3 Yoohanna 1
1yah khat buzurg yoohanna kee taraf say hai.
main apnay azeez gayus ko likh raha hoon jisay main sachchaaee say piyaar karta hoon.
2meray azeez, meree dua hai ki aap ka haal har tarah say theek ho aur aap jismaanee taur par utnay hee tandurust hon jitnay aap ruhaanee lihaaz say hain. 3kyoonki main nihaayat khush hua jab bhaaiyon nay a kar gavaahee dee ki aap kis tarah sachchaaee kay mutaabiq zindagee guzaartay hain. aur yaqeenan aap hamesha sachchaaee kay mutaabiq zindagee guzaartay hain. 4jab main sunta hoon ki meray bachchay sachchaaee kay mutaabiq zindagee guzaar rahay hain to yah meray liyay sab say ziyaada khushee ka baais hota hai.
gayus kee taareef
5meray azeez, jo kuchh aap bhaaiyon kay liyay kar rahay hain us men aap vafaadaaree dikha rahay hain, haalaanki vah aap kay jaannay vaalay naheen hain. 6unhon nay khuda kee jamaaat kay saamnay hee aap kee muhabbat kee gavaahee dee hai. meharbaanee karkay un kee safar kay liyay yoon madad karen ki allaah khush ho. 7kyoonki vah maseeh kay naam kee khaatir safar kay liyay niklay hain aur ghaireemaandaaron say madad naheen letay. 8chunaanchay yah hamaara farz hai ki ham aisay logon kee mehamaan-navaazee karen, kyoonki yoon ham bhee sachchaaee kay hamkhidmat ban jaatay hain.
diyutrifes aur demetriyus
9main nay to jamaaat ko kuchh likh diya tha, lekin diyutrifes jo un men avval honay kee khwaahish rakhta hai hamen qabool naheen karta. 10chunaanchay main jab aaoonga to usay un buree harkaton kee yaad dilaaoonga jo vah kar raha hai, kyoonki vah hamaaray khilaaf buree baaten bak raha hai. aur na sirf yah balki vah bhaaiyon ko khush’aamadeed kahenay say bhee inkaar karta hai. jab doosray yah karna chaahatay hain to vah unhen rok kar jamaaat say nikaal deta hai.
11meray azeez, jo bura hai us kee naqal mat karna balki us kee karna jo achchha hai. jo achchha kaam karta hai vah allaah say hai. lekin jo bura kaam karta hai us nay allaah ko naheen dekha.
12sab log demetriyus kee achchhee gavaahee detay hain balki sachchaaee khud bhee us kee achchhee gavaahee detee hai. ham bhee is kay gavaah hain, aur aap jaantay hain ki hamaaree gavaahee sachchee hai.
aakhiree salaam
13mujhay aap ko bahut kuchh likhna tha, lekin yah aisee baaten hain jo main qalam aur siyaahee kay zareeay aap ko naheen bata sakta. 14main jald hee aap say milnay kee ummeed rakhta hoon. phir ham roo-ba-roo baat karengay.
15salaamatee aap kay saath hotee rahay.
yahaan kay dost aap ko salaam kahetay hain. vahaan kay har dost ko shakhsee taur par hamaara salaam den.