2 Teemuthiyus 3

aakhiree din

¹lekin yah baat jaan len ki aakhiree dinon men haulnaak lamhay aaengay. ²log khudpasand aur paison kay laalchee hongay. vah shekheebaaz, maghroor, kufr baknay vaalay, maan-baap kay naaframaan, naashukray, bedeen ³aur muhabbat say khaalee hongay. vah sulah karnay kay liyay tayyaar naheen hongay, doosron par tuhamat lagaaengay, ayyaash aur vaheshee hongay aur bhalaaee say nafrat rakhengay. ⁴vah namakaheraam, ghairmuhtaat aur gharoor say phoolay huay hongay. allaah say muhabbat rakhnay kay bajaay unhen aish-o-ishrat piyaaree hogee. ⁵vah bazaahir khudaataras zindagee guzaarengay, lekin haqeeqee khudaataras zindagee kee quvvat ka inkaar karengay. aison say kinaara karen. ⁶un men say kuchh log gharon men ghus kar kamzor khavaateen ko apnay jaal men phansa letay hain, aisee khavaateen ko jo apnay gunaahon talay dabee huee hain aur jinhen kaee tarah kee shahevaten chalaatee hain. ⁷go yah har vaqt taaleem haasil kartee rahetee hain to bhee sachchaaee ko jaannay tak kabhee naheen pahunch sakteen. ⁸jis tarah yannes aur yambres moosa kee mukhaalafat kartay thay usee tarah yah log bhee sachchaaee kee mukhaalafat kartay hain. in ka zahen bigda hua hai aur in ka eemaan naamaqbool nikla. ⁹lekin yah ziyaada taraqqee naheen karengay kyoonki in kee hamaaqat sab par zaahir ho jaaegee, bilkul usee tarah jis tarah yannes aur yambres kay saath bhee hua.

aakhiree hidaayaat

¹⁰lekin aap har lihaaz say meray shaagird rahay hain, chaal-chalan men, iraaday men, eemaan men, sabr men, muhabbat men, saabitqadmee men, ¹¹eezaarasaaniyon men aur dukhon men. antaakiya, ikuniyum aur lustara men meray saath kya kuchh na hua! vahaan mujhay kitnee sakht eezaarasaaniyon ka saamna karna pada. lekin khudaavand nay mujhay in sab say rihaaee dee. ¹²baat yah hai ki sab jo maseeh eesa men khudaataras zindagee guzaarna chaahatay hain unhen sataaya jaaega. ¹³saath saath shareer aur dhokebaaz log apnay ghalat kaamon men taraqqee kartay jaaengay. vah doosron ko ghalat raah par lay jaaengay aur unhen khud bhee ghalat raah par laaya jaaega. ¹⁴lekin aap khud us par qaaim rahen jo aap nay seekh liya aur jis par aap ko yaqeen aaya hai. kyoonki aap apnay ustaadon ko jaantay hain ¹⁵aur aap bachpan say muqaddas saheefon say vaaqif hain. allaah ka yah kalaam aap ko vah hikmat ata kar sakta hai jo maseeh eesa par eemaan laanay say najaat tak pahunchaatee hai. ¹⁶kyoonki har paak navishta allaah kay rooh say vujood men aaya hai aur taaleem denay, malaamat karnay, islaah karnay aur raastbaaz zindagee guzaarnay kee tarbiyat denay kay liyay mufeed hai. ¹⁷kalaam-ay-muqaddas ka maqsad yahee hai ki allaah ka banda har lihaaz say qaabil aur har nek kaam kay liyay tayyaar ho.