetriyus tha. vah chaandee say artamis devee kay mandir banvaata tha, aur us kay kaam say dastakaaron ka kaarobaar khoob chalta tha. ²⁵ab us nay is kaam say taalluq rakhnay vaalay deegar dastakaaron ko jama karkay un say kaha, “hazraat, aap ko maaloom hai ki hamaaree daulat is kaarobaar par munhasir hai. ²⁶aap nay yah bhee dekh aur sun liya hai ki is aadmee paulus nay na sirf ifisus balki taqreeban pooray sooba aasiya men bahut say logon ko bhatka kar qaail kar liya hai ki haathon kay banay devta haqeeqat men devta naheen hotay. ²⁷na sirf yah khatra hai ki hamaaray kaarobaar kee badnaamee ho balki yah bhee ki azeem devee artamis kay mandir ka asar-o-rasookh jaata rahega, ki artamis khud jis kee pooja sooba aasiya aur pooree duniya men kee jaatee hai apnee azmat kho baithay.”

²⁸yah sun kar vah taish men a kar cheekhnay-chillaanay lagay, “ifisiyon kee artamis devee azeem hai!” ²⁹pooray shaher men halchal mach gaee. logon nay paulus kay makidunee hamsafar gayus aur aristarkhus ko pakad liya aur mil kar tamaashaagaah men dauday aaay. ³⁰yah dekh kar paulus bhee avaam kay is ijlaas men jaana chaahata tha, lekin shaagirdon nay usay rok liya. ³¹isee tarah us kay kuchh doston nay bhee jo sooba aasiya kay afsar thay usay khabar bhej kar minnat kee ki vah na jaaay. ³²ijlaas men badee afra-tafree thee. kuchh yah cheekh rahay thay, kuchh vah. ziyaadaatar log jama honay kee vajah jaantay bhee na thay. ³³yahoodiyon nay sikandar ko aagay kar diya. saath saath hujoom kay kuchh log usay hidaayaat detay rahay. us nay haath say khaamosh ho jaanay ka ishaara kiya taaki vah ijlaas kay saamnay apna difa karay. ³⁴lekin jab unhon nay jaan liya ki vah yahoodee hai to vah taqreeban do ghanton tak chilla kar naara lagaatay rahay, “ifisus kee artamis devee azeem hai!”

³⁵aakhirkaar baldiya ka cheef saikrataree unhen khaamosh karaanay men kaamyaab hua. phir us nay kaha, “ifisus kay hazraat, kis ko maaloom naheen ki ifisus azeem artamis devee kay mandir ka muhaafiz hai! pooree duniya jaantee hai ki ham us kay us mujassmay kay nigraan hain jo aasmaan say gir kar hamaaray paas pahunch gaya. ³⁶yah haqeeqat to naaqaabil-ay-inkaar hai. chunaanchay laazim hai ki aap chup-chaap rahen aur jaldbaazee na karen. ³⁷aap yah aadmee yahaan laaay hain haalaanki na to vah mandiron ko lootnay vaalay hain, na unhon nay devee kee behuramtee kee hai. ³⁸agar demetriyus aur us kay saath vaalay dastakaaron ka kisee par ilzaam hai to is kay liyay kachaheriyaan aur gavarnar hotay hain. vahaan ja kar vah ek doosray say muqaddma laden. ³⁹agar aap mazeed koee muaamala pesh karna chaahatay hain to usay hal karnay kay liyay qaanoonee majlis hotee hai. ⁴⁰ab ham is khatray men hain ki aaj kay vaaqiaat kay baais ham par fasaad ka ilzaam lagaaya jaaega. kyoonki jab ham say poochha jaaega to ham is qism kay betarteeb aur naajaaiz ijtima ka koee javaaz pesh naheen kar sakengay.” ⁴¹yah kah kar us nay ijlaas ko barkhaast kar diya.