Āmaal 13
barnabaas aur saaool ko tableeghee khidmat kay liyay chuna jaata hai
1antaakiya kee jamaaat men kaee nabee aur ustaad thay : barnabaas, shamaaoon jo kaala kahelaata tha, lookiyus kurenee, manaahem jis nay baadshaah herodes antipaas kay saath parvarish paaee thee aur saaool. 2ek din jab vah roza rakh kar khudaavand kee parastish kar rahay thay to rooh-ul-quds un say hamkalaam hua, “barnabaas aur saaool ko us khaas kaam kay liyay alag karo jis kay liyay main nay unhen bulaaya hai.”
3is par unhon nay mazeed rozay rakhay aur dua kee, phir un par apnay haath rakh kar unhen rukhsat kar diya.
qubrus men
4yoon barnabaas aur saaool ko rooh-ul-quds kee taraf say bheja gaya. pahelay vah saahilee shaher salookiya gaay aur vahaan jahaaz men baith kar jazeera-ay-qubrus kay liyay ravaana huay. 5jab vah salmees shaher pahunchay to unhon nay yahoodiyon kay ibaadatkhaanon men ja kar allaah ka kalaam sunaaya. yoohanna marqus madadgaar kay taur par un kay saath tha.
6pooray jazeeray men say safar kartay kartay vah paafus shaher tak pahunch gaay. vahaan un kee mulaaqaat ek yahoodee jaadoogar say huee jis ka naam baraeesa tha. vah jhoota nabee thaa 7aur jazeeray kay gavarnar sirgiyus paulus kee khidmat kay liyay haazir raheta tha. sirgiyus ek samajhdaar aadmee tha. us nay barnabaas aur saaool ko apnay paas bula liya kyoonki vah allaah ka kalaam sunnay ka khwaahishmand tha. 8lekin jaadoogar ileemaas (baraeesa ka doosra naam) nay un kee mukhaalafat karkay gavarnar ko eemaan say baaz rakhnay kee koshish kee. 9phir saaool jo paulus bhee kahelaata hai rooh-ul-quds say maamoor hua aur ghaur say us kee taraf dekhnay laga. 10us nay kaha, “iblees kay farzand! too har qism kay dhokay aur badee say bhara hua hai aur har insaaf ka dushman hai. kya too khudaavand kee seedhee raahon ko bigaadnay kee koshish say baaz na aaega? 11ab khudaavand tujhay saza dega. too andha ho kar kuchh der kay liyay sooraj kee raushnee naheen dekhega.”
usee lamhay dhund aur taareekee jaadoogar par chha gaee aur vah tatol tatol kar kisee ko talaash karnay laga jo us kee raahanumaaee karay. 12yah maajra dekh kar gavarnar eemaan laaya, kyoonki khudaavand kee taaleem nay usay hairatzada kar diya tha.
pisidiya kay shaher antaakiya men munaadee
13phir paulus aur us kay saathee jahaaz par savaar huay aur paafus say ravaana ho kar pirga shaher pahunch gaay jo pamfeeliya men hai. vahaan yoohanna marqus unhen chhod kar yarooshalam vaapas chala gaya. 14lekin paulus aur barnabaas aagay nikal kar pisidiya men vaaqay shaher antaakiya pahunchay jahaan vah sabat kay din yahoodee ibaadatkhaanay men ja kar baith gaay. 15tauret aur nabiyon kay saheefon kee tilaavat kay baad ibaadatkhaanay kay raahanumaaon nay unhen kahela bheja, “bhaaiyo, agar aap kay paas logon kay liyay koee naseehat kee baat hai to usay pesh karen.” 16paulus khada hua aur haath ka ishaara karkay bolnay laga,
“israaeel kay mardo aur khudaataras ghairyahoodiyo, meree baat sunen! 17is qaum israaeel kay khuda nay hamaaray baapdaada ko chun kar unhen misr men hee taaqatvar bana diya jahaan vah ajnabee thay. phir vah unhen badee qudrat kay saath vahaan say nikaal laaya. 18jab vah registaan men phir rahay thay to vah chaalees saal tak unhen bardaasht karta raha. 19is kay baad us nay mulk-ay-kan’aan men saat qaumon ko tabaah karkay un kee zameen israaeel ko virsay men dee. 20itnay men taqreeban 450 saal guzar gaay.
yashooa kee maut par allaah nay unhen samooel nabee kay daur tak qaazee diay taaki un kee raahanumaaee karen. 21phir in say tang a kar unhon nay baadshaah maanga, is liyay us nay unhen saaool bin qees day diya jo binyameen kay qabeelay ka tha. saaool chaalees saal tak un ka baadshaah raha, 22phir allaah nay usay hata kar daaood ko takht par bitha diya. daaood vahee aadmee hai jis kay baaray men allaah nay gavaahee dee, ‘main nay daaood bin yassee men ek aisa aadmee paaya hai jo meree soch rakhta hai. jo kuchh bhee main chaahata hoon usay vah karega.’ 23isee baadshaah kee aulaad men say eesa nikla jis ka vaada allaah kar chuka tha aur jisay us nay israaeel ko najaat denay kay liyay bhej diya. 24us kay aanay say peshtar yaheya baptisma denay vaalay nay elaan kiya ki israaeel kee pooree qaum ko tauba karkay baptisma lenay kee zaroorat hai. 25apnee khidmat kay ikhtitaam par us nay kaha, ‘tumhaaray nazdeek main kaun hoon? main vah naheen hoon jo tum samajhtay ho. lekin meray baad vah a raha hai jis kay jooton kay tasmay main kholnay kay laaiq bhee naheen hoon.’
26bhaaiyo, ibraaheem kay farzando aur khuda ka khauf maannay vaalay ghairyahoodiyo! najaat ka paighaam hamen hee bhej diya gaya hai. 27yarooshalam kay rahenay vaalon aur un kay raahanumaaon nay eesa ko na pahechaana balki usay mujrim thaheraaya. yoon un kee maarifat nabiyon kee vah peshgoiyaan pooree hueen jin kee tilaavat har sabat ko kee jaatee hai. 28aur agarchi unhen saza-ay-maut denay kee vajah na milee to bhee unhon nay peelaatus say guzaarish kee ki vah usay saza-ay-maut day. 29jab un kee maarifat eesa kay baaray men tamaam peshgoiyaan pooree hueen to unhon nay usay saleeb say utaar kar qabr men rakh diya. 30lekin allaah nay usay murdon men say zinda kar diyaa 31aur vah bahut dinon tak apnay un pairokaaron par zaahir hota raha jo us kay saath galeel say yarooshalam aaay thay. yah ab hamaaree qaum kay saamnay us kay gavaah hain. 32aur ab ham aap ko yah khushkhabaree sunaanay aaay hain ki jo vaada allaah nay hamaaray baapdaada kay saath kiya, 33usay us nay eesa ko zinda karkay hamaaray liyay jo un kee aulaad hain poora kar diya hai. yoon doosray zaboor men likha hai, ‘too mera farzand hai, aaj main tera baap ban gaya hoon.’ 34is haqeeqat ka zikr bhee kalaam-ay-muqaddas men kiya gaya hai ki allaah usay murdon men say zinda karkay kabhee galnay sadnay naheen dega : ‘main tumhen un muqaddas aur anmit meharbaaniyon say navaazoonga jin ka vaada daaood say kiya tha.’ 35yah baat ek aur havaalay men pesh kee gaee hai, ‘too apnay muqaddas ko galnay sadnay kee naubat tak pahunchnay naheen dega.’ 36is havaalay ka taalluq daaood kay saath naheen hai, kyoonki daaood apnay zamaanay men allaah kee marzee kee khidmat karnay kay baad faut ho kar apnay baapdaada say ja mila. us kee laash gal kar khatm ho gaee. 37balki yah havaala kisee aur ka zikr karta hai, us ka jisay allaah nay zinda kar diya aur jis ka jism galnay sadnay say dochaar na hua. 38bhaaiyo, ab meree yah baat jaan len, ham is kee munaadee karnay aaay hain ki aap ko is shakhs eesa kay vaseelay say apnay gunaahon kee muaafee miltee hai. moosa kee shareeat aap ko kisee tarah bhee raastbaaz qaraar naheen day saktee thee, 39lekin ab jo bhee eesa par eemaan laaay usay har lihaaz say raastbaaz qaraar diya jaata hai. 40is liyay khabardaar! aisa na ho ki vah baat aap par pooree utray jo nabiyon kay saheefon men likhee hai,
41‘ghaur karo, mazaaq udaanay vaalo!
hairatzada ho kar halaak ho jaao.
kyoonki main tumhaaray jeetay jee ek aisa kaam karoongaa
jis kee jab khabar sunoge
to tumhen yaqeen naheen aaega’.”
42jab paulus aur barnabaas ibaadatkhaanay say nikalnay lagay to logon nay un say guzaarish kee, “aglay sabat hamen in baaton kay baaray men mazeed kuchh bataaen.” 43ibaadat kay baad bahut say yahoodee aur yahoodee eemaan kay naumureed paulus aur barnabaas kay peechhay ho liyay, aur donon nay un say baat karkay un kee hausalaaafzaaee kee ki allaah kay fazl par qaaim rahen.
44aglay sabat kay din taqreeban tamaam shaher khudaavand ka kalaam sunnay ko jama hua. 45lekin jab yahoodiyon nay hujoom ko dekha to vah hasad say jal gaay aur paulus kee baaton kee tardeed karkay kufr baknay lagay. 46is par paulus aur barnabaas nay un say saaf saaf kah diya, “laazim tha ki allaah ka kalaam pahelay aap ko sunaaya jaaay. lekin choonki aap usay mustarad karkay apnay aap ko abdee zindagee kay laaiq naheen samajhtay is liyay ham ab ghairyahoodiyon kee taraf rukh kartay hain. 47kyoonki khudaavand nay hamen yahee hukm diya jab us nay farmaaya, ‘main nay tujhay deegar aqvaam kee raushnee bana dee hai taaki too meree najaat ko duniya kee intiha tak pahunchaaay’.”
48yah sun kar ghairyahoodee khush huay aur khudaavand kay kalaam kee tamjeed karnay lagay. aur jitnay abdee zindagee kay liyay muqarrar kiay gaay thay vah eemaan laaay.
49yoon khudaavand ka kalaam pooray ilaaqay men phail gaya. 50phir yahoodiyon nay shaher kay leedron aur yahoodee eemaan rakhnay vaalee kuchh baarsookh ghairyahoodee khavaateen ko uksa kar logon ko paulus aur barnabaas ko sataanay par ubhaara. aakhirkaar unhen shaher kee sarhaddon say nikaal diya gaya. 51is par vah un kay khilaaf gavaahee kay taur par apnay jooton say gard jhaadkar aagay badhay aur ikuniyum shaher pahunch gaay. 52aur antaakiya kay shaagird khushee aur rooh-ul-quds say bharay rahay.