Āmaal 17
thissaluneekay men
1amfipulis aur apulloniya say ho kar paulus aur seelaas thissaluneekay shaher pahunch gaay jahaan yahoodee ibaadatkhaana tha. 2apnee aadat kay mutaabiq paulus us men gaya aur lagaataar teen sabton kay dauraan kalaam-ay-muqaddas say dalaail day day kar yahoodiyon ko qaail karnay kee koshish karta raha. 3us nay kalaam-ay-muqaddas kee tashreeh karkay saabit kiya ki maseeh ka dukh uthaana aur murdon men say jee uthna laazim tha. us nay kaha, “jis eesa kee main khabar day raha hoon, vahee maseeh hai.” 4yahoodiyon men say kuchh qaail ho kar paulus aur seelaas say vaabasta ho gaay, jin men khudaataras yoonaaniyon kee badee taadaad aur baarsookh khavaateen bhee shareek theen.
5yah dekh kar baaqee yahoodee hasad karnay lagay. unhon nay galiyon men aavaara phirnay vaalay kuchh shareer aadmee ikatthay karkay juloos nikaala aur shaher men halchal macha dee. phir yaason kay ghar par hamla karkay unhon nay paulus aur seelaas ko dhoonda taaki unhen avaamee ijlaas kay saamnay pesh karen. 6lekin vah vahaan naheen thay, is liyay vah yaason aur chand ek aur eemaandaar bhaaiyon ko shaher kay majistreton kay saamnay laaay. unhon nay cheekh kar kaha, “yah log pooree duniya men gadbad paida kar rahay hain aur ab yahaan bhee a gaay hain. 7yaason nay unhen apnay ghar men thaheraaya hai. yah sab shahenshaah kay ahkaam kee khilaafvarzee kar rahay hain, kyoonki yah kisee aur ko baadshaah maantay hain jis ka naam eesa hai.” 8is tarah kee baaton say unhon nay hujoom aur majistreton men bada hangaama paida kiya. 9chunaanchay majistreton nay yaason aur doosron say zamaanat lee aur phir unhen chhod diya.
beriya men
10usee raat bhaaiyon nay paulus aur seelaas ko beriya bhej diya. vahaan pahunch kar vah yahoodee ibaadatkhaanay men gaay. 11yah log thissaluneekay kay yahoodiyon kee nisbat ziyaada khulay zahen kay thay. yah baday shauq say paulus aur seelaas kee baaten suntay aur roz-ba-roz kalaam-ay-muqaddas kee tafteesh kartay rahay ki kya vaaqaee aisa hai jaisa hamen bataaya ja raha hai? 12nateejay men in men say bahut say yahoodee eemaan laaay aur saath saath bahut see baarsookh yoonaanee khavaateen aur mard bhee. 13lekin phir thissaluneekay kay yahoodiyon ko yah khabar milee ki paulus beriya men allaah ka kalaam suna raha hai. vah vahaan bhee pahunchay aur logon ko uksa kar halchal macha dee. 14is par bhaaiyon nay paulus ko fauran saahil par bhej diya, lekin seelaas aur teemuthiyus beriya men peechhay rah gaay. 15jo aadmee paulus ko saahil tak pahunchaanay aaay thay vah us kay saath athenay tak gaay. vahaan vah usay chhod kar vaapas chalay gaay. un kay haath paulus nay seelaas aur teemuthiyus ko khabar bhejee ki jitnee jaldee ho sakay beriya ko chhod kar meray paas a jaaen.
athenay men
16athenay shaher men seelaas aur teemuthiyus ka intizaar kartay kartay paulus baday josh men a gaya, kyoonki us nay dekha ki poora shaher buton say bhara hua hai. 17vah yahoodee ibaadatkhaanay men ja kar yahoodiyon aur khudaataras ghairyahoodiyon say bahs karnay laga. saath saath vah rozaana chauk men bhee ja kar vahaan par maujood logon say guftagu karta raha. 18ipikooree aur stoikee falsfee [a] yaanee ravaaqeet kay falsfee. bhee us say bahs karnay lagay. jab paulus nay unhen eesa aur us kay jee uthnay kee khushkhabaree sunaaee to baaz nay poochha, “yah bakvaasee in baaton say kya kahena chaahata hai jo is nay idhar udhar say chun kar jod dee hain?”
doosron nay kaha, “lagta hai ki vah ajnabee devtaaon kee khabar day raha hai.” 19vah usay saath lay kar shaher kee majlis-ay-shoora men gaay jo ariyopagus naamee pahaadee par mun’aqid hotee thee. unhon nay darakhwaast kee, “kya hamen maaloom ho sakta hai ki aap kaun see naee taaleem pesh kar rahay hain? 20aap to hamen ajeeb-o-ghareeb baaten suna rahay hain. ab ham un ka saheeh matlab jaanna chaahatay hain.” 21(baat yah thee ki athenay kay tamaam baashinday shaher men rahenay vaalay pardesiyon samet apna poora vaqt is men sarf kartay thay ki taaza taaza khayaalaat sunen ya sunaaen.)
22paulus majlis men khada hua aur kaha, “athenay kay hazraat, main dekhta hoon ki aap har lihaaz say bahut mazhabee log hain. 23kyoonki jab main shaher men say guzar raha tha to un cheezon par ghaur kiya jin kee pooja aap kartay hain. chaltay chaltay main nay ek aisee qurbaangaah bhee dekhee jis par likha tha, ‘naamaaloom khuda kee qurbaangaah.’ ab main aap ko us khuda kee khabar deta hoon jis kee pooja aap kartay to hain magar aap usay jaantay naheen. 24yah vah khuda hai jis nay duniya aur us men maujood har cheez kee takhleeq kee. vah aasmaan-o-zameen ka maalik hai, is liyay vah insaanee haathon kay banaaay huay mandiron men sukoonat naheen karta. 25aur insaanee haath us kee khidmat naheen kar saktay, kyoonki usay koee bhee cheez darkaar naheen hotee. is kay bajaay vahee sab ko zindagee aur saans muhayya karkay un kee tamaam zarooriyaat pooree karta hai. 26usee nay ek shakhs ko khalaq kiya taaki duniya kee tamaam qaumen us say nikal kar pooree duniya men phail jaaen. us nay har qaum kay auqaat aur sarhadden bhee muqarrar keen. 27maqsad yah tha ki vah khuda ko talaash karen. ummeed yah thee ki vah tatol tatol kar usay paaen, agarchi vah ham men say kisee say door naheen hota. 28kyoonki us men ham jeetay, harkat kartay aur vujood rakhtay hain. aap kay apnay kuchh shaairon nay bhee farmaaya hai, ‘ham bhee us kay farzand hain.’ 29ab choonki ham allaah kay farzand hain is liyay hamaara us kay baaray men tasavvur yah naheen hona chaahiay ki vah sonay, chaandee ya patthar ka koee mujassma ho jo insaan kee mahaarat aur dizaain say banaaya gaya ho. 30maazee men khuda nay is qism kee jahaalat ko nazar’andaaz kiya, lekin ab vah har jagah kay logon ko tauba ka hukm deta hai. 31kyoonki us nay ek din muqarrar kiya hai jab vah insaaf say duniya kee adaalat karega. aur vah yah adaalat ek shakhs kee maarifat karega jis ko vah mut’ayyin kar chuka hai aur jis kee tasdeeq us nay is say kee hai ki us nay usay murdon men say zinda kar diya hai.”
32murdon kee qiyaamat ka zikr sun kar baaz nay paulus ka mazaaq udaaya. lekin baaz nay kaha, “ham kisee aur vaqt is kay baaray men aap say mazeed sunna chaahatay hain.” 33phir paulus majlis say nikal kar chala gaya. 34kuchh log us say vaabasta ho kar eemaan lay aaay. un men say majlis-ay-shoora ka maimbar diyoneesiyus tha aur ek aurat banaam damris. kuchh aur bhee thay.