Āmaal 1

¹muazzaz thiyufilus, pahelee kitaab men main nay sab kuchh bayaan kiya jo eesa nay shuroo say lay kar ²us din tak kiya aur sikhaaya, jab usay aasmaan par uthaaya gaya. jaanay say pahelay us nay apnay chunay huay rasoolon ko rooh-ul-quds kee maarifat mazeed hidaayaat deen. ³apnay dukh uthaanay aur maut sahenay kay baad us nay apnay aap ko zaahir karkay unhen bahut see daleelon say qaail kiya ki vah vaaqaee zinda hai. vah chaalees din kay dauraan un par zaahir hota aur unhen allaah kee baadshaahee kay baaray men bataata raha. ⁴jab vah abhee un kay saath tha us nay unhen hukm diya, “yarooshalam ko na chhodna balki is intizaar men yaheen thahero ki baap ka vaada poora ho jaaay, vah vaada jis kay baaray men main nay tum ko aagaah kiya hai. ⁵kyoonki yaheya nay to paanee say baptisma diya, lekin tum ko thoday dinon kay baad rooh-ul-quds say baptisma diya jaaega.”

eesa ko uthaaya jaata hai

⁶jo vahaan jama thay unhon nay us say poochha, “khudaavand, kya aap isee vaqt israaeel kay liyay us kee baadshaahee dubaara qaaim karengay?”

⁷eesa nay javaab diya, “yah jaanna tumhaara kaam naheen hai balki sirf baap ka jo aisay auqaat aur taareekhen muqarrar karnay ka ikhtiyaar rakhta hai. ⁸lekin tumhen rooh-ul-quds kee quvvat milegee jo tum par naazil hoga. phir tum yarooshalam, pooray yahoodiya aur saamriya balki duniya kee intiha tak meray gavaah hogay.” ⁹yah kah kar vah un kay dekhtay dekhtay utha liya gaya. aur ek baadal nay usay un kee nazron say ojhal kar diya.

¹⁰vah abhee aasmaan kee taraf dekh hee rahay thay ki achaanak do aadmee un kay paas a khaday huay. donon safed libaas pahenay huay thay. ¹¹unhon nay kaha, “galeel kay mardo, aap kyoon khaday aasmaan kee taraf dekh rahay hain? yahee eesa jisay aap kay paas say aasmaan par uthaaya gaya hai usee tarah vaapas aaega jis tarah aap nay usay oopar jaatay huay dekha hai.”

yahoodaah ka jaansheen

¹²phir vah zaitoon kay pahaad say yarooshalam shaher vaapas chalay gaay. (yah pahaad shaher say taqreeban ek kilomeetar door hai.) ¹³vahaan pahunch kar vah us baalaakhaanay men daakhil huay jis men vah thaheray huay thay, yaanee patras, yoohanna, yaaqoob aur andriyaas, filippus aur toma, baratulmaaee aur mattee, yaaqoob bin halfaee, shamaaoon mujaahid aur yahoodaah bin yaaqoob. ¹⁴yah sab yakdil ho kar dua men lagay rahay. kuchh aurten, eesa kee maan mariyam aur us kay bhaaee bhee saath thay.

¹⁵un dinon men patras bhaaiyon men khada hua. us vaqt taqreeban 120 log jama thay. us nay kaha, ¹⁶“bhaaiyo, laazim tha ki kalaam-ay-muqaddas kee vah peshgoee pooree ho jo rooh-ul-quds nay daaood kee maarifat yahoodaah kay baaray men kee. yahoodaah un ka raahanuma ban gaya jinhon nay eesa ko giriftaar kiya, ¹⁷go usay ham men shumaar kiya jaata tha aur vah isee khidmat men hamaaray saath shareek tha.”

¹⁸(jo paisay yahoodaah ko us kay ghalat kaam kay liyay mil gaay thay un say us nay ek khet khareed liya tha. vahaan vah sar kay bal gir gaya, us ka pet phat gaya aur us kee tamaam antadiyaan baahar nikal padeen. ¹⁹is ka charcha yarooshalam kay tamaam baashindon men phail gaya, is liyay yah khet un kee maadree zabaan men haqaldama kay naam say mashhoor hua jis ka matlab hai khoon ka khet.)

²⁰patras nay apnee baat jaaree rakhee, “yahee baat zaboor kee kitaab men likhee hai, ‘us kee rihaaishgaah sunsaan ho jaaay, koee us men aabaad na ho.’ yah bhee likha hai, ‘koee aur us kee zimmaadaaree uthaaay.’ ²¹chunaanchay ab zarooree hai ki ham yahoodaah kee jagah kisee aur ko chun len. yah shakhs un mardon men say ek ho jo us pooray vaqt kay dauraan hamaaray saath safar kartay rahay jab khudaavand eesa hamaaray saath tha, ²²yaanee us kay yaheya kay haath say baptisma lenay say lay kar us vaqt tak jab usay hamaaray paas say uthaaya gaya. laazim hai ki un men say ek hamaaray saath eesa kay jee uthnay ka gavaah ho.”

²³chunaanchay unhon nay do aadmee pesh kiay, yoosuf jo barsabba kahelaata tha (us ka doosra naam yoostus tha) aur mattiyaah. ²⁴phir unhon nay dua kee, “ai khudaavand, too har ek kay dil say vaaqif hai. ham par zaahir kar ki too nay in donon men say kis ko chuna hai ²⁵taaki vah us khidmat kee zimmaadaaree uthaaay jo yahoodaah chhod kar vahaan chala gaya jahaan usay jaana hee tha.” ²⁶yah kah kar unhon nay donon ka naam lay kar qur’a daala to mattiyaah ka naam nikla. lihaaza usay bhee gyaarah rasoolon men shaamil kar liya gaya.