Āmaal 18

kurinthus men

¹is kay baad paulus athenay ko chhod kar kurinthus shaher aaya. ²vahaan us kee mulaaqaat ek yahoodee say huee jis ka naam akvila tha. vah puntus ka rahenay vaala tha aur thodee der pahelay apnee beevee priskilla samet itlee say aaya tha. vajah yah thee ki shahenshaah klaudiyus nay hukm saadir kiya tha ki tamaam yahoodee rom ko chhod kar chalay jaaen. un logon kay paas paulus gayaa ³aur choonki un ka pesha bhee khaimay silaaee karna tha is liyay vah un kay ghar thaher kar rozee kamaanay laga. ⁴saath saath us nay har sabat ko yahoodee ibaadatkhaanay men taaleem day kar yahoodiyon aur yoonaaniyon ko qaail karnay kee koshish kee.

⁵jab seelaas aur teemuthiyus makiduniya say aaay to paulus apna poora vaqt kalaam sunaanay men sarf karnay laga. us nay yahoodiyon ko gavaahee dee ki eesa kalaam-ay-muqaddas men bayaan kiya gaya maseeh hai. ⁶lekin jab vah us kee mukhaalafat karkay us kee tazleel karnay lagay to us nay ehatijaaj men apnay kapdon say gard jhaadkar kaha, “aap khud apnee halaakat kay zimmaadaar hain, main bequsoor hoon. ab say main ghairyahoodiyon kay paas jaaya karoonga.” ⁷phir vah vahaan say nikal kar ibaadatkhaanay kay saath vaalay ghar men gaya. vahaan titus yoostus raheta tha jo yahoodee naheen tha, lekin khuda ka khauf maanta tha. ⁸aur krispus jo ibaadatkhaanay ka raahanuma tha apnay gharaanay samet khudaavand par eemaan laaya. kurinthus kay bahut saaray aur logon nay bhee jab paulus kee baaten suneen to eemaan laaay aur baptisma liya.

⁹ek raat khudaavand roya men paulus say hamkalaam hua, “mat dar! kalaam karta ja aur khaamosh na ho, ¹⁰kyoonki main teray saath hoon. koee hamla karkay tujhay nuqsaan naheen pahunchaaega, kyoonki is shaher men meray bahut say log hain.” ¹¹phir paulus mazeed dedh saal vahaan thaher kar logon ko allaah ka kalaam sikhaata raha.

¹²un dinon men jab galliyo sooba akhya ka gavarnar tha to yahoodee muttahid ho kar paulus kay khilaaf jama huay aur usay adaalat men galliyo kay saamnay laaay. ¹³unhon nay kaha, “yah aadmee logon ko aisay tareeqay say allaah kee ibaadat karnay par uksa raha hai jo hamaaree shareeat kay khilaaf hai.”

¹⁴paulus javaab men kuchh kahenay ko tha ki galliyo khud yahoodiyon say mukhaatib hua, “sunen, yahoodee mardo! agar aap ka ilzaam koee naainsaafee ya sangeen jurm hota to aap kee baat qaabil-ay-bardaasht hotee. ¹⁵lekin aap ka jhagda mazhabee taaleem, naamon aur aap kee yahoodee shareeat say taalluq rakhta hai, is liyay usay khud hal karen. main is muaamalay men faisla karnay kay liyay tayyaar naheen hoon.” ¹⁶yah kah kar us nay unhen adaalat say bhaga diya. ¹⁷is par hujoom nay yahoodee ibaadatkhaanay kay raahanuma sosthines ko pakad kar adaalat kay saamnay us kee pitaaee kee. lekin galliyo nay parva na kee.

antaakiya tak vaapsee ka safar

¹⁸is kay baad bhee paulus bahut din kurinthus men raha. phir bhaaiyon ko khairbaad kah kar vah qareeb kay shaher kinkhriya gaya jahaan us nay kisee mannat kay pooray honay par apnay sar kay baal mundva diay. is kay baad vah priskilla aur akvila kay saath jahaaz par savaar ho kar mulk-ay-shaam kay liyay ravaana hua. ¹⁹pahelay vah ifisus pahunchay jahaan paulus nay priskilla aur akvila ko chhod diya. vahaan bhee us nay yahoodee ibaadatkhaanay men ja kar yahoodiyon say bahs kee. ²⁰unhon nay us say darakhwaast kee ki mazeed vaqt un kay saath guzaaray, lekin us nay inkaar kiyaa ²¹aur unhen khairbaad kah kar kaha, “agar allaah kee marzee ho to main aap kay paas vaapas aaoonga.” phir vah jahaaz par savaar ho kar ifisus say ravaana hua.

²²safar kartay kartay vah qaisriya pahunch gaya, jahaan say vah yarooshalam ja kar maqaamee jamaaat say mila. is kay baad vah antaakiya vaapas chala gayaa ²³jahaan vah kuchh der thahera. phir aagay nikal kar vah galtiya aur faroogiya kay ilaaqay men say guzartay huay vahaan kay tamaam eemaandaaron ko mazboot karta gaya.

apullos ifisus aur kurinthus men

²⁴itnay men ek faseeh yahoodee jisay kalaam-ay-muqaddas ka zabardast ilm tha ifisus pahunch gaya tha. us ka naam apullos tha. vah misr kay shaher iskandariya ka rahenay vaala tha. ²⁵usay khudaavand kee raah kay baaray men taaleem dee gaee thee aur vah badee sargarmee say logon ko eesa kay baaray men sikhaata raha. us kee yah taaleem saheeh thee agarchi vah abhee tak sirf yaheya ka baptisma jaanta tha. ²⁶ifisus kay yahoodee ibaadatkhaanay men vah badee dileree say kalaam karnay laga. yah sun kar priskilla aur akvila nay usay ek taraf lay ja kar us kay saamnay allaah kee raah ko mazeed tafseel say bayaan kiya. ²⁷apullos sooba akhya jaanay ka khayaal rakhta tha to ifisus kay bhaaiyon nay us kee hausalaaafzaaee kee. unhon nay vahaan kay shaagirdon ko khat likha ki vah us ka istiqbaal karen. jab vah vahaan pahuncha to un kay liyay badee madad ka baais bana jo allaah kay fazl say eemaan laaay thay, ²⁸kyoonki vah alaaniya mubaahison men zabardast dalaail say yahoodiyon par ghaalib aaya aur kalaam-ay-muqaddas say saabit kiya ki eesa maseeh hai.