Āmaal 14

ikuniyum men

¹ikuniyum men paulus aur barnabaas yahoodee ibaadatkhaanay men ja kar itnay ikhtiyaar say bolay ki yahoodiyon aur ghairyahoodiyon kee badee taadaad eemaan lay aaee. ²lekin jin yahoodiyon nay eemaan laanay say inkaar kiya unhon nay ghairyahoodiyon ko uksa kar bhaaiyon kay baaray men un kay khayaalaat kharaab kar diay. ³to bhee rasool kaafee der tak vahaan thaheray. unhon nay dileree say khudaavand kay baaray men taaleem dee aur khudaavand nay apnay fazl kay paighaam kee tasdeeq kee. us nay un kay haathon ilaahee nishaan aur mojizay roonuma honay diay. ⁴lekin shaher men aabaad log do gurohon men bat gaay. kuchh yahoodiyon kay haq men thay aur kuchh rasoolon kay haq men.

⁵phir kuchh ghairyahoodiyon aur yahoodiyon men josh a gaya. unhon nay apnay leedron samet faisla kiya ki ham paulus aur barnabaas kee tazleel karkay unhen sangasaar karengay. ⁶lekin jab rasoolon ko pata chala to vah hijrat karkay lukaauniya kay shaheron lustara, dirbay aur ird-gird kay ilaaqay men ⁷allaah kee khushkhabaree sunaatay rahay.

lustara aur dirbe

⁸lustara men paulus aur barnabaas kee mulaaqaat ek aadmee say huee jis kay paaon men taaqat naheen thee. vah paidaaish hee say langda tha aur kabhee bhee chal phir na saka tha. vah vahaan baithaa ⁹un kee baaten sun raha tha ki paulus nay ghaur say us kee taraf dekha. us nay jaan liya ki us aadmee men rihaaee paanay kay laaiq eemaan hai. ¹⁰is liyay vah oonchee aavaaz say bola, “apnay paaon par khaday ho jaaen!” vah uchhal kar khada hua aur chalnay phirnay laga. ¹¹paulus ka yah kaam dekh kar hujoom apnee maqaamee zabaan men chilla utha, “in aadmiyon kee shakl men devta hamaaray paas utar aaay hain.” ¹²unhon nay barnabaas ko yoonaanee devta ziyoos qaraar diya aur paulus ko devta hirmes, kyoonki kalaam sunaanay kee khidmat ziyaadaatar vah anjaam deta tha. ¹³is par shaher say baahar vaaqay ziyoos kay mandir ka pujaaree shaher kay darvaazay par bail aur phoolon kay haar lay aaya aur hujoom kay saath qurbaaniyaan chadhaanay kee tayyaariyaan karnay laga.

¹⁴yah sun kar barnabaas aur saaool apnay kapdon ko phaad kar hujoom men ja ghusay aur chillaanay lagay, ¹⁵“mardo, yah aap kya kar rahay hain? ham bhee aap jaisay insaan hain. ham to aap ko allaah kee yah khushkhabaree sunaanay aaay hain ki aap in bekaar cheezon ko chhod kar zinda khuda kee taraf rujoo farmaaen jis nay aasmaan-o-zameen, samundar aur jo kuchh un men hai paida kiya hai. ¹⁶maazee men us nay tamaam ghairyahoodee qaumon ko khula chhod diya tha ki vah apnee apnee raah par chalen. ¹⁷to bhee us nay aisee cheezen aap kay paas rahenay dee hain jo us kee gavaahee detee hain. us kee meharbaanee is say zaahir hotee hai ki vah aap ko baarish bhej kar har mausam kee faslen muhayya karta hai aur aap ser ho kar khushee say bhar jaatay hain.” ¹⁸in alfaaz kay baavujood paulus aur barnabaas nay badee mushkil say hujoom ko unhen qurbaaniyaan chadhaanay say roka.

¹⁹phir kuchh yahoodee pisidiya kay antaakiya aur ikuniyum say vahaan aaay aur hujoom ko apnee taraf maail kiya. unhon nay paulus ko sangasaar kiya aur shaher say baahar ghaseet kar lay gaay. un ka khayaal tha ki vah mar gaya hai, ²⁰lekin jab shaagird us kay gird jama huay to vah uth kar shaher kee taraf vaapas chal pada. aglay din vah barnabaas samet dirbay chala gaya.

shaam kay antaakiya men vaapsee

²¹dirbay men unhon nay allaah kee khushkhabaree suna kar bahut say shaagird banaaay. phir vah mud kar lustara, ikuniyum aur pisidiya kay antaakiya vaapas aaay. ²²har jagah unhon nay shaagirdon kay dil mazboot karkay un kee hausalaaafzaaee kee ki vah eemaan men saabitqadam rahen. unhon nay kaha, “laazim hai ki ham bahut see museebaton men say guzar kar allaah kee baadshaahee men daakhil hon.” ²³paulus aur barnabaas nay har jamaaat men buzurg bhee muqarrar kiay. unhon nay rozay rakh kar dua kee aur unhen us khudaavand kay sapurd kiya jis par vah eemaan laaay thay.

²⁴yoon pisidiya kay ilaaqay men say safar kartay kartay vah pamfeeliya pahunchay. ²⁵unhon nay pirga men kalaam-ay-muqaddas sunaaya aur phir utar kar attliya pahunchay. ²⁶vahaan say vah jahaaz men baith kar shaam kay shaher antaakiya kay liyay ravaana huay, us shaher kay liyay jahaan eemaandaaron nay unhen is tableeghee safar kay liyay allaah kay fazl kay sapurd kiya tha. yoon unhon nay apnee is khidmat ko poora kiya.

²⁷antaakiya pahunch kar unhon nay eemaandaaron ko jama karkay un tamaam kaamon ka bayaan kiya jo allaah nay un kay vaseelay say kiay thay. saath saath unhon nay yah bhee bataaya ki allaah nay kis tarah ghairyahoodiyon kay liyay bhee eemaan ka darvaaza khol diya hai. ²⁸aur vah kaafee der tak vahaan kay shaagirdon kay paas thaheray rahay.