Āmaal 16

teemuthiyus ka chunaao

¹chaltay chaltay vah dirbay pahuncha, phir lustara. vahaan ek shaagird banaam teemuthiyus raheta tha. us kee yahoodee maan eemaan laaee thee jabki baap yoonaanee tha. ²lustara aur ikuniyum kay bhaaiyon nay us kee achchhee riport dee, ³is liyay paulus usay safar par apnay saath lay jaana chaahata tha. us ilaaqay kay yahoodiyon ka lihaaz karkay us nay teemuthiyus ka khatna karvaaya, kyoonki sab log is say vaaqif thay ki us ka baap yoonaanee hai. ⁴phir shaher-ba-shaher ja kar unhon nay maqaamee jamaaaton ko yarooshalam kay rasoolon aur buzurgon kay vah faislay pahunchaaay jin kay mutaabiq zindagee guzaarnee thee. ⁵yoon jamaaaten eemaan men mazboot hueen aur taadaad men roz-ba-roz badhtee gaeen.

troaas men paulus kee royaa

⁶rooh-ul-quds nay unhen sooba aasiya men kalaam-ay-muqaddas kee munaadee karnay say rok liya, is liyay vah faroogiya aur galtiya kay ilaaqay men say guzray. ⁷moosiya kay qareeb a kar unhon nay shimaal kee taraf sooba bithuniya men daakhil honay kee koshish kee. lekin eesa kay rooh nay unhen vahaan bhee jaanay na diya, ⁸is liyay vah moosiya men say guzar kar bandargaah troaas pahunchay. ⁹vahaan paulus nay raat kay vaqt roya dekhee jis men shimaalee yoonaan men vaaqay sooba makiduniya ka ek aadmee khada us say iltimaas kar raha tha, “samundar ko paar karkay makiduniya aaen aur hamaaree madad karen!” ¹⁰joon hee us nay yah roya dekhee ham makiduniya jaanay kee tayyaariyaan karnay lagay. kyoonki ham nay roya say yah nateeja nikaala ki allaah nay hamen us ilaaqay kay logon ko khushkhabaree sunaanay kay liyay bulaaya hai.

filippee men ludiya kee tabdeelee

¹¹ham troaas men jahaaz par savaar ho kar seedhay jazeera-ay-samutraakay kay liyay ravaana huay. phir aglay din aagay nikal kar nayaapulis pahunchay. ¹²vahaan jahaaz say utar kar ham filippee chalay gaay, jo sooba makiduniya kay us zila ka sadar shaher tha aur romee nauaabaadee tha. is shaher men ham kuchh din thaheray. ¹³sabat kay din ham shaher say nikal kar darya kay kinaaray gaay, jahaan hamaaree tavaqqo thee ki yahoodee dua kay liyay jama hongay. vahaan ham baith kar kuchh khavaateen say baat karnay lagay jo ikatthee huee theen. ¹⁴un men say thuaateera shaher kee ek aurat thee jis ka naam ludiya tha. us ka pesha qeemtee arghvaanee rang kay kapday kee tijaarat tha aur vah allaah kee parastish karnay vaalee ghairyahoodee thee. khudaavand nay us kay dil ko khol diya, aur us nay paulus kee baaton par tavajjuh dee. ¹⁵us kay aur us kay ghar vaalon kay baptisma lenay kay baad us nay hamen apnay ghar men thahernay kee daavat dee. us nay kaha, “agar aap samajhtay hain ki main vaaqaee khudaavand par eemaan laaee hoon to meray ghar a kar thaheren.” yoon us nay hamen majboor kiya.

filippee kee jel men

¹⁶ek din ham dua kee jagah kee taraf ja rahay thay ki hamaaree mulaaqaat ek laundee say huee jo ek badruh kay zareeay logon kee qismat ka haal bataatee thee. is say vah apnay maalikon kay liyay bahut say paisay kamaatee thee. ¹⁷vah paulus aur hamaaray peechhay pad kar cheekh cheekh kar kahenay lagee, “yah aadmee allaah t’aala kay khaadim hain jo aap ko najaat kee raah bataanay aaay hain.” ¹⁸yah silsila roz-ba-roz jaaree raha. aakhirkaar paulus tang a kar muda aur badruh say kaha, “main tujhay eesa maseeh kay naam say hukm deta hoon ki ladkee men say nikal ja!” usee lamhay vah nikal gaee.

¹⁹us kay maalikon ko maaloom hua ki paisay kamaanay kee ummeed jaatee rahee to vah paulus aur seelaas ko pakad kar chauk men baithay iqtidaar rakhnay vaalon kay saamnay ghaseet lay gaay. ²⁰unhen majistreton kay saamnay pesh karkay vah chillaanay lagay, “yah aadmee hamaaray shaher men halchal paida kar rahay hain. yah yahoodee hain ²¹aur aisay rasm-o-rivaaj ka parchaar kar rahay hain jinhen qabool karna aur ada karna ham romiyon kay liyay jaaiz naheen.” ²²hujoom bhee a mila aur paulus aur seelaas kay khilaaf baaten karnay laga.

is par majistreton nay hukm diya ki un kay kapday utaaray aur unhen laathee say maara jaaay. ²³unhon nay un kee khoob pitaaee karva kar unhen qaidkhaanay men daal diya aur daaroghay say kaha ki ehatiyaat say un kee paheraadaaree karo. ²⁴chunaanchay us nay unhen jel kay sab say androonee hissay men lay ja kar un kay paaon kaath men daal diay.

²⁵ab aisa hua ki paulus aur seelaas aadhee raat kay qareeb dua kar rahay aur allaah kee tamjeed kay geet ga rahay thay aur baaqee qaidee sun rahay thay. ²⁶achaanak bada zalzla aaya aur qaidkhaanay kee pooree imaarat bunyaadon tak hil gaee. fauran tamaam darvaazay khul gaay aur tamaam qaidiyon kee zanjeeren khul gaeen. ²⁷daarogha jaag utha. jab us nay dekha ki jel kay darvaazay khulay hain to vah apnee talvaar nikaal kar khudkushee karnay laga, kyoonki aisa lag raha tha ki qaidee faraar ho gaay hain. ²⁸lekin paulus chilla utha, “mat karen! apnay aap ko nuqsaan na pahunchaaen. ham sab yaheen hain.”

²⁹daaroghay nay charaagh mangva liya aur bhaag kar andar aaya. laraztay laraztay vah paulus aur seelaas kay saamnay gir gaya. ³⁰phir unhen baahar lay ja kar us nay poochha, “saahibo, mujhay najaat paanay kay liyay kya karna hai?”

³¹unhon nay javaab diya, “khudaavand eesa par eemaan laaen to aap aur aap kay gharaanay ko najaat milegee.” ³²phir unhon nay usay aur us kay tamaam ghar vaalon ko khudaavand ka kalaam sunaaya. ³³aur raat kee usee ghadee daaroghay nay unhen lay ja kar un kay zakhmon ko dhoya. is kay baad us ka aur us kay saaray ghar vaalon ka baptisma hua. ³⁴phir us nay unhen apnay ghar men la kar khaana khilaaya. allaah par eemaan laanay kay baais us nay aur us kay tamaam ghar vaalon nay badee khushee manaaee.

³⁵jab din chadha to majistreton nay apnay afsaron ko daaroghay kay paas bhijva diya ki vah paulus aur seelaas ko riha karay.

³⁶chunaanchay daaroghay nay paulus ko un ka paighaam pahuncha diya, “majistreton nay hukm diya hai ki aap aur seelaas ko riha kar diya jaaay. ab nikal kar salaamatee say chalay jaaen.”

³⁷lekin paulus nay etiraaz kiya. us nay un say kaha, “unhon nay hamen avaam kay saamnay hee aur adaalat men pesh kiay baghair maar kar jel men daal diya hai haalaanki ham romee shaheree hain. aur ab vah hamen chupkay say nikaalna chaahatay hain? hargiz naheen! ab vah khud aaen aur hamen baahar lay jaaen.”

³⁸afsaron nay majistreton ko yah khabar pahunchaaee. jab unhen maaloom hua ki paulus aur seelaas romee shaheree hain to vah ghabra gaay. ³⁹vah khud unhen samjhaanay kay liyay aaay aur jel say baahar la kar guzaarish kee ki shaher ko chhod den. ⁴⁰chunaanchay paulus aur seelaas jel say nikal aaay. lekin pahelay vah ludiya kay ghar gaay jahaan vah bhaaiyon say milay aur un kee hausalaaafzaaee kee. phir vah chalay gaay.