2 Teemuthiyus 1

¹yah khat paulus kee taraf say hai jo allaah kee marzee say maseeh eesa ka rasool hai taaki us vaada kee huee zindagee ka paighaam sunaaay jo hamen maseeh eesa men haasil hotee hai.

²main apnay piyaaray betay teemuthiyus ko likh raha hoon.

khuda baap aur hamaara khudaavand maseeh eesa aap ko fazl, rahem aur salaamatee ata karen.

shukrguzaaree aur hausalaaafzaaee

³main aap kay liyay khuda ka shukr karta hoon jis kee khidmat main apnay baapdaada kee tarah saaf zameer say karta hoon. din raat main lagaataar aap ko apnee duaaon men yaad rakhta hoon. ⁴mujhay aap kay aansoo yaad aatay hain, aur main aap say milnay ka aarzoomand hoon taaki khushee say bhar jaaoon. ⁵mujhay khaaskar aap ka mukhlis eemaan yaad hai jo pahelay aap kee naanee loois aur maan yUneekay rakhtee theen. aur mujhay yaqeen hai ki aap bhee yahee eemaan rakhtay hain. ⁶yahee vajah hai ki main aap ko ek baat yaad dilaata hoon. allaah nay aap ko us vaqt ek nemat say navaaza jab main nay aap par haath rakhay. aap ko us nemat kee aag ko naay siray say bhadkaanay kee zaroorat hai. ⁷kyoonki jis rooh say allaah nay hamen navaaza hai vah hamen buzdil naheen banaata balki hamen quvvat, muhabbat aur nazm-o-zabt dilaata hai.

⁸is liyay hamaaray khudaavand kay baaray men gavaahee denay say na sharmaaen, na mujh say jo maseeh kee khaatir qaidee hoon. is kay bajaay meray saath allaah kee quvvat say madad lay kar us kee khushkhabaree kee khaatir dukh uthaaen. ⁹kyoonki us nay hamen najaat day kar muqaddas zindagee guzaarnay kay liyay bulaaya. aur yah cheezen hamen apnee mehanat say naheen mileen balki allaah kay iraaday aur fazl say. yah fazl zamaanon kee ibtida say pahelay hamen maseeh men diya gayaa ¹⁰lekin ab hamaaray najaatadihanda maseeh eesa kee aamad say zaahir hua. maseeh hee nay maut ko nest kar diya. usee nay apnee khushkhabaree kay zareeay laafaanee zindagee raushnee men la kar ham par zaahir kar dee hai.

¹¹allaah nay mujhay yahee khushkhabaree sunaanay kay liyay munaad, rasool aur ustaad muqarrar kiya hai. ¹²isee vajah say main dukh utha raha hoon. to bhee main sharmaata naheen, kyoonki main usay jaanta hoon jis par men eemaan laaya hoon, aur mujhay poora yaqeen hai ki jo kuchh main nay us kay havaalay kar diya hai usay vah apnee aamad kay din tak mahfooz rakhnay kay qaabil hai. ¹³un sehatabakhsh baaton kay mutaabiq chaltay rahen jo aap nay mujh say sun lee hain, aur yoon eemaan aur muhabbat kay saath maseeh eesa men zindagee guzaaren. ¹⁴jo beshaqeemat cheez aap kay havaalay kar dee gaee hai usay rooh-ul-quds kee madad say jo ham men sukoonat karta hai mahfooz rakhen.

¹⁵aap ko maaloom hai ki sooba aasiya men tamaam logon nay mujhay tark kar diya hai. in men foogilus aur hirmughines bhee shaamil hain. ¹⁶khudaavand unesifurus kay gharaanay par rahem karay, kyoonki us nay kaee dafa mujhay tar-o-taaza kiya. haan, vah is say kabhee na sharmaaya ki main qaidee hoon. ¹⁷balki jab vah rom shaher pahuncha to badee koshishon say mera khoj laga kar mujhay mila. ¹⁸khudaavand karay ki vah qiyaamat kay din khudaavand say rahem paaay. aap khud behatar jaantay hain ki us nay ifisus men kitnee khidmat kee.