2 Teemuthiyus 4
1main allaah aur maseeh eesa kay saamnay jo zindon aur murdon kee adaalat karega aur us kee aamad aur baadshaahee kee yaad dila kar sanjeedgee say is kee taakeed karta hoon, 2ki vaqt bevaqt kalaam-ay-muqaddas kee munaadee karnay kay liyay tayyaar rahen. baday sabr say eemaandaaron ko taaleem day kar unhen samjhaaen, malaamat karen aur un kee hausalaaafzaaee bhee karen. 3kyoonki ek vaqt aaega jab log sehatabakhsh taaleem bardaasht naheen karengay balki apnay paas apnee buree khwaahishaat say mutaabiqat rakhnay vaalay ustaadon ka dher laga lengay. yah ustaad unhen sirf dil bahelaanay vaalee baaten sunaaengay, sirf vah kuchh jo vah sunna chaahatay hain. 4vah sachchaaee ko sunnay say baaz a kar farzee kahaaniyon kay peechhay pad jaaengay. 5lekin aap khud har haalat men hosh men rahen. dukh ko bardaasht karen, allaah kee khushkhabaree sunaatay rahen aur apnee khidmat kay tamaam faraaiz ada karen.
6jahaan tak mera taalluq hai, vah vaqt a chuka hai ki mujhay mai kee nazar kee tarah qurbaangaah par undela jaaay. meray kooch ka vaqt a gaya hai. 7main nay achchhee kushtee ladee hai, main daud kay ikhtitaam tak pahunch gaya hoon, main nay eemaan ko mahfooz rakha hai. 8aur ab ek in’aam tayyaar pada hai, raastbaazee ka vah taaj jo khudaavand hamaara raast munsif mujhay apnee aamad kay din dega. aur na sirf mujhay balki un sab ko jo us kee aamad kay aarzoomand rahay hain.
kuchh shakhsee baaten
9meray paas aanay men jaldee karen. 10kyoonki demaas nay is duniya ko piyaar karkay mujhay chhod diya hai. vah thissaluneekay chala gaya. kreskens galtiya aur titus dalmatiya chalay gaay hain. 11sirf looqa meray paas hai. marqus ko apnay saath lay aana, kyoonki vah khidmat kay liyay mufeed saabit hoga. 12tukhikus ko main nay ifisus bhej diya hai. 13aatay vaqt mera vah kot apnay saath lay aaen jo main troaas men karpus kay paas chhod aaya tha. meree kitaaben bhee lay aaen, khaaskar charmee kaaghaz vaalee.
14sikandar lohaar nay mujhay bahut nuqsaan pahunchaaya hai. khudaavand usay us kay kaam ka badla dega. 15us say muhtaat rahen kyoonki us nay badee shiddat say hamaaree baaton kee mukhaalafat kee.
16jab mujhay pahelee dafa apnay difa kay liyay adaalat men pesh kiya gaya to sab nay mujhay tark kar diya. allaah un say is baat ka hisaab na lay balki isay nazar’andaaz kar day. 17lekin khudaavand meray saath tha. usee nay mujhay taqviyat dee, kyoonki us kee marzee thee ki meray vaseelay say us ka poora paighaam sunaaya jaaay aur tamaam ghairyahoodee usay sunen. yoon allaah nay mujhay sherbabar kay munh say nikaal kar bacha liya. 18aur aagay bhee khudaavand mujhay har shareer hamlay say bachaaega aur apnee aasmaanee baadshaahee men la kar najaat dega. us ka jalaal azal say abad tak hota rahay. aameen.
aakhiree salaam
19priskilla, akvila aur unesifurus kay gharaanay ko hamaara salaam kahena. 20iraastus kurinthus men raha, aur mujhay trufimus ko meeletus men chhodna pada, kyoonki vah beemaar tha. 21jaldee karen taaki sardiyon kay mausam say pahelay yahaan pahunchen.
yooboolus, poodens, leenus, klaudiya aur tamaam bhaaee aap ko salaam kahetay hain.
22khudaavand aap kee rooh kay saath ho. allaah ka fazl aap kay saath hota rahay.