Āmaal 11

yarooshalam kee jamaaat men patras kee riport

¹yah khabar rasoolon aur yahoodiya kay baaqee bhaaiyon tak pahunchee ki ghairyahoodiyon nay bhee allaah ka kalaam qabool kiya hai. ²chunaanchay jab patras yarooshalam vaapas aaya to yahoodee eemaandaar us par etiraaz karnay lagay, ³“aap ghairyahoodiyon kay ghar men gaay aur un kay saath khaana bhee khaaya.” ⁴phir patras nay un kay saamnay tarteeb say sab kuchh bayaan kiya jo hua tha.

⁵“main yaafa shaher men dua kar raha tha ki vajd kee haalat men a kar roya dekhee. aasmaan say ek cheez zameen par utar rahee hai, kataan kee badee chaadar jaisee jo apnay chaaron konon say utaaree ja rahee hai. utartee utartee vah mujh tak pahunch gaee. ⁶jab main nay ghaur say dekha to pata chala ki us men tamaam qism kay jaanvar hain : chaar paaon vaalay, rengnay vaalay aur parinday. ⁷phir ek aavaaz mujh say mukhaatib huee, ‘patras, uth! kuchh zabah karkay kha!’ ⁸main nay etiraaz kiya, ‘hargiz naheen, khudaavand, main nay kabhee bhee haraam ya naapaak khaana naheen khaaya.’ ⁹lekin yah aavaaz dubaara mujh say hamkalaam huee, ‘jo kuchh allaah nay paak kar diya hai usay naapaak qaraar na day.’ ¹⁰teen martaba aisa hua, phir chaadar ko jaanvaron samet vaapas aasmaan par utha liya gaya. ¹¹usee vaqt teen aadmee us ghar kay saamnay ruk gaay jahaan main thahera hua tha. unhen qaisriya say meray paas bheja gaya tha. ¹²rooh-ul-quds nay mujhay bataaya ki main baghair jhijkay un kay saath chala jaaoon. yah meray chhah bhaaee bhee meray saath gaay. ham ravaana ho kar us aadmee kay ghar men daakhil huay jis nay mujhay bulaaya tha. ¹³us nay hamen bataaya ki ek farishta ghar men us par zaahir hua tha jis nay usay kaha tha, ‘kisee ko yaafa bhej kar shamaaoon ko bula lo jo patras kahelaata hai. ¹⁴us kay paas vah paighaam hai jis kay zareeay tum apnay pooray gharaanay samet najaat paaogay.’ ¹⁵jab main vahaan bolnay laga to rooh-ul-quds un par naazil hua, bilkul usee tarah jis tarah vah shuroo men ham par hua tha. ¹⁶phir mujhay vah baat yaad aaee jo khudaavand nay kahee thee, ‘yaheya nay tum ko paanee say baptisma diya, lekin tumhen rooh-ul-quds say baptisma diya jaaega.’ ¹⁷allaah nay unhen vahee nemat dee jo us nay hamen bhee dee thee jo khudaavand eesa maseeh par eemaan laaay thay. to phir main kaun tha ki allaah ko rokta?”

¹⁸patras kee yah baaten sun kar yarooshalam kay eemaandaar etiraaz karnay say baaz aaay aur allaah kee tamjeed karnay lagay. unhon nay kaha, “to is ka matlab hai ki allaah nay ghairyahoodiyon ko bhee tauba karnay aur abdee zindagee paanay ka mauqa diya hai.”

antaakiya men jamaaat

¹⁹jo eemaandaar stifanus kee maut kay baad kee eezaarasaanee say bikhar gaay thay vah feneekay, qubrus aur antaakiya tak pahunch gaay. jahaan bhee vah jaatay vahaan allaah ka paighaam sunaatay alabatta sirf yahoodiyon ko. ²⁰lekin un men say kuren aur qubrus kay kuchh aadmee antaakiya shaher ja kar yoonaaniyon ko bhee khudaavand eesa kay baaray men khushkhabaree sunaanay lagay. ²¹khudaavand kee qudrat un kay saath thee, aur bahut say logon nay eemaan la kar khudaavand kee taraf rujoo kiya. ²²is kee khabar yarooshalam kee jamaaat tak pahunch gaee to unhon nay barnabaas ko antaakiya bhej diya. ²³jab vah vahaan pahuncha aur dekha ki allaah kay fazl say kya kuchh hua hai to vah khush hua. us nay un sab kee hausalaaafzaaee kee ki vah pooree lagan say khudaavand kay saath liptay rahen. ²⁴barnabaas nek aadmee tha jo rooh-ul-quds aur eemaan say maamoor tha. chunaanchay us vaqt bahut say log khudaavand kee jamaaat men shaamil huay.

²⁵is kay baad vah saaool kee talaash men tarsus chala gaya. ²⁶jab usay mila to vah usay antaakiya lay aaya. vahaan vah donon ek pooray saal tak jamaaat men shaamil hotay aur bahut say logon ko sikhaatay rahay. antaakiya pahela maqaam tha jahaan eemaandaar maseehee kahelaanay lagay.

²⁷un dinon kuchh nabee yarooshalam say a kar antaakiya pahunch gaay. ²⁸ek ka naam agbus tha. vah khada hua aur rooh-ul-quds kee maarifat peshgoee kee ki rom kee pooree mamlakat men sakht kaal padega. (yah baat us vaqt pooree huee jab shahenshaah klaudiyus kee hukoomat thee.) ²⁹agbus kee baat sun kar antaakiya kay shaagirdon nay faisla kiya ki ham men say har ek apnee maalee gunjaaish kay mutaabiq kuchh day taaki usay yahoodiya men rahenay vaalay bhaaiyon kee imdaad kay liyay bheja ja sakay. ³⁰unhon nay apnay is hadiay ko barnabaas aur saaool kay sapurd karkay vahaan kay buzurgon ko bhej diya.