Āmaal 10
patras aur kurneliyus
1qaisriya men ek romee afsar [a] sau sipaahiyon par muqarrar afsar. raheta tha jis ka naam kurneliyus tha. vah us paltan kay sau faujiyon par muqarrar tha jo itaalvee kahelaatee thee. 2kurneliyus apnay pooray gharaanay samet deendaar aur khudaataras tha. vah fayyaazee say khairaat deta aur mutvaatir dua men laga raheta tha. 3ek din us nay teen bajay dopaher kay vaqt roya dekhee. us men us nay saaf taur par allaah ka ek farishta dekha jo us kay paas aaya aur kaha, “kurneliyus!”
4vah ghabra gaya aur usay ghaur say dekhtay huay kaha, “meray aaqa, farmaaen.”
farishtay nay kaha, “tumhaaree duaaon aur khairaat kee qurbaanee allaah kay huzoor pahunch gaee hai aur manzoor hai. 5ab kuchh aadmee yaafa bhej do. vahaan ek aadmee banaam shamaaoon hai jo patras kahelaata hai. usay bula kar lay aao. 6patras ek chamda rangnay vaalay ka mehamaan hai jis ka naam shamaaoon hai. us ka ghar samundar kay qareeb vaaqay hai.”
7joon hee farishta chala gaya kurneliyus nay do naukron aur apnay khidmatgaar faujiyon men say ek khudaataras aadmee ko bulaaya. 8sab kuchh suna kar us nay unhen yaafa bhej diya.
9aglay din patras dopaher taqreeban baarah bajay dua karnay kay liyay chhat par chadh gaya. us vaqt kurneliyus kay bhejay huay aadmee yaafa shaher kay qareeb pahunch gaay thay. 10patras ko bhook lagee aur vah kuchh khaana chaahata tha. jab us kay liyay khaana tayyaar kiya ja raha tha to vah vajd kee haalat men a gaya. 11us nay dekha ki aasmaan khul gaya hai aur ek cheez zameen par utar rahee hai, kataan kee badee chaadar jaisee jo apnay chaar konon say neechay utaaree ja rahee hai. 12chaadar men tamaam qism kay jaanvar hain : chaar paaon rakhnay vaalay, rengnay vaalay aur parinday. 13phir ek aavaaz us say mukhaatib huee, “uth, patras. kuchh zabah karkay kha!”
14patras nay etiraaz kiya, “hargiz naheen khudaavand, main nay kabhee bhee haraam ya naapaak khaana naheen khaaya.”
15lekin yah aavaaz dubaara us say hamkalaam huee, “jo kuchh allaah nay paak kar diya hai usay naapaak qaraar na day.” 16yahee kuchh teen martaba hua, phir chaadar ko achaanak aasmaan par vaapas utha liya gaya.
17patras badee uljhan men pad gaya. vah abhee soch raha tha ki is roya ka kya matlab hai to kurneliyus kay bhejay huay aadmee shamaaoon kay ghar ka pata karkay us kay get par pahunch gaay. 18aavaaz day kar unhon nay poochha, “kya shamaaoon jo patras kahelaata hai aap kay mehamaan hain?”
19patras abhee roya par ghaur kar hee raha tha ki rooh-ul-quds us say hamkalaam hua, “shamaaoon, teen mard teree talaash men hain. 20uth aur chhat say utar kar un kay saath chala ja. mat jhijakna, kyoonki main hee nay unhen teray paas bheja hai.” 21chunaanchay patras un aadmiyon kay paas gaya aur un say kaha, “main vahee hoon jisay aap dhoond rahay hain. aap kyoon meray paas aaay hain?”
22unhon nay javaab diya, “ham sau faujiyon par muqarrar afsar kurneliyus kay ghar say aaay hain. vah insaafaparvar aur khudaataras aadmee hain. pooree yahoodee qaum is kee tasdeeq kar saktee hai. ek muqaddas farishtay nay unhen hidaayat dee ki vah aap ko apnay ghar bula kar aap ka paighaam sunen.” 23yah sun kar patras unhen andar lay gaya aur un kee mehamaan-navaazee kee. aglay din vah uth kar un kay saath ravaana hua. yaafa kay kuchh bhaaee bhee saath gaay. 24ek din kay baad vah qaisriya pahunch gaya. kurneliyus un kay intizaar men tha. us nay apnay rishtedaaron aur qareebee doston ko bhee apnay ghar jama kar rakha tha. 25jab patras ghar men daakhil hua to kurneliyus nay us kay saamnay gir kar usay sijda kiya. 26lekin patras nay usay utha kar kaha, “uthen. main bhee insaan hee hoon.” 27aur us say baaten kartay kartay vah andar gaya aur dekha ki bahut say log jama ho gaay hain. 28us nay un say kaha, “aap jaantay hain ki kisee yahoodee kay liyay kisee ghairyahoodee say rifaaqat rakhna ya us kay ghar men jaana mana hai. lekin allaah nay mujhay dikhaaya hai ki main kisee ko bhee haraam ya naapaak qaraar na doon. 29is vajah say jab mujhay bulaaya gaya to main etiraaz kiay baghair chala aaya. ab mujhay bata deejiay ki aap nay mujhay kyoon bulaaya hai?”
30kurneliyus nay javaab diya, “chaar din kee baat hai ki main isee vaqt dopaher teen bajay dua kar raha tha. achaanak ek aadmee meray saamnay a khada hua. us kay kapday chamak rahay thay. 31us nay kaha, ‘kurneliyus, allaah nay tumhaaree dua sun lee aur tumhaaree khairaat ka khayaal kiya hai. 32ab kisee ko yaafa bhej kar shamaaoon ko bula lo jo patras kahelaata hai. vah chamda rangnay vaalay shamaaoon ka mehamaan hai. shamaaoon ka ghar samundar kay qareeb vaaqay hai.’ 33yah suntay hee main nay apnay logon ko aap ko bulaanay kay liyay bhej diya. achchha hua ki aap a gaay hain. ab ham sab allaah kay huzoor haazir hain taaki vah kuchh sunen jo rabb nay aap ko hamen bataanay ko kaha hai.”
patras kee taqreer
34phir patras bol utha, “ab main samajh gaya hoon ki allaah vaaqaee jaanibdaar naheen, 35balki har kisee ko qabool karta hai jo us ka khauf maanta aur raast kaam karta hai. 36aap allaah kee us khushkhabaree say vaaqif hain jo us nay israaeeliyon ko bhejee, yah khushkhabaree ki eesa maseeh kay vaseelay say salaamatee aaee hai. eesa maseeh sab ka khudaavand hai. 37aap ko vah kuchh maaloom hai jo galeel say shuroo ho kar yahoodiya kay pooray ilaaqay men hua yaanee us baptismay kay baad jis kee munaadee yaheya nay kee. 38aur aap jaantay hain ki allaah nay eesa naasree ko rooh-ul-quds aur quvvat say masah kiya aur ki is par us nay jagah jagah ja kar nek kaam kiya aur iblees kay dabay huay tamaam logon ko shifa dee, kyoonki allaah us kay saath tha. 39jo kuchh bhee us nay mulk-ay-yahood aur yarooshalam men kiya, us kay gavaah ham khud hain. go logon nay usay lakdee par latka kar qatl kar diyaa 40lekin allaah nay teesray din usay murdon men say zinda kiya aur usay logon par zaahir kiya. 41vah pooree qaum par to zaahir naheen hua balki ham par jin ko allaah nay pahelay say chun liya tha taaki ham us kay gavaah hon. ham nay us kay jee uthnay kay baad us kay saath khaanay-peenay kee rifaaqat bhee rakhee. 42us vaqt us nay hamen hukm diya ki munaadee karkay qaum ko gavaahee do ki eesa vahee hai jisay allaah nay zindon aur murdon par munsif muqarrar kiya hai. 43tamaam nabee us kee gavaahee detay hain ki jo bhee us par eemaan laaay usay us kay naam kay vaseelay say gunaahon kee muaafee mil jaaegee.”
rooh-ul-quds ghairyahoodiyon par naazil hota hai
44patras abhee yah baat kar hee raha tha ki tamaam sunnay vaalon par rooh-ul-qoodas naazil hua. 45jo yahoodee eemaandaar patras kay saath aaay thay vah hakka-bakka rah gaay ki rooh-ul-quds kee nemat ghairyahoodiyon par bhee undelee gaee hai, 46kyoonki unhon nay dekha ki vah ghairzabaanen bol rahay aur allaah kee tamjeed kar rahay hain. tab patras nay kaha, 47“ab kaun in ko baptisma lenay say rok sakta hai? inhen to hamaaree tarah rooh-ul-quds haasil hua hai.” 48aur us nay hukm diya ki unhen eesa maseeh kay naam say baptisma diya jaaay. is kay baad unhon nay patras say guzaarish kee ki kuchh din hamaaray paas thaheren.