Āmaal 12

mazeed eezaarasaanee

¹un dinon men baadshaah herodes agrippa jamaaat kay kuchh eemaandaaron ko giriftaar karkay un say badasulookee karnay laga. ²is silsilay men us nay yaaqoob rasool (yoohanna kay bhaaee) ko talvaar say qatl karvaaya. ³jab us nay dekha ki yah harkat yahoodiyon ko pasand aaee hai to us nay patras ko bhee giriftaar kar liya. us vaqt bekhameeree rotee kee eed manaaee ja rahee thee. ⁴us nay usay jel men daal kar chaar daston kay havaalay kar diya ki us kee paheraadaaree karen (har dastay men chaar faujee thay). khayaal tha ki eed kay baad hee patras ko avaam kay saamnay khada karkay us kee adaalat kee jaaay. ⁵yoon patras qaidkhaanay men raha. lekin eemaandaaron kee jamaaat lagaataar us kay liyay dua kartee rahee.

patras kee rihaaee

⁶phir adaalat ka din qareeb a gaya. patras raat kay vaqt so raha tha. aglay din herodes usay pesh karna chaahata tha. patras do faujiyon kay darmiyaan leta hua tha jo do zanjeeron say us kay saath bandhay huay thay. deegar faujee darvaazay kay saamnay pahera day rahay thay. ⁷achaanak ek tez raushnee kothdee men chamak uthee aur rabb ka ek farishta patras kay saamnay a khada hua. us nay us kay paheloo ko jhatka day kar usay jaga diya aur kaha, “jaldee karo! utho!” tab patras kee kalaaiyon par kee zanjeeren gir gaeen. ⁸phir farishtay nay usay bataaya, “apnay kapday aur jootay pahen lo.” patras nay aisa hee kiya. farishtay nay kaha, “ab apnee chaadar odh kar meray peechhay ho lo.” ⁹chunaanchay patras kothdee say nikal kar farishtay kay peechhay ho liya agarchi usay ab tak samajh naheen aaee thee ki jo kuchh ho raha hai haqeeqee hai. us ka khayaal tha ki main roya dekh raha hoon. ¹⁰donon pahelay paheray say guzar gaay, phir doosray say aur yoon shaher men pahunchaanay vaalay lohay kay get kay paas aaay. yah khud-ba-khud khul gaya aur vah donon nikal kar ek galee men chalnay lagay. chaltay chaltay farishtay nay achaanak patras ko chhod diya.

¹¹phir patras hosh men a gaya. us nay kaha, “vaaqaee, khudaavand nay apnay farishtay ko meray paas bhej kar mujhay herodes kay haath say bachaaya hai. ab yahoodee qaum kee tavaqqo pooree naheen hogee.”

¹²jab yah baat usay samajh aaee to vah yoohanna marqus kee maan mariyam kay ghar chala gaya. vahaan bahut say afraad jama ho kar dua kar rahay thay. ¹³patras nay get khatkhataaya to ek naukraanee dekhnay kay liyay aaee. us ka naam rudee tha. ¹⁴jab us nay patras kee aavaaz pahechaan lee to vah khushee kay maaray get ko kholnay kay bajaay daud kar andar chalee gaee aur bataaya, “patras get par khaday hain!” ¹⁵haazireen nay kaha, “hosh men aao!” lekin vah apnee baat par adee rahee. phir unhon nay kaha, “yah us ka farishta hoga.”

¹⁶ab tak patras baahar khada khatkhata raha tha. chunaanchay unhon nay get ko khol diya. patras ko dekh kar vah hairaan rah gaay. ¹⁷lekin us nay apnay haath say khaamosh rahenay ka ishaara kiya aur unhen saara vaaqia sunaaya ki khudaavand mujhay kis tarah jel say nikaal laaya hai. “yaaqoob aur baaqee bhaaiyon ko bhee yah bataana,” yah kah kar vah kaheen aur chala gaya.

¹⁸aglee subah jel kay faujiyon men badee halchal mach gaee ki patras ka kya hua hai. ¹⁹jab herodes nay usay dhoonda aur na paaya to us nay paheredaaron ka bayaan lay kar unhen saza-ay-maut day dee.

is kay baad vah yahoodiya say chala gaya aur qaisriya men rahenay laga.

herodes agrippa kee maut

²⁰us vaqt vah soor aur saida kay baashindon say nihaayat naaraaz tha. is liyay donon shaheron kay numaainday mil kar sulah kee darakhwaast karnay kay liyay us kay paas aaay. vajah yah thee ki un kee khuraak herodes kay mulk say haasil hotee thee. unhon nay baadshaah kay mahel kay inchaarj blastus ko is par aamaada kiya ki vah un kee madad kare ²¹aur baadshaah say milnay ka din muqarrar kiya. jab vah din aaya to herodes apna shaahee libaas pahen kar takht par baith gaya aur ek alaaniya taqreer kee. ²²avaam nay naaray laga laga kar pukaara, “yah allaah kee aavaaz hai, insaan kee naheen.” ²³vah abhee yah kah rahay thay ki rabb kay farishtay nay herodes ko maara, kyoonki us nay logon kee parastish qabool karkay allaah ko jalaal naheen diya tha. vah beemaar hua aur keedon nay us kay jism ko kha kha kar khatm kar diya. isee haalat men vah mar gaya.

²⁴lekin allaah ka kalaam badhta aur phailta gaya.

²⁵itnay men barnabaas aur saaool antaakiya ka hadiya lay kar yarooshalam pahunch chukay thay. unhon nay paisay vahaan kay buzurgon kay sapurd kar diay aur phir yoohanna marqus ko saath lay kar vaapas chalay gaay.