2 Teemuthiyus 2

maseeh eesa ka vafaadaar sipaahee

¹lekin aap, meray betay, us fazl say taqviyat paaen jo aap ko maseeh eesa men mil gaya hai. ²jo kuchh aap nay bahut gavaahon kee maujoodgee men mujh say suna hai usay motbar logon kay sapurd karen. yah aisay log hon jo auron ko sikhaanay kay qaabil hon.

³maseeh eesa kay achchhay sipaahee kee tarah hamaaray saath dukh uthaatay rahen. ⁴jis sipaahee kee dyootee hai vah aam r’aaya kay muaamalaat men phansnay say baaz raheta hai, kyoonki vah apnay afsar ko pasand aana chaahata hai. ⁵isee tarah khel kay muqaablay men hissa lenay vaalay ko sirf is soorat men in’aam mil sakta hai ki vah qavaaid kay mutaabiq hee muqaabla karay. ⁶aur laazim hai ki fasal kee kataaee kay vaqt pahelay us ko fasal ka hissa milay jis nay khet men mehanat kee hai. ⁷us par dhyaan dena jo main aap ko bata raha hoon, kyoonki khudaavand aap ko in tamaam baaton kee samajh ata karega.

⁸maseeh eesa ko yaad rakhen, jo daaood kee aulaad men say hai aur jisay murdon men say zinda kar diya gaya. yahee meree khushkhabaree hai ⁹jis kee khaatir main dukh utha raha hoon, yahaan tak ki mujhay aam mujrim kee tarah zanjeeron say baandha gaya hai. lekin allaah ka kalaam zanjeeron say baandha naheen ja sakta. ¹⁰is liyay main sab kuchh allaah kay chunay huay logon kee khaatir bardaasht karta hoon taaki vah bhee najaat paaen - vah najaat jo maseeh eesa say miltee hai aur jo abdee jalaal ka baais bantee hai. ¹¹yah qaul qaabil-ay-etimaad hai,

agar ham us kay saath mar gae

to ham us kay saath jiengay bhee.

¹²agar ham bardaasht kartay rahen

to ham us kay saath hukoomat bhee karengay.

agar ham usay jaannay say inkaar karen

to vah bhee hamen jaannay say inkaar karega.

¹³agar ham bevafa niklen

to bhee vah vafaadaar rahega.

kyoonki vah apna inkaar naheen kar sakta.

qaabil-ay-qabool khidmatguzaar

¹⁴logon ko in baaton kee yaad dilaatay rahen aur unhen sanjeedgee say allaah kay huzoor samjhaaen ki vah baal kee khaal utaar kar ek doosray say na jhagden. yah befaaida hai balki sunnay vaalon ko bigaad deta hai. ¹⁵apnay aap ko allaah kay saamnay yoon pesh karnay kee pooree koshish karen ki aap maqbool saabit hon, ki aap aisa mazdoor niklen jisay apnay kaam say sharmaanay kee zaroorat na ho balki jo saheeh taur par allaah ka sachcha kalaam pesh karay. ¹⁶duniyaavee bakvaas say baaz rahen. kyoonki jitna yah log is men phans jaaengay utna hee bedeenee ka asar badhegaa ¹⁷aur un kee taaleem kainsar kee tarah phail jaaegee. in logon men huminyus aur filetus bhee shaamil hain ¹⁸jo sachchaaee say hat gaay hain. yah daava kartay hain ki murdon kay jee uthnay ka amal ho chuka hai aur yoon baaz ek ka eemaan tabaah ho gaya hai. ¹⁹lekin allaah kee thos bunyaad qaaim rahetee hai aur us par in do baaton kee muhar lagee hai, “khudaavand nay apnay logon ko jaan liya hai” aur “jo bhee samjhay ki main khudaavand ka pairokaar hoon vah naaraastee say baaz rahay.”

²⁰baday gharon men na sirf sonay aur chaandee kay bartan hotay hain balki lakdee aur mittee kay bhee. yaanee kuchh shareef kaamon kay liyay istemaal hotay hain aur kuchh kamaqdar kaamon kay liyay. ²¹agar koee apnay aap ko in buree cheezon say paak-saaf karay to vah shareef kaamon kay liyay istemaal honay vaala bartan hoga. vah makhsoos-o-muqaddas, maalik kay liyay mufeed aur har nek kaam kay liyay tayyaar hoga. ²²javaanee kee buree khwaahishaat say bhaag kar raastbaazee, eemaan, muhabbat aur sulah-salaamatee kay peechhay lagay rahen. aur yah un kay saath mil kar karen jo khuloosdilee say khudaavand kee parastish kartay hain. ²³hamaaqat aur jahaalat kee bahson say kinaara karen. aap to jaantay hain ki in say sirf jhagday paida hotay hain. ²⁴laazim hai ki khudaavand ka khaadim na jhagday balki har ek say meharbaanee ka sulook karay. vah taaleem denay kay qaabil ho aur sabr say ghalat sulook bardaasht karay. ²⁵jo mukhaalafat kartay hain unhen vah narmdilee say tarbiyat day, kyoonki ho sakta hai ki allaah unhen tauba karnay kee taufeeq day aur vah sachchaaee ko jaan len, ²⁶hosh men aaen aur iblees kay phanday say bach niklen. kyoonki iblees nay unhen qaid kar liya hai taaki vah us kee marzee pooree karen.