Āmaal 15
yarooshalam men mushaavaratee ijtimaa
1us vaqt kuchh aadmee yahoodiya say a kar shaam kay antaakiya men bhaaiyon ko yah taaleem denay lagay, “laazim hai ki aap ka moosa kee shareeat kay mutaabiq khatna kiya jaaay, varna aap najaat naheen pa sakengay.” 2is say un kay aur barnabaas aur paulus kay darmiyaan naaittifaaqee paida ho gaee aur donon un kay saath khoob bahs-mubaahasa karnay lagay. aakhirkaar jamaaat nay paulus aur barnabaas ko muqarrar kiya ki vah chand ek aur maqaamee eemaandaaron kay saath yarooshalam jaaen aur vahaan kay rasoolon aur buzurgon ko yah muaamala pesh karen.
3chunaanchay jamaaat nay unhen ravaana kiya aur vah feneekay aur saamriya men say guzray. raastay men unhon nay maqaamee eemaandaaron ko tafseel say bataaya ki ghairyahoodee kis tarah khudaavand kee taraf rujoo la rahay hain. yah sun kar tamaam bhaaee nihaayat khush huay. 4jab vah yarooshalam pahunch gaay to jamaaat nay apnay rasoolon aur buzurgon samet un ka istiqbaal kiya. phir paulus aur barnabaas nay sab kuchh bayaan kiya jo un kee maarifat hua tha. 5yah sun kar kuchh eemaandaar khaday huay jo fareesee firqay men say thay. unhon nay kaha, “laazim hai ki ghairyahoodiyon ka khatna kiya jaaay aur unhen hukm diya jaaay ki vah moosa kee shareeat kay mutaabiq zindagee guzaaren.”
6rasool aur buzurg is muaamalay par ghaur karnay kay liyay jama huay. 7bahut bahs-mubaahasa kay baad patras khada hua aur kaha, “bhaaiyo, aap jaantay hain ki allaah nay bahut der huee aap men say mujhay chun liya ki ghairyahoodiyon ko allaah kee khushkhabaree sunaaoon taaki vah eemaan laaen. 8aur allaah nay jo dilon ko jaanta hai is baat kee tasdeeq kee hai, kyoonki us nay unhen vahee rooh-ul-quds bakhsha hai jo us nay hamen bhee diya tha. 9us nay ham men aur un men koee bhee farq na rakha balki eemaan say un kay dilon ko bhee paak kar diya. 10chunaanchay aap allaah ko is men kyoon aazma rahay hain ki aap ghairyahoodee shaagirdon kee gardan par ek aisa jooa rakhna chaahatay hain jo na ham aur na hamaaray baapdaada utha saktay thay? 11dekhen, ham to eemaan rakhtay hain ki ham sab ek hee tareeqay yaanee khudaavand eesa kay fazl hee say najaat paatay hain.”
12tamaam log chup rahay to paulus aur barnabaas unhen un ilaahee nishaanon aur mojizon kay baaray men bataanay lagay jo allaah nay un kee maarifat ghairyahoodiyon kay darmiyaan kiay thay. 13jab un kee baat khatm huee to yaaqoob nay kaha, “bhaaiyo, meree baat sunen! 14shamaaoon nay bayaan kiya hai ki allaah nay kis tarah pahela qadam utha kar ghairyahoodiyon par apnee fikrmandee ka izhaar kiya aur un men say apnay liyay ek qaum chun lee. 15aur yah baat nabiyon kee peshgoiyon kay bhee mutaabiq hai. chunaanchay likha hai,
16‘is kay baad main vaapas a kar
daaood kay tabaahashuda ghar ko naay siray say taameer karoonga,
main us kay khandaraat dubaara taameer karkay bahaal karoongaa
17taaki logon ka bacha khacha hissa aur vah tamaam qaumen
mujhay dhoonden jin par meray naam ka thappa laga hai.
yah rabb ka farmaan hai, aur vah yah karega bhee’
18balki yah usay azal say maaloom hai.
19yahee pesh-ay-nazar rakh kar meree raay yah hai ki ham un ghairyahoodiyon ko jo allaah kee taraf rujoo kar rahay hain ghairzarooree takleef na den. 20is kay bajaay behatar yah hai ki ham unhen likh kar hidaayat den ki vah in cheezon say parhez karen : aisay khaanon say jo buton ko pesh kiay jaanay say naapaak hain, zinaakaaree say, aisay jaanvaron ka gosht khaanay say jinhen gala ghoont kar maar diya gaya ho aur khoon khaanay say. 21kyoonki moosvee shareeat kee munaadee karnay vaalay kaee naslon say har shaher men rah rahay hain. jis shaher men bhee jaaen har sabat kay din shareeat kee tilaavat kee jaatee hai.”
ghairyahoodee eemaandaaron kay naam khat
22phir rasoolon aur buzurgon nay pooree jamaaat samet faisla kiya ki ham apnay men say kuchh aadmee chun kar paulus aur barnabaas kay hamraah shaam kay shaher antaakiya bhej den. do ko chuna gaya jo bhaaiyon men raahanuma thay, yahoodaah barsabba aur seelaas. 23un kay haath unhon nay yah khat bheja,
“yarooshalam kay rasoolon aur buzurgon kee taraf say jo aap kay bhaaee hain.
azeez ghairyahoodee bhaaiyo jo antaakiya, shaam aur kilikiya men rahetay hain, asslaamu alaikum!
24suna hai ki ham men say kuchh logon nay aap kay paas a kar aap ko pareshaan karkay bechain kar diya hai, haalaanki ham nay unhen naheen bheja tha. 25is liyay ham sab is par muttafiq huay ki kuchh aadmiyon ko chun kar apnay piyaaray bhaaiyon barnabaas aur paulus kay hamraah aap kay paas bhejen. 26barnabaas aur paulus aisay log hain jinhon nay hamaaray khudaavand eesa maseeh kee khaatir apnee jaan khatray men daal dee hai. 27un kay saathee yahoodaah aur seelaas hain jin ko ham nay is liyay bheja ki vah zabaanee bhee un baaton kee tasdeeq karen jo ham nay likhee hain.
28ham aur rooh-ul-quds is par muttafiq huay hain ki aap par siva-ay-in zarooree baaton kay koee bojh na daalen : 29buton ko pesh kiya gaya khaana mat khaana, khoon mat khaana, aisay jaanvaron ka gosht mat khaana jo gala ghoont kar maar diay gaay hon. is kay ilaava zinaakaaree na karen. in cheezon say baaz rahengay to achchha karengay. khuda haafiz.”
30paulus, barnabaas aur un kay saathee rukhsat ho kar antaakiya chalay gaay. vahaan pahunch kar unhon nay jamaaat ikatthee karkay usay khat day diya. 31usay padh kar eemaandaar us kay hausalaaafza paighaam par khush huay. 32yahoodaah aur seelaas nay bhee jo khud nabee thay bhaaiyon kee hausalaaafzaaee aur mazbootee kay liyay kaafee baaten keen. 33vah kuchh der kay liyay vahaan thaheray, phir maqaamee bhaaiyon nay unhen salaamatee say alvida kaha taaki vah bhejnay vaalon kay paas vaapas ja saken. 34[lekin seelaas ko vahaan thaherna achchha laga.]
35paulus aur barnabaas khud kuchh aur der antaakiya men rahay. vahaan vah bahut say aur logon kay saath khudaavand kay kalaam kee taaleem detay aur us kee munaadee kartay rahay.
paulus aur barnabaas juda ho jaatay hain
36kuchh dinon kay baad paulus nay barnabaas say kaha, “aao, ham mud kar un tamaam shaheron men jaaen jahaan ham nay khudaavand kay kalaam kee munaadee kee hai aur vahaan kay bhaaiyon say mulaaqaat karkay un ka haal maaloom karen.” 37barnabaas muttafiq ho kar yoohanna marqus ko saath lay jaana chaahata tha, 38lekin paulus nay israar kiya ki vah saath na jaaay, kyoonki yoohanna marqus pahelay dauray kay dauraan hee pamfeeliya men unhen chhod kar un kay saath khidmat karnay say baaz aaya tha. 39is say un men itna sakht ikhtilaaf paida hua ki vah ek doosray say juda ho gaay. barnabaas yoohanna marqus ko saath lay kar jahaaz men baith gaya aur qubrus chala gaya, 40jabki paulus nay seelaas ko khidmat kay liyay chun liya. maqaamee bhaaiyon nay unhen khudaavand kay fazl kay sapurd kiya aur vah ravaana huay. 41yoon paulus jamaaaton ko mazboot kartay kartay shaam aur kilikiya men say guzra.